ماسەلەن, كەنتاۋ قالاسىنا بەكىتىلگەن №7-سەكتور قالادا سپورتتىق قۇرال-جابدىق پەن بالالار ويىن الاڭشاسىن ورناتقان. قالا كوشەلەرىن اباتتاندىرۋدا اياقجول توسەۋ, ورىندىقتار مەن قوقىس جاشىگىن, جارىقتاندىرۋ باعانالارىن ورناتۋ, جاسىل جەلەكپەن كومكەرۋ جۇمىستارى جۇرگىزىلدى. مۇنىمەن قوسا, وزدەرىنە بەكىتىلگەن ايماقتا اسفالت سالۋ جۇمىستارى الداعى اپتادا اياقتالادى. ال وبلىستىق قوعامدىق دەنساۋلىق باسقارماسىنا بەكىتىلگەن №29- سەكتور بويىنشا قالا كوشەلەرىندە ورىندىقتار مەن قوقىس جاشىكتەرى جانە 4 ايالداما ورناتىلدى. التى كوشەدە 200-گە جۋىق اعاش ەگىلگەن.
سونداي-اق تۇركىستان قالاسىندا 24 تۇرعىن ءۇيدىڭ قۇرىلىسى قارقىندى جۇرگىزىلۋدە. باسپانالار جوسپار بويىنشا جىل سوڭىنا دەيىن تاپسىرىلادى. كوپپاتەرلى تۇرعىن ءۇيدىڭ ساپاسىن تەكسەرىپ شىققان وبلىس اكىمى ومىرزاق شوكەەۆ ساقتىق شارالارىن كۇشەيتە وتىرىپ, جۇمىستى توقتاتپاۋدى تاپسىردى. قۇرىلىسى قىزۋ نىسانداردىڭ ءبىرى – 7000 ادامعا لايىقتالعان ستاديون. سپورتتىق نىساننىڭ دەمەۋشىسى – "سامۇرىق قازىنا" ۇلتتىق ءال-اۋقات قورى. مۇندا 2 سپورتزال, تابيعي فۋتبول الاڭى, اكىمشىلىك بولمەلەر بار. تۇركىستان قالاسىنىڭ اجارىن ارتتىرعان "پاراسات" ساياباعى دا ەرەكشە كەيىپكە ەنىپ كەلەدى. مۇندا قايتا جاڭارتۋ جۇمىستارى اياسىندا جاساندى كول مەن كوپىرلەر جانە 420 مەتر تاس ارىق كەلەسى ايدىڭ سوڭىندا تولىعىمەن اياقتالماق. ناتيجەسىندە ساياباق سۋمەن قامتىلىپ, ول قايتادان "ارىس-تۇركىستان" كانالىنا جىبەرىلەدى. ال تۇركىستان-كەنتاۋ باعىتىنداعى جولدىڭ ەكى شەتىندەگى ارىقتىڭ ءبىر بولىگى "پاراساتتى" سۋمەن قامتىسا, ەكىنشى بولىگى جول بويىنداعى جاسىل جەلەكتى سۋعارادى. وبلىس اكىمى ءتيىستى باسقارما باسشىلارىنا اباتتاندىرۋ مەن كوگالداندىرۋ جۇمىستارىن بەكىتىلگەن كەستەگە ساي اياقتاۋدى تاپسىرىپ, قۇرىلىستىڭ ساپاسى قاتاڭ باقىلاۋدا ەكەنىن ەسكەرتتى.
تۇركىستان وبلىسى
