«فيتوۋ» تايفۋنىنىڭ سوققىسى سالدارىنان قىتايدىڭ شىعىسىندا 4,5 ميلليون ادام زارداپ شەكتى. ەڭ اۋىر سوققى تيگەن چجەتسزيان پروۆينتسياسىنىڭ وزىندە عانا 4,3 ميلليوننان استام ادام جاپا شەگىپ وتىر.
«فيتوۋ» تايفۋنىنىڭ سوققىسى سالدارىنان قىتايدىڭ شىعىسىندا 4,5 ميلليون ادام زارداپ شەكتى. ەڭ اۋىر سوققى تيگەن چجەتسزيان پروۆينتسياسىنىڭ وزىندە عانا 4,3 ميلليوننان استام ادام جاپا شەگىپ وتىر.
تابيعات اپاتى ۇيلەردى قيراتىپ, ەگىستىكتەرگە شىعىن كەلتىرگەن. «فيتوۋ» – جىل باسىنان بەرى قىتايعا سوققى جاساپ وتىرعان 23-ءشى تايفۋن. 7 قازان كۇنى اسپان استى ەلىنىڭ شىعىس جاعالاۋىنا جەتكەن داۋىلدىڭ جىلدامدىعى ساعاتىنا 151 شاقىرىمدى قۇراعان. بۇعان دەيىن «فيتوۋ» تايفۋنى جاپونياعا ويران سالعان بولاتىن. ەندى قىتايعا شىعىس-قىتاي تەڭىزىندە كۇشتى داۋىل تۇرعىزاتىن «دانوس» تايفۋنىنىڭ قاتەرى ءتونىپ تۇر.
حالىقارالىق ميسسيا قۇرىلماق
بۇۇ باس حاتشىسى پان گي مۋن سيريانىڭ حيميالىق ارسەنالىن جويۋعا قاتىستى وعان باقىلاۋ جاساۋ مەن ۇيلەستىرۋ بويىنشا حالىقارالىق ميسسيا قۇرۋدى ۇسىندى.
وعان قاتىسۋشى ساراپشىلار توبى مەن ميسسيا ۇيلەستىرۋشىلەرى كيپر مەن داماسكىدە ورنالاساتىن بولادى. باس حاتشىنىڭ ايتۋىنشا, ميسسياعا بۇۇ-نىڭ جانە حيميالىق قارۋعا تىيىم سالۋ جونىندەگى ۇيىمنىڭ ەكى جۇزگە جۋىق ساراپشىسى قاتىسا الادى. ميسسياعا داماسك مەن حالىقارالىق ۇيىمدار اراسىندا دەلدالدىق جاسايتىن ارنايى ۇيلەستىرۋشى باسشىلىق جاسايدى. بۇل تۋرالى باس حاتشى قاۋىپسىزدىك كەڭەسى مۇشەلەرىنە جولداعان حاتىندا مالىمدەگەن.
اسكەرىن جاۋىنگەرلىك دايىندىققا كەلتىردى
سولتۇستىك كورەيا وسى اپتادا باستالۋعا ءتيىس بولعان اقش پەن وڭتۇستىك كورەيانىڭ بىرلەسكەن اسكەري جاتتىعۋلارىنا كەز كەلگەن ساتتە قارۋمەن جاۋاپ بەرۋ ءۇشىن اسكەرىن جاۋىنگەرلىك دايىندىققا كەلتىردى.
سولتۇستىككورەيالىق باق-تاردىڭ مالىمەتتەرى بويىنشا, كحدر-دىڭ بارلىق اسكەري بولىمدەرى جوعارعى كوماندوۆانيەدەن «وپەراتسيا جۇرگىزۋدىڭ بەلگىلەنگەن جوسپارىن شۇعىل تۇردە قايتا قاراۋ جانە امەريكالىق, جاپوندىق اگرەسسورلار مەن ولاردىڭ قولجاۋلىعىنىڭ قوزعالىسىن باقىلاي وتىرىپ, كەز كەلگەن ۋاقىتتا سوققى بەرۋگە تولىق دايىن بولۋ» تۋرالى بۇيرىق العان. كحدر مۇنداي شەشىمگە وسى اپتادا وتۋگە ءتيىس بولعان بىرلەسكەن اسكەري-تەڭىز جاتتىعۋلارىنا بايلانىستى بارىپ وتىر.
ناتو وپەراتسيالارى قاسىرەت قانا اكەلدى
اۋعانستان پرەزيدەنتى حاميت كارزاي ناتو ەلدەرى اسكەري كونتينگەنتىنىڭ ءوز ەلىندە ون جىل تۇرعانىنا قاراماستان, باتىسقا وڭىردە تۇراقتىلىقتى قامتاماسىز ەتۋدىڭ ءساتى تۇسپەگەنىن مالىمدەدى.
قاۋىپسىزدىك تۇرعىسىنان العاندا ناتو-نىڭ بۇكىل وپەراتسيالارى اۋعانستان ءۇشىن زور قاسىرەتكە اينالىپ, كوپتەگەن ادامدار قۇربان بولدى جانە ەڭ باستىسى, ەل ءالى دە قاۋىپسىز بولىپ سانالمايتىندىقتان ەشقانداي ناتيجەلەر اكەلگەن جوق, دەپ اتاپ كورسەتكەن اۋعانستان پرەزيدەنتى بريتاندىق بي-بي-سي تەلەراديوكورپوراتسياسىنا بەرگەن سۇحباتىندا. كارزايدىڭ پىكىرىنشە, اليانس باسشىلىعى پاكستانداعى تالىبتەر جاسىرىنعان جەرلەرگە نازار اۋدارماستان, قاتەلەسىپ اۋعان ەلدى مەكەندەرىندەگى سودىرلارعا شابۋىل جاساۋمەن
بولعان.
شەرۋ سوڭى تارتىپسىزدىككە ۇلاستى
برازيليادا ەلۋ كۇننەن استام ۋاقىتتان بەرى ەڭبەكاقىنى ءوسىرۋدى تالاپ ەتىپ, بەيبىت تۇردە ءوتىپ جاتقان مۇعالىمدەر ەرەۋىلى تارتىپسىزدىكتەرگە ۇلاستى.
ريو-دە-جانەيرو كوشەلەرىندەگى اكتسيالارعا ەلۋ مىڭعا دەيىن مۇعالىمدەر مەن ولارعا تىلەكتەستەر قاتىسقان. باستاپقىدا بەيبىت باستالعان ەرەۋىل قاراڭعى تۇسە پوليتسيامەن قاقتىعىسقا سوقتىرعان. قارا بەتپەردە كيگەن جيىرماعا تارتا ەرەۋىلشى مەريا عيماراتىنا باسىپ كىرمەك بولعان كەزدە ءتارتىپ ساقشىلارى ولارعا قارسى كوز جاساۋراتاتىن گاز بەن باسقا دا ارنايى قۇرالدار قولدانعان. سان-پاۋلۋ قالاسىندا دا وسىنداي وقيعا ورىن العان. مۇندا قاقتىعىستان جەتى ادام, ونىڭ ىشىندە ءتورت پوليتسيا وفيتسەرى جاراقاتتانعان.
قىرعىزدار تاعى ەرەۋىلگە شىقتى
قىرعىزستاننىڭ ىستىقكول وبلىسىندا ەرەۋىلشىلەر قاراكول قالاسىن بىشكەكپەن جالعايتىن اۆتوموبيل جولىن جاۋىپ تاستاعان.
رەسپۋبليكا پرەزيدەنتى المازبەك اتامباەۆ كۇشتىك ورگاندارعا ءتارتىپسىزدىكتەرگە كىنالىلەردى جاۋاپكەرشىلىككە تارتۋ جونىندە بۇيرىق بەردى. قازىرگى ۋاقىتتا اۆتوجول ءبىر جاعىنان «كاماز» جۇك كولىگىمەن, ەكىنشى جاعىنان جەڭىل اۆتوكولىكپەن جابۋلى تۇر. ەرەۋىلشىلەر جوگوركۋ كەنەش دەپۋتاتتارىنان «قۇمتورە» تۋرالى ماسەلەنى قايتا قاراۋدى تالاپ ەتۋدە. ەسكە سالا كەتەر بولساق, ەرەۋىلشىلەر تالابى 2009 جىلى بەكىتىلگەن كانادالىق Centerra Gold كومپانياسىمەن اراداعى كەلىسىمدى بۇزۋ جونىندە بولىپ وتىر.
رەسەي كەشىرىم سۇراۋدى تالاپ ەتۋدە
رەسەي نيدەرلاندىداعى رف ەلشىلىگىنىڭ قىزمەتكەرى دميتري ءبوروديننىڭ سوققىعا جىعىلۋىنا بايلانىستى تۇسىنىك بەرۋدى تالاپ ەتۋدە.
بۇل ۆەنا كونۆەنتسياسىن دورەكى تۇردە بۇرمالاۋ. ءبىز قارسى تاراپتىڭ تۇسىنىك بەرۋىن جانە كەشىرىم سۇراۋىن, سول سياقتى كىنالىلەردى جازالاۋىن كۇتەمىز, دەپ مالىمدەدى رەسەي پرەزيدەنتى ۆلاديمير پۋتين اتەق ءسامميتىنىڭ قورىتىندىسى بويىنشا وتكەن ءباسپاسوز ءماسليحاتىندا. نيدەرلاندىداعى وقيعا رەسەي تاراپىنان قاتاڭ سىنعا ىلىگىپ وتىر. رەسەي سىرتقى ىستەر مينيسترلىگى نيدەرلاندى جاعىنا قاتاڭ تۇردە نارازىلىق نوتاسىن جولداعان.
بالانى قۇرباندىقتان قۇتقارىپ قالدى
ليبەريادا جۇمىس ىستەيتىن رەسەيلىك پوليتسەي جەتى جاسار بالانى قۇرباندىققا شالۋعا جول بەرگەن جوق. بۇل تۋرالى رەسەي ءسىم ءباسپاسوز قىزمەتىنە سىلتەمە جاساي وتىرىپ, «روسسيا-24» تەلەارناسى حابارلاعان.
ۆەدومستۆونىڭ اقپاراتىنا قاراعاندا, پولكوۆنيك سەرگەي سافرونوۆ جەتى جاسار ەر بالانى قۇرباندىققا شالۋ ءۇشىن ساتقالى جاتقانىن ءبىلىپ قالادى. سودان سوڭ ول ايەلدەر مەن بالالاردى قورعاۋ بولىمىنە حابارلاسىپ, ونىڭ قىزمەتكەرلەرىمەن بىرگە بالانى قۇتقارۋ جونىندەگى وپەراتسيانى ازىرلەيدى. ساتىپ الۋشى رولىنە ءبىر ايەلدى تاڭداپ الادى. بالا ءۇشىن 150 دوللار عانا سۇرايدى. سونىمەن بىرگە, ول ساتۋشىعا بالانىڭ قازا تاباتىنى تۋرالى دا ايتىپ بەرەدى. مۇنداي جاعداي ساتۋشىنىڭ كوڭىلىنەن شىعادى. ارام نيەتتى اقشا الىپ جاتقان جەرىندە ۇستالدى. سويتسە ول بالانىڭ الىس تۋىسى بولىپ شىققان.
ينتەرنەت ماتەريالدارى نەگىزىندە ازىرلەندى.
