بيىل جەتىسۋداعى ەرىكتى جاستاردىڭ قاتارى كوبەيگەن. دەرەك بويىنشا, جىل باسىندا وبلىستا 1 043 ۆولونتەر رەسمي ساناققا كىرگەن بولسا, قازىر بۇل ۇلەس 2 074 ادامدى قامتىپ وتىر ەكەن. ەسەسىنە, ايماقتا ەرىكتىلەر قولىمەن اتقارىلعان ءىس تە ىلگەرىلەپ, قولعاناتقا جاراپ, قايىرىم جاساۋعا بەيىل جاستار سانى وسكەن. ونىڭ جارقىن مىسالىن «Biz birgemiz» جالپىۇلتتىق اكتسياسى كەزىندە اتقارىلعان ءىس-شارالاردان بايقاۋعا بولادى. جۇقپالى ىندەتتىڭ الدىن الۋ مەن تارالۋىنا توسقاۋىل قويۋ ماقساتىندا جاريالانعان توتەنشە جاعداي كەزىندە جەتىسۋلىق ەرىكتى جاستار الەۋمەتتىك كومەكتى قاجەت ەتەتىن 15 000 وتباسىنا قولۇشىن سوزىپتى. كارانتين جاعدايىنداعى جۇمىس ۆولونتەرلەردى بەتپەردە تىگۋ مەن سانيتارلىق زاتتار ءوندىرىسىن دامىتۋعا دا جۇمىلدىرعان ەكەن. اتاپ ايتقاندا, ۆولونتەرلەردىڭ مۇرىندىق بولۋىمەن 6 215 دانا مەديتسينالىق ماسكا تىگىلىپ, 6 000 ليتر سۇيىق انتيسەپتيك دايىندالعان. مۇنىڭ ءبارى تۇرعىندارعا تەگىن تاراتىلىپتى.
وبلىستا ۆولونتەرلەردىڭ جۇمىسىن ۇيلەستىرۋمەن «مەيىرىمدى جەتىسۋ» فرونت-كەڭسەسى اينالىسىپ وتىر. ەرىكتىلەردىڭ جۇمىسىن ءبىر ورتالىقتا ۇيلەستىرىپ, تۇرعىندار تاراپىنان كەلىپ تۇسكەن ءوتىنىش پەن شاعىمداردى جيناقتاۋمەن اينالىسقان ورتالىققا العاشقى كۇندەرى ادامدار ءجيى حابارلاسقان. ياعني توتەنشە جاعداي جاريالانعان العاشقى كۇننەن باستاپ تۇرعىنداردىڭ ءوتىنىشىن قابىلدايتىن قاۋىرت جەلىگە 2 634 ادام حابارلاسىپ, كومەك سۇراعان. ونىڭ ىشىندە 1 098 ادام الەۋمەتتىك كومەككە مۇقتاجدىعىن ايتىپ, ازىق-ت ۇلىكپەن قامتۋدى وتىنسە, 302 تۇرعىن قاشىقتان وقىتۋعا قاتىستى سۇراق قويعان. قاۋىرت جەلىگە حابارلاسقان تاعى 368 ادام دەنساۋلىق ساقتاۋ سالاسىنا قاتىستى ءوتىنىش ايتىپ, مامانداردىڭ كومەگىنە ءزارۋ ەكەنىن جەتكىزگەن. سونداي-اق 42 500 تەڭگە كولەمىندەگى الەۋمەتتىك تولەمگە قاتىستى انىقتاما الۋ ءۇشىن بىرەر تاۋلىك ىشىندە 864 ادام قوڭىراۋ شالىپتى. ال «مەيىرىمدى جەتىسۋ» فرونت-كەڭسەسىنىڭ قىزمەتكەرلەرى تۇرعىندار ءوتىنىشىن تۇگەلدەي جازىپ الىپ, ولاردى ءتيىستى ورىندارعا جولداۋ ارقىلى وڭ شەشىمىن تابۋعا ىقپال ەتىپ وتىردى.
– ەرىكتى جاستاردىڭ جانقيارلىق ءىسى كارانتين كەزىندە ەرەكشە كوزگە ءتۇستى. مىسالى, 20 مىڭنان استام تۇرعىنى بار «اسىل ارمان» تۇرعىن ءۇي كەشەنى وقشاۋلانعان كەزدە وبلىس جاستارى مەن ۆولونتەرلەر كۇن سايىن تۇرعىندارعا ازىق-ت ۇلىك جەتكىزىپ وتىردى. جالپى, بۇل جەردە ۆولونتەرلەردىڭ جۇمىسى تەك دايىن ازىق-ت ۇلىك پەن قاجەتتى زاتتاردى جەتكىزىپ بەرۋمەن شەكتەلگەن جوق. مۇقتاج ادامداردىڭ ءتىزىمىن جاساپ, ولاردى قاجەتتى زاتتارمەن قامتۋ ءۇشىن دەمەۋشى ىزدەپ ۇلكەن قاجىر مەن قايرات كورسەتتى. اتاپ ايتقاندا, ۆولونتەرلەر مەن دەمەۋشىلەردىڭ تىزە قوسۋىمەن تالعار اۋدانىندا 6 ملن تەڭگە كولەمىندە 540 وتباسىنا ازىق-ت ۇلىك جەتكىزگەن. ەڭبەكشىقازاق اۋدانىندا 21 ملن 700 مىڭ تەڭگە كولەمىندە 3 186 وتباسىنا كومەك كورسەتىلدى. سونىمەن قاتار ەرىكتى جاستار 500 000 تەڭگە قارجى كوزىن جيناپ, ەكى وتباسىنىڭ 1 جىلدىق پاتەراقىسىن تولەپ بەردى. الاكول اۋدانىندا ىسكەر ازاماتتاردىڭ قولداۋىمەن 60 ملن تەڭگە كولەمىندە دەمەۋ قارجى جينالىپ, وعان 790 وتباسىنا ازىق-ت ۇلىك جەتكىزىلدى. ال ۇيعىر اۋدانىندا تۇراتىن ۆولونتەر نۇرسۇلتان بولات ۇلى باس بولىپ 1 700 000 تەڭگەگە 258 وتباسىنا قولۇشىن سوزدى. سول سياقتى بالقاش اۋدانىنىڭ تۇرعىنى الماس قىستاۋباەۆ ءوز جەرلەستەرىنە 10 توننا كۇرىشتى تەگىن تاراتتى. ايتا بەرسەك مۇنداي مىسالدار جەتكىلىكتى. ياعني ۆولونتەرلەردىڭ «Biz birgemiz» اكتسياسى اياسىندا اتقارعان ءىسى كوپكە ۇلگى بولارلىقتاي, – دەيدى الماتى وبلىستىق جاستار ساياساتى باسقارماسىنىڭ ءبولىم باسشىسى جانسايا سماعۇلوۆا.
الماتى وبلىسى
