اۋىل شارۋاشىلىعى باسقارماسىنىڭ باسشىسى نۇربەك بادىراقوۆتىڭ مالىمدەۋىنشە, بيىلعى 5 ايدىڭ قورىتىندىسى بويىنشا وڭىردەگى اۋىل شارۋاشىلىعىنىڭ جالپى ءونىمى 140 ملرد تەڭگە بولىپ, رەسپۋبليكاداعى ۇلەسى 15%-عا جەتكەن.
"وسىلايشا رەسپۋبليكا بويىنشا ەكىنشى ورىندى يەمدەندىك. جىل سوڭىنا دەيىن اۋىل شارۋاشىلىعى ءونىمى وتكەن جىلدان 77 ملرد تەڭگەگە ارتىپ, 706 ملرد تەڭگە كولەمىندە بولادى دەپ مەجەلەنگەن. بۇگىنگى كۇنگە ءونىم جيناۋ ناۋقانى باستالىپ, 2,2 مىڭ توننا باقشا, 245,4 مىڭ توننا كوكونىس, 22,3 مىڭ توننا كارتوپ جينالدى. ودان بولەك 727,2 مىڭ توننا مال ازىعى دايىندالدى", دەدى نۇربەك باقتىباي ۇلى.
وبلىس بويىنشا ماساقتى داقىلداردان 477,4 مىڭ توننا, داندىك جۇگەرىدەن - 202,8 مىڭ, ماقسارىدان - 74,4 مىڭ, ماقتادان - 334,8 مىڭ, كوكونىس, باقشا, كارتوپتان 2 ملن 760 مىڭ توننا ءونىم الۋ جوسپارلانعان.
سونىمەن قاتار, وڭىردە تامشىلاتىپ سۋعارۋ ءادىسى قوسىمشا 1,7 مىڭ گەكتارعا ۇلعايىپ, جالپى كولەمى 19,3 مىڭ گەكتارعا جەتتى. ال جىلىجايلار 55,02 گەكتارعا سالىنىپ, جالپى كولەمى 1 168 گەكتار بولعان. بۇگىنگى كۇنگە, جىلىجايلاردا جالپى 88,2 مىڭ توننا ءونىم ءوندىرىلدى.
تۇركىستان وبلىسى
