تەستىلەۋدىڭ اشىقتىعى مەن وبەكتيۆتىلىگىن قامتاماسىز ەتۋ ءۇشىن ءبىلىم جانە عىلىم مينيسترلىگىنىڭ بۇيرىعىمەن ەلىمىزدىڭ بارلىق ايماقتارىندا جۇمىس توبى قۇرىلدى. ونىڭ قۇرامىنا ارنايى مونيتورينگ توپ, "ادالدىق الاڭى" جوبالىق كەڭسەسىنىڭ وكىلدەرى جانە سىبايلاس جەمقورلىققا قارسى ءىس-قيمىل اگەنتتىگى قىزمەتكەرلەرى كىرگەن. بۇل توپتىڭ نەگىزگى ماقساتى تەستىلەۋدىڭ تازا وتكۋى باقىلاۋ بولىپ تابىلادى.
اگەنتتىك قىزمەتكەرلەرىنىڭ حابارلاۋىنشا, الەۋمەتتىك جەلىلەردە, WhatApp مەسسەندجەرلەرىندەگى اتا-انالار توپتارىنا ۇيىمداستىرىلعان مونيتورينگ ناتيجەسىمەن ۇلتتىق بىرىڭعاي تەستىلەۋدەن وڭ كورسەتكىشكە قول جەتكىزۋگە "كومەكتەسكىسى" كەلەتىن بەلگىسىز ازاماتتار انىقتالۋدا ەكەن. وسىعان بايلانىستى اگەنتتىك وقۋشىلاردى تەك ءوز بىلىمىنە سۇيەنە وتىرىپ, تەست تاپسىرۋعا شاقىرادى. ال, اتا-انالاردى تەستىلەۋ قورىتىندىسى بويىنشا وڭ باعا الۋ ماقساتىندا پارا بەرگەنى ءۇشىن قىلمىستىق جاۋاپكەرشىلىك جانە باس بوستاندىعىنان ايىرۋ كوزدەلگەنىن ەسكەرتەدى. اگەنتتىك ەگەر, ازاماتتار وسىنداي جاعدايعا تاپ بولسا, سىبايلاس جەمقورلىققا قارسى 1424 call-ورتالىققا قوڭىراۋ شالۋ قاجەتتىگىن حابارلادى.
جالپى, اگەنتتىك ءبىلىم جانە عىلىم مينيسترلىگىمەن بىرلەسىپ پاراساتتىلىق پەن اكادەميالىق ادالدىق يدەولوگياسىن ىلگەرىلەتۋ بويىنشا بەلسەندى جۇمىس جۇرگىزۋدە.
