كوللاجدى جاساعان امانگەلدى قياس, «EQ»
ورىس وقىرماندارىنىڭ تالعامى فانتاستيكا مەن فەنتەزي جانرلارىنا اۋعانى – بۇگىندە قاتتى قارقىن الىپ جاتقانىن بايقادىق. ءتىپتى بۇل تاقىرىپتاعى شىعارمالاردى ونداعى ءار ءتورتىنشى ادام وقيدى. ال سينگاپۋردا بالالارعا ارنالعان اۋديوكىتاپتار ءجيى تىڭدالعان. بارشا اۋديوكىتاپتاردىڭ ىشىندە بالالار ادەبيەتىنىڭ وقىلۋى بۇعان دەيىن 15 پايىزدى قۇراسا, كارانتين ۋاقىتىندا 24 پايىزعا وسكەن.
شۆەتسيالىقتار قانداي كىتاپ وقۋدا دەسەڭىز, ولار دەتەكتيۆ پەن تريللەردەن باس الماي وتىر. 45 پايىز وقىرمان, سالىستىرمالى تۇردە, ۇلكەن كورسەتكىش. قىزىعى سول, مەكسيكادا بۇل جانردى 11 پايىز عانا وقىرمان تاڭداعان. ونداعى جۇرت دەتەكتيۆتى ەمەس, بەللەتريستيكا مەن پسيحولوگيالىق كىتاپتاردى وقىعاندى ءجون سانايدى.
بايقاۋىمىزشا, ءۇندىستان بارىنشا كونسەرۆاتيۆتى ەل ەكەن. ولار ءالى دە كلاسسيكانى وقۋدان جالىقپاپتى. بۇعان قوسا ماحاببات روماندارىن كوپ وقيتىن (16 پايىز) يسلانديا دا كوزگە ەرەك ءتۇستى. ستاتيستيكاعا سەنسەك, عاشىقتىق شىعارمالارعا قىزىعاتىن ەشبىر ەلدىڭ كورسەتكىشى يسلانديالىق وقىرمانداردان اسا الماعان.
شۆەدتىڭ Storytel اتتى اۋديوكىتاپحاناسى بار. ورىس تىلىندە كەڭ تارالعان باعدارلامانى قولدانۋشىلار سانى وتە كوپ. قازىرگى تاڭدا وسى اۋديوكىتاپحانا الاڭىندا دەتەكتيۆ پەن تريللەر ءبىرىنشى ورىندا تۇر. ودان كەيىن روماندار مەن بەللەتريستيكانى جۇرت ءجيى تىڭدايدى ەكەن. جانە ناق كارانتين كەزىندە بيوگرافيالار مەن ءوزىن ءوزى دامىتاتىن شىعارمالار دا سۇرانىسقا يە بولىپتى.
ءتۇرلى ۇلتتاردىڭ ءتىلى مەن تۇسىنىگىنە ءھام وقىرماندىق تالعامىنا قاراماستان, الەمدە ەلدىڭ ءبارى سۇيسىنە وقيتىن ءبىر اۆتور بار. گارري پوتتەردىڭ قيلى وقيعالارىن جازاتىن دجوان روۋلينگ قاي رەيتينگتە دە كوش باستاپ تۇر. ايتا كەتەيىك, جىل باسىندا گارري پوتتەردىڭ كىتابى «Steppe & WORLD Publishing» باسپاسىنان قازاق تىلىندە جارىق كورگەن بولاتىن. ساتىلىم جاعىنان بۇرىن-سوڭدى بولماعان رەكورد ورناتقان جەتى تومدىق شىعارمالار جيناعى بۇگىنگە دەيىن الەمنىڭ سەكسەننەن استام تىلىنە اۋدارىلىپ, 500 ملن دانامەن باسىلىپ شىعىپتى. ميلليونداعان بالانىڭ قولىنان تۇسپەگەن سول شىعارما قازاق وقىرماندارى اراسىندا دا كوپ وقىلىپ ءجۇر.
