وسى ماقساتتا وڭىرگە ارنايى كەلگەن قازاقستان كاسىپوداقتار فەدەراتسياسىنىڭ توراعاسى ساتىبالدى داۋلەتالين, وزبەكستان رەسپۋبليكاسى جيزاق وبلىسى كاسىپوداقتار كەڭەسىنىڭ توراعاسى نۋسۋراتۋللا پارداەۆ, تۇركىستان وبلىسى اكىمىنىڭ ورىنباسارى ساكەن قالقامانوۆ جانە فەدەراتسيانىڭ ءۇيىم باسشىلارى "ورگەباس" جانە فەردوۋسي اۋىلدارىنا بارىپ, سۋ اپاتى زارداپتارىن جويۋ بارىسىنداعى اتقارىلعان جۇمىستاردىڭ بارىسىمەن, "دوستىق", "جەڭىس", "جاڭا-تۇرمىس" ەلدى مەكەندەرىندە سالىنىپ جاتقان تۇرعىن ۇيلەردىڭ قۇرىلىسىمەن تانىستى. مىرزاكەنت كەنتىندە جەرگىلىكتى تۇرعىندارمەن جانە سۋ اپاتىنان زارداپ شەككەن ەلدى مەكەندەردەگى جالپى ورتا مەكتەپتەرىنىڭ باسشىلارىمەن كەزدەستى.
تۇرعىندارمەن كەزدەسۋدە ساتىبالدى داۋلەتالين ماقتاارال اۋدانىنىڭ تۇرعىندارى بەرەكەنى كوكتەن ەمەس, قاجىرلى ەڭبەكتەن تىلەگەن تىنىمسىز ەڭبەكقور جاندار ەكەنىن اتاپ ءوتتى. "مۇقتاج جانمەن ءوز جىلۋىمەن ءبولىسۋ ءداستۇرى قازاق حالقىنىڭ قانىندا بار. سوندىقتان دا, ءبىز وسىندامىز. كاسىپوداقتار ەلمەن بىرگە, تاعدىر توڭدىرعان ماقتاارالدىقتارعا جىلۋمەن كەلدىك. وسىنداي قاجەتتى ءىس-شارالاردى جەدەل تۇردە قاراستىرىپ, جۇزەگە اسىرعان پرەزيدەنت پەن ۇكىمەتكە ءوز ريزاشىلىعىمدى بىلدىرگىم كەلەدى. ءوز كەزەگىندە, ارىپتەسىمىز – وزبەكستان كاسىپوداقتار فەدەراتسياسىمەن ورتاق كەلىسىم بويىنشا ماقتاارال اۋدانى ەلدى مەكەندەرى تۇرعىندارىن قولداۋ ماقساتىندا بىرلەسىپ, 66 ميلليون تەڭگەنىڭ كومەگىن كورسەتۋ تۋرالى شەشىم قابىلدادىق. ءبىز ءتورت ورتا ءبىلىم بەرەتىن مەكتەپتەرگە ينتەراكتيۆتى كومپيۋتەرلىك سىنىپتاردىڭ تولىق جابدىعىن تاپسىرامىز" , دەدى س.داۋلەتالين.
سونداي-اق ول امانجولوۆ, مۇسىرەپوۆ, فەردوۋسي اتىنداعى ورتا ءبىلىم بەرەتىن جانە "نۇرلى جول" ەلدى مەكەنىندەگى مەكتەپتەردىڭ ديرەكتورلارىنا 25 نوۋتبۋك, 25 پارتا مەن 50 ورىندىق, 2 پرينتەر, ءبىر-بىردەن مۋلتيمەديالىق تاقتا تابىس ەتتى. سونىمەن قاتار, سۋ تاسقىنىنان زارداپ شەككەن ەلدى مەكەندەردىڭ 100 تۇرعىنىنا فەدەراتسياعا قاراستى "كوكتەم", "مەركى", "مانكەنت", "جاڭاقورعان", "ششۋچينسك" شيپاجايلارىنا جولداما بەرىلدى. تەگىن جولدامالار زەينەتكەرلەرگە, مۇعالىمدەرگە, سونداي-اق, كوپبالالى جانە از قامتىلعان وتباسىلارعا دا تابىس ەتىلەدى.
اپاتتان زارداپ شەككەن اۋداننىڭ مۇعالىمدەرىنە رەسپۋبليكالىق ءبىلىم جانە عىلىم قىزمەتكەرلەرى سالالىق كاسىپوداعى تاراپىنان دا ەلەۋلى قولداۋ كورسەتىلىپ, 365 ءبىلىم سالاسى كاسىپوداق مۇشەسىنە ماتەريالدىق كومەك رەتىندە 35 مىڭ تەڭگەدەن بەرىلدى. جالپى كاسىپوداقتار فەدەراتسياسىنىڭ مۇشەلىك ءۇيىمدارى 50 ملن تەڭگەنىڭ كومەگىن كورسەتتى. ءوز كەزەگىندە وزبەكستاننان "دوستىق كەرۋەنىن" باستاپ كەلگەن, جيزاق وبلىستىق كاسىپوداقتار كەڭەسىنىڭ توراعاسى, وزبەكستان سەنات دەپۋتاتى نۋسۋراتۋللا پارداەۆ باۋىرلاستىق ءارى كورشىلىك قارىم-قاتىناستار قازاق جانە وزبەك حالقىنىڭ قاتىناستارىنىڭ نەگىزى بولاتىنىن اتاپ ءوتتى. "بۇگىن تاڭەرتەڭ قازاقستان-وزبەكستان شەكاراسىنان ءبىزدىڭ "دوستىق كەرۋەنى" ءوتتى. ءبىز دە قازاقستان كاسىپوداقتار فەدەراتسياسى سياقتى باۋىرلاس حالىقتىڭ باسىنا تۇسكەن وسى قيىندىقتا بەيتاراپ قالا المادىق جانە ءبىزدىڭ قازاقستاندىق ارىپتەستەردىڭ زارداپ شەككەندەرگە قايىرىمدىلىق كومەك كورسەتۋ اكتسياسىنا قوسىلدىق", دەدى وزبەكستاندىق دەلەگاتسيانىڭ باسشىسى. وزبەكستان كاسىپوداقتارى جالپى سوماسى 16 ميلليون تەڭگە كولەمىندە گۋمانيتارلىق كومەك الىپ كەلگەن. ونىڭ ىشىندە العاشقى قاجەتتىلىك تاۋارلارى, قۇرىلىس ماتەريالدارى, توسەك-ورىن جابدىقتارى مەن ازىق-ت ۇلىكتەر بار. ماقتاارال اۋدانىنىڭ تۇرعىندارى ەكى ەل كاسىپوداقتارىنا وسى باستامالارى مەن اۋداننىڭ ءومىرىن قالپىنا كەلتىرۋگە سىڭىرگەن ەلەۋلى ۇلەستەرى ءۇشىن ءوز العىستارىن ءبىلدىردى.
