14 شىلدەدە وتەتىن اسا 106 ءتۋرنيرىنىڭ نەگىزگى جەكپە-جەكتەرىنىڭ بىرىندە قازاقستاننىڭ تۋى استىندا 31 جاستاعى تانىمال سپورتشى گەورگي كيچيگين ونەر كورسەتەدى. 77 كيلو سالماقتا كۇش سىناسىپ جۇرگەن ول وسى كۇنگە دەيىن 29 كەزدەسۋ وتكىزىپ, 23 رەت جەڭىسكە جەتتى. 20 باسەكەدە ايقىن باسىمدىق تانىتتى. جەرلەسىمىز رەسەيلىك ماگومەدسايگيد الىبەكوۆپەن ايقاسادى. داعىستاننىڭ تۇلەگى 11 كەزدەسۋدىڭ تەك بىرەۋىندە عانا ۇتىلدى.
ال 24 شىلدەدە جالاۋى جەلبىرەيتىن جارىستا قازاقستاننىڭ قوس قىرانى كۇش سىناسادى. ولار – قارشىعا داۋىتبەك پەن ەۆگەني ەگەمبەرديەۆ. ەكەۋى دە دانيار قاسقاراۋوۆ جەتەكشىلىك ەتەتىن "الاش پرايد" كلۋبىنىڭ وكىلدەرى. 66 كيلو سالماقتاعى قارشىعا داۋىتبەك چەشەنستاندىق حاسسەين شايحاەۆپەن شەبەرلىك بايقاسادى. قانداسىمىز 12 كەزدەسۋدىڭ 9-ىندا ۇستەمدىك تانىتسا, قارسىلاسى ءۇش باسەكەنىڭ بارلىعىن ءوز پايداسىنا شەشتى.
93 كيلو سالماقتاعى ەۆگەني ەگەمبەرديەۆ وكتوگوندا 13 جەكپە-جەك وتكىزىپ, ەكەۋىندە عانا ەسە جىبەردى. قازىرگى كەزدە ول اسا رەيتينگىندە ءتورتىنشى ورىندا تۇر. وتانداستارىمزدىڭ اراسىنداعى بۇل ەڭ ۇزدىك كورسەتكىش. ەۆگەني داعىستاندىق ناسرۋدين ناسرۋدينوۆپەن ايقاسادى. ول 8 باسەكەنىڭ بارلىعىندا قارسىلاستارىنىڭ وسال تۇسىن تاپتى.
تاعى ءبىر ايتا كەتەرلىك جايت, قازاقستاننىڭ قوس وكىلى ونەر كورسەتەتىن ءتۋرنيردىڭ باستى جەكپە-جەگىندە اتىشۋلى الەكساندر ەمەليانەنكو مەن ماگومەد يسمايلوۆ جۇدىرىقتاسادى. بۇل سپورتشىلاردىڭ ەكەۋىنىڭ دە اتاعى الىسقا جايىلعان. تاياۋ كۇندەرى 39 جاسقا تولعالى وتىرعان ەمەليانەنكو كەزىندە جاپونيانىڭ "پرايد" پروموۋشەنىندە ەلەۋلى تابىستارعا قول جەتكىزدى. كەزىندە ول پاۆەل ناستۋلا, دجەيمس تومپسون, سەرگەي حاريتونوۆ, بوب ساپپ, گابريەل گونزاگا سىندى ساڭلاقتارعا سان سوقتىردى. بارلىعى 36 كەزدەسۋ وتكىزگەن رەسەيلىك سپورتشى 28 رەت جەڭىس تويىن تويلادى. 7 رەت جەڭىلىپ, تاعى ءبىر تارتىس تەڭ ەسەپپەن اياقتالدى. الەكساندر داڭقتى فەدور ەمەليانەنكونىڭ تۋعان ءىنىسى.
34 جاستاعى ماگومەد يسمايلوۆ رەسەيدىڭ تومەنگى تاگيل قالاسىندا دۇنيەگە كەلگەنىمەن, بالاۋسا كەزىندە اتان-اناسىمەن بىرگە ماحاچكالاعا قونىس اۋداردى. ۇلتى – اۆار. داعسىتاندا ءجۇرىپ, جەكپە-جەك ونەرىنىڭ سان ءتۇرىن مەڭگەردى. ول 18 رەت ايقاس الاڭىنا شىعىپ, سول سايىستاردىڭ ەكەۋىندە عانا جەڭىلىستىڭ كەرمەك ءدامىن تاتتى.
