بۇل تۋرالى ەلباسىنىڭ ءباسپاسوز حاتشىسى ايدوس ۇكىباي تومەندەگىدەي پىكىر ءبىلدىردى. «اي باستالعالى نۇرسۇلتان نازارباەۆتىڭ جۇمىس كەستەسى وتە تىعىز بولدى. ەلباسى ەكىجاقتى كەلىسسوزدەر جۇرگىزىپ, رەسمي تۇلعالاردى قابىلدادى. وعان قوسا, تۇڭعىش پرەزيدەنت وتاندىق جانە شەتەلدىك باق وكىلدەرىنە سۇحبات بەردى. جالپى العاندا تەلەۆيزيالىق ءتۇسىرىلىم ءۇشىن 40 ادام جۇمىس ىستەدى, سونىڭ ىشىندە شەتەلدىڭ ازاماتتارى دا بار. نۇرسۇلتان نازارباەۆتىڭ جاعدايىن مەديتسينا قىزمەتكەرلەرى باقىلاپ وتىر. الاڭداۋعا نەگىز جوق. ەلباسى زاماناۋي كوممۋنيكاتسيا ارنالارىن پايدالانىپ قاشىقتان جۇمىس ىستەپ جاتىر. بەكىتىلگەن حاتتاماعا سايكەس, تۇڭعىش پرەزيدەنتتىڭ باسقا تۇلعالارمەن بايلانىسى شەكتەلدى. ەلباسى قاتىساتىن جوسپارلانعان كەيبىر ءىس-شارالار بەينەكونفەرەنتسبايلانىس تۇرىندە ونلاين رەجىمدە وتەدى. رەسمي حابار تاراعان العاشقى مينۋتتان باستاپ تۇڭعىش پرەزيدەنتتىڭ دەنساۋلىعىنا الاڭداعان جانە تەزىرەك ساۋىعىپ كەتۋىن تىلەگەن ازاماتتاردان حات الىپ جاتىرمىز. مەنىڭ تەلەفونىم حابارلاسقاندار مەن مەسسەندجەرلەردەن كەلگەن حابارلاماعا تولىپ قالدى. جۋرناليستەر, دوستار, تۋىستار, ارىپتەستەر حابارلاسىپ, ەلباسىنا كۇش-قۋات پەن مىقتى دەنساۋلىق تىلەپ جاتىر. ولاردىڭ قاتارىندا جاقىن جانە الىس شەتەلدەن حابارلاسقاندار بار. تۇڭعىش پرەزيدەنتكە مەملەكەت باسشىسى قاسىم-جومارت توقاەۆ تا قولداۋ ءبىلدىردى, ەلىمىزدىڭ بارلىق ايماعىنان ەلباسى كەڭسەسىنە جەدەلحاتتار كەلىپ ءتۇسىپ جاتىر. نۇرسۇلتان نازارباەۆ قازاقستاندىقتار مەن بارلىق الاڭداپ وتىرعان ادامدارعا العىس بىلدىرەدى», دەدى ايدوس ۇكىباي.
