• 08 قازان, 2013

حوككەي. «بارىس» بۋلليتتەن «ءۆيتيازدى» ۇتتى

211 رەت

كورسەتىلدى

2 مين

وقۋ ءۇشىن

Egemen Qazaqstan

08-10-13-talgat jailauov-1

بۇگىن, 8 قازان كۇنى استانانىڭ «بارىسى» پودولسكىنىڭ «ءۆيتيازىن» قابىلداپ, 3:1 ەسەبىمەن جەڭدى. ويىننىڭ نەگىزگى ۋاقىتى 2:2 ەسەبىمەن تەڭ اياقتالىپ, ماتچتان كەيىنگى بۋلليتتە استانالىقتار باسىم ءتۇستى.بۇل تۋرالى Egemennews.kz ءتىلشىسى حابارلادى. بۋلليت ارقىلى بولعان وسى جەڭىستىڭ ءوزى استانالىقتاردىڭ كوشباسىلىق ورنىنىڭ ساقتالىپ قالۋىنا مۇمكىندىك بەردى. ءبىزدىڭ جەرلەستەرىمىز ويىن باستالعاننان ونىڭ تىزگىنىن ءوز قولىنا الدى. بىراق ونى جۇزەگە اسىرۋدىڭ ورايىن كەلتىرە الماي جاتتى. ءبىرىنشى كەزەڭدە ەكى جاق تا اقىرى ەسەپ اشا الماي تارقاستى. «بارىس» ەكىنشى كەزەڭدە دە باسىمدىق كورسەتتى. كوماندا ونىڭ ناتيجەسىن تەك 31-مينۋتتا عانا كورسەتتى. فورۆارد ەۆگەني بلوحين ارىپتەستەرى ماكسيم سەمەنوۆپەن جانە تالعات جايلاۋوۆپەن (سۋرەتتە) بىرەر رەت شايبا الماسىپ العاسىن, قاقپاشى يۆان ليسۋتين قورعاعان قاقپانى الىس بۇرىشىنان ساڭىلاۋ تاۋىپ ۇلگەردى. الايدا, قوناقتار دا قاراپ قالمادى. ولار ارانى كوپكە سوزباي, الاڭدا كوپ بولعان كەزدەرىن ءساتتى پايدالانىپ, ەسەپتى تەڭەستىرىپ كەتتى. مۇنى الاڭ يەلەرىنىڭ گولكيپەرى اري احونەندى قاپى قالدىرعان ياكوۆ سەلەزنەۆ جاسادى. ءۇشىنشى كەزەڭدە سەرگەي توپول قوناقتاردى العا شىعاردى. ال «بارىس» بۇل گولدىڭ جاۋابىن ايدىندا كوپشىلىك بولىپ جۇرگەن كەزىندە عانا بەرە الدى. سول كەزدە ولاردىڭ بەس ويىنشىسى پودولسكىلىكتەردىڭ ءۇش ويىنشىسىنا قارسى ويناپ ءجۇر ەدى. سونىمەن, ەسەپ 2:2-گە تۇراقتادى. قالعان ۋاقىتتا دا, ودان كەيىنگى وۆەرتايمدا دا قارسىلاستار ءبىر-بىرلەرىنەن اسقان جوق. سوسىن حوككەي «پەنالتيى» - بۋلليتكە كەزەك بەرىلدى. وندا جەڭىس سوققىسىن رومان ستارچەنكو جاسادى. قازىر «بارىستىڭ» قورجىنىندا 29 ۇپاي بار. ەكىنشى بولىپ كەلە جاتقان قازاننىڭ «اق بارىسى» 28 ۇپايمەن تۇر. ايتا كەتۋ كەرەك, شىعىس كونفەرەنتسياسىندا توپ باسىنا تالاسۋشى نەگىزگى قارسىلاستار بولىپ كەلە جاتقان بۇل ەكەۋدىڭ ويىندارى سانى ەكى ءتۇرلى. ايتالىق, قازاندىقتار قازىرگە دەيىن 14 ويىن ويناپ قويدى. ال استانالىقتاردىڭ بۇدان ەكى ويىنى كەم. «بارىس» كەلەسى ويىنىن 10 قازان كۇنى ءوز الاڭىندا ماسكەۋدىڭ «ديناموسىمەن» وتكىزەدى. ماتچ استانا ۋاقىتىمەن ساعات 19:00- دە باستالادى. دامير قوجامقۇل.