ۇبت-نىڭ العاشقى كۇنى 161 پۋنكتىڭ 51-ءى عانا ىستەيدى, ونىڭ 44-ءى اۋىلدىق جەرلەردە ورنالاسقان. ورتاشا ەسەپپەن 1 ۇبت تاپسىرۋ پۋنكتىنە 120 ادامنان كەلەدى.
21 ماۋسىم مەن 5 شىلدە ارالىعىندا تەستىلەۋ تاپسىرىلاتىن اعىنداردىڭ جالپى سانى 15-ءتى قۇرايدى. ۇبت وتكىزىلەتىن ءاربىر پۋنكتە مەديتسينالىق-سانيتارلىق سيپاتتاعى كۇشەيتىلگەن شارالار قابىلداناتىن بولادى: دەزينفەكتسيالىق توننەلدەن ءوتۋ, ارنايى دەزينفەكتسيالانعان كىلەمشەدە اياق كيىمدەردى زارارسىزداندىرۋ, دەنە قىزۋىن ولشەۋ, قولدى زارارسىزداندىرۋ سۇيىقتىعىمەن وڭدەۋ, مەديتسينالىق ماسكالار بەرۋ. تەستىلەۋگە كىرگىزۋ جانە وتىرعىزۋ كەزىندە تەستىلەنۋشىلەر اراسىنداعى اراقاشىقتىقتىڭ كەمىندە 2 مەتر بولۋى قامتاماسىز ەتىلەدى, سونداي-اق ءاربىر اۋديتوريا باكتەريتسيدتىك قۇرالدارمەن جانە اۋا رەتسيركۋلياتورلارىمەن كەزەڭ-كەزەڭمەن جەلدەتىلىپ, وڭدەلەتىن بولادى.
سانيتارلىق تالاپتار قاتاڭ ساقتالادى, سوندىقتان اۋديتوريانى تەك 50%-عا دەيىن تولتىرۋعا بولادى. سايكەسىنشە, جوبالىق قۋاتتىلىق ۇبت-نى 6 كۇننىڭ ىشىندە وتكىزۋگە مۇمكىندىك بەرگەنىمەن, شاعىن اعىنداردى جيناقتاۋ ءۇشىن تەستىلەۋ 15 كۇننىڭ ىشىندە جۇرگىزىلەدى.
ەستەرىڭىزگە سالا كەتەيىك, بيىل تەستىلەنۋشىلەر ءۇشىن بۇرىن-سوڭدى بولماعان جاعداي جاسالدى. ماسەلەن, العاش رەت كالكۋلياتور پايدالانۋعا رۇقسات ەتىلىپ, تالاپكەرلەر ءۇشىن تەگىن بايقاۋ سىناقتارى قولجەتىمدى بولدى. سونىمەن قاتار تەستىلەۋدى وتكىزۋ ۋاقىتى 4 ساعاتقا دەيىن ۇزارتىلىپ, تۇلەكتەر مەملەكەتتىك ەمتيحاننان بوساتىلدى.
