ءتول ونەرىمىز ايتىس دەسە ىشكەن اسىن جەرگە قوياتىن جۇرتشىلىق جەكسەنبى كۇنى ەلوردانىڭ كونگرەسس-حولل سارايىن بەتكە الدى. «نۇر وتان» پارتياسىنىڭ قولداۋىمەن «جادىگەر» قوعامدىق قورىنىڭ ۇيىمداستىرۋىمەن وتكەن «كىل جۇيرىكتە كىم جۇيرىك؟» اتتى حالىقارالىق اقىندار ايتىسى ابىلاي حاننىڭ 300 جىلدىق مەرەيتويىنا ارنالىپ وتىر. سايدىڭ تاسىنداي ىرىكتەلگەن سەگىز اقىن بارىن سالعان بۇل سايىستى ءانشى نۇرلان ونەرباەۆ جۇرگىزدى.
ءتول ونەرىمىز ايتىس دەسە ىشكەن اسىن جەرگە قوياتىن جۇرتشىلىق جەكسەنبى كۇنى ەلوردانىڭ كونگرەسس-حولل سارايىن بەتكە الدى. «نۇر وتان» پارتياسىنىڭ قولداۋىمەن «جادىگەر» قوعامدىق قورىنىڭ ۇيىمداستىرۋىمەن وتكەن «كىل جۇيرىكتە كىم جۇيرىك؟» اتتى حالىقارالىق اقىندار ايتىسى ابىلاي حاننىڭ 300 جىلدىق مەرەيتويىنا ارنالىپ وتىر. سايدىڭ تاسىنداي ىرىكتەلگەن سەگىز اقىن بارىن سالعان بۇل سايىستى ءانشى نۇرلان ونەرباەۆ جۇرگىزدى.
الامان ايتىستى كىرىسپە سوزبەن اشقان «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەك اقىندارعا ساتتىلىك تىلەدى. «كەشە عانا كوكشەدە باستالعان ابىلاي حاننىڭ 300 جىلدىق تويىنا فراكتسيا دەپۋتاتتارىمەن بىرلەسە وتىرىپ قاتىسقان بولاتىنبىز. بۇگىنگى ايتىس بۇل تاريحي تويدىڭ جالعاسى دەپ بىلەمىز. ەلباسى نۇرسۇلتان نازارباەۆتىڭ جاقىندا جاريالانعان ماقالاسىندا ابىلاي حاننىڭ ورىندالماعان ءۇش ارمانى تۋرالى ايتقان ەدى. ەلباسىنىڭ ساليقالى ساياساتىمەن ەلىمىزدىڭ بىرلىگى مەن ىنتىماعىنىڭ ارقاسىندا بۇگىن ءبىز سول بابالارىمىز اڭساعان ارمانعا قول جەتكىزىپ وتىرمىز. «نۇر وتان» – حالىقتىڭ پارتياسى. ءبىزدىڭ نەگىزگى ماقساتىمىز ەلدىڭ مۇڭ-مۇقتاجىن ءبىلىپ, كەمشىلىكتەردى جاسىرماي تالقىلاپ, ونىڭ وڭتايلى شەشىمىن تاۋىپ, مەملەكەتتىك ورگاندارمەن بىرلەسە ورىنداۋ. بۇل رەتتە ايتىس پەن پارتيانىڭ تابيعاتى ءبىر. ويتكەنى, ايتىسكەر اقىندار دا حالىقتىڭ ءسوزىن بيلىككە ادال جەتكىزۋشى. سوندىقتان دا بۇگىنگى ايتىس ناعىز حالىق دەموكراتياسىنىڭ ايقىن كورىنىسى دەپ بىلەمىز», – دەدى ول.
اقىنداردىڭ العاشقى جۇبىن ءبىرجان بايتۋوۆ پەن مۇحتار نيازوۆ باستادى. قوس اقىننىڭ تولعامدى ويلارى مەن سالماقتى پىكىرلەرىن جيىلعان جۇرت تامسانا تىڭدادى. ايبەك قاليەۆ پەن قىتايدان كەلگەن قانداسىمىز قاناتبەك ءزايتوللا ۇلىنىڭ ايتىسى دا وزىندىك سيپاتىمەن ەرەكشەلەندى. قاشاندا سابىرلى قالپىنان تانبايتىن ايبەكتىڭ وي ورامدارى كورەرمەننىڭ قولداۋىن تاۋىپ وتىرسا, قاناتبەكتىڭ دە جۇيرىكتەر قاتارىنان ەكەنىنە ەش كۇمان كەلتىرىلمەدى.
جاس اقىن جانداربەك بۇلعاقوۆ اينۇر تۇرسىنباەۆامەن شىققاندا بۇل جەكپە-جەك قالاي بولار ەكەن دەگەن ەدىك. الايدا, كۇشتىڭ تەڭ ەكەنى ءا دەگەننەن-اق بايقالىپ تۇردى. بۇلعاقتاعان بۇلعاقوۆىڭىز اينۇرعا الدىرمادى دەسە دە بولادى. اسىرەسە, كوپشىلىك جانداربەكتىڭ تاپقىرلىعىنا ءتانتى بولدى.
ساحنا تورىنە كوتەرىلگەن سوڭعى جۇپ – بالعىنبەك يماشەۆ پەن سارا توقتامىسوۆا كورەرمەنىن كۇلكىگە كومدى. بىرەسە جەزدە مەن بالدىز, بىرەسە كەلىن مەن قايناعا ايتىسقان ولار ازىلگە تولى ولەڭ جولدارىمەن ايتىس سۇيەر قاۋىمدى ءبىر سەرپىلتىپ تاستادى.
جوعارى دەڭگەيدە ۇيىمداستىرىلعان بۇل شارانىڭ اراسىندا جىر-تەرمەلەرگە دە كەزەك بەرىلمەي قالعان جوق. تالدىقورعاننان ارنايى كەلگەن العىسبەك دالەننىڭ جۇرەگىن جارىپ شىققان ءوز تەرمەسى بۇكىل زالدى باۋراسا, جاس جازبا اقىنداردىڭ دا ولەڭدەرى تىڭدالدى. وسى ايتىسقا بەلگىلى ايتىسكەر اقىن, مارقۇم ورازالى دوسبوسىنوۆتىڭ ۇلى نۇرسۇلتان مەن قىزى نۇرايشا قوناق بولىپ قاتىستى. نۇرسۇلتان اكەسىنە ارناعان ولەڭىن وقىدى. وعان ىزگى تىلەگىن بىلدىرگەن «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەك ايتىستان تۇسكەن 1 ميلليون تەڭگەنى كورەرمەندەر الدىندا سىيعا تارتتى.
سونىمەن, ەكىنشى اينالىمعا شىققان جانداربەك بۇلعاقوۆ, قاناتبەك ءزايتوللا ۇلى, اينۇر تۇرسىنباەۆا جانە بالعىنبەك يماشەۆ ەكرانداعى سۋرەتتى جىرلاۋ بويىنشا سايىسقا ءتۇستى.
قازىلار القاسىنىڭ شەشىمىمەن باس جۇلدە – 2 ميلليون تەڭگەنى اينۇر تۇرسىنباەۆا يەلەنسە, ءبىرىنشى تۇعىرعا جانداربەك بۇلعاقوۆ 1,5 ميلليون تەڭگەمەن جايعاستى. ال ەكىنشى ورىنعا بالعىنبەك يماشەۆ كوتەرىلدى. ونىڭ قورجىنىنا 1 ميلليون تەڭگە ءتۇستى. قىتايدان كەلگەن قانداسىمىز قاناتبەك ءزايتوللا ۇلى جۇلدەلى ۇشتىكتى 750 مىڭ تەڭگەلىك سەرتيفيكاتپەن قورىتىندىلادى.
وزگە اقىندار دا قۇرالاقان قالعان جوق. ولاردىڭ دا ارقايسىسىنا جارتى ميلليون تەڭگە ۇسىنىلدى. قازاقستان مۇسىلماندارى ءدىني باسقارماسىنىڭ ارنايى سىيلىعى ەكى ادامعا – مەككەگە قاجىلىق ساپارىنا جولداما سارا توقتامىسوۆاعا تاپسىرىلسا, «قازايتىس» سايتى ءوز تايىن بالعىنبەككە مىنگىزدى.
قازىلار القاسىنىڭ توراعاسى, پارلامەنت ءماجىلىسىنىڭ دەپۋتاتى, بەلگىلى جازۋشى الدان سمايىل قاتىسقان بارلىق اقىندارعا العىسىن بىلدىرە كەلە, ونەر ادامدارىنىڭ قانداي دا قۇرمەتكە لايىق ەكەندىگىن ايتتى.
ءابدىراحمان قىدىربەك,
«ەگەمەن قازاقستان».
استانا.
––––––––––––––––
سۋرەتتەردى تۇسىرگەن
ەرلان وماروۆ.
