نۇر-سۇلتان قالاسىنا گاز تارتۋ جۇمىستارى ەلباسى نۇرسۇلتان نازارباەۆتىڭ بەس الەۋمەتتىك باستاماسى اياسىندا جۇزەگە اسىرىلىپ جاتىر. ەلوردانى ودان ءارى دامىتۋ جونىندەگى كەڭەستە مەملەكەت باسشىسى قاسىم-جومارت توقاەۆ قالانى گازداندىرۋ پروتسەسىن نازاردا ۇستاۋدى تاپسىردى.
ەلوردادا گاز تاراتۋ جەلىلەرىنىڭ قۇرىلىسىن جۇرگىزۋ بويىنشا ءبىرىنشى كەزەڭدەگى جۇمىستار اتقارىلۋدا. بىرقاتار تۇرعىن الابىندا گاز قۇبىرلارى ۇيلەردىڭ ىرگەسىنە دەيىن تارتىلىپ قويعان. ەندى گازدىڭ ناقتى قاشاننان باستاپ بەرىلەتىنىن نۇر-سۇلتان قالاسى اكىمدىگى وتىن-ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆتان سۇراپ بىلگەن ەدىك.
– بۇگىنگى تاڭدا قالادا ەكى ۇلكەن گاز تاراتۋ اۆتوماتتاندىرىلعان ستانساسى بار. مۇنى «سارىارقا» ماگيسترالدى گاز قۇبىرى جوباسىنىڭ اياسىندا «قازترانسگاز» كومپانياسى سالعان. ىشكى تاراتۋ جەلىلەرىن سالۋ اكىمدىكتىڭ باقىلاۋىمەن ىسكە اسىرىلىپ جاتىر. «كوكتال-1», «كوكتال-2» جانە «اگروگورودوك» تۇرعىن ءۇي الاپتارى بويىنشا گاز جەلىلەرى تۇگەلىمەن تارتىلدى. قازىر سىناق جۇمىستارى جۇرگىزىلىپ جاتىر. سونىمەن قاتار بۇل اۋدانداردا گاز رەتتەگىش 4 ستانسا ورناتىلعان. جوسپار بويىنشا اتالعان تۇرعىن الاپتارىندا شامامەن 200 شاقىرىم گاز قۇبىرىن تارتۋ قاراستىرىلعان. قازىر ونىڭ 70-تەن اسا شاقىرىمى سالىندى. ەندى العاشقى گازدى شىلدە-تامىز ايلارىندا بەرۋدى جوسپارلاپ وتىرمىز. ياعني العاشقى ۇيلەرگە گاز بەرە باستايمىز. جالپى, استاناعا گاز كەلىپ تۇر, – دەدى ماقسات ەسماعۇلوۆ.
ونىڭ ايتۋىنشا, جوباعا سايكەس گاز تاراتۋ جەلىلەرى كوشە بويلاپ ءاربىر ءۇيدىڭ ىرگەسىنە دەيىن تارتىلادى. ال ونى ءۇيىنىڭ ىشىنە تۇرعىندار وزدەرى تارتقىزادى. بۇل ءۇشىن ءاربىر تۇرعىن «قازترانسگاز ايماق» اتتى ارنايى مەكەمەگە بارىپ, تەحنيكالىق شارتتار الۋى كەرەك. سول شارت بويىنشا نارىقتا ارنايى ليتسەنزياسى بار كومپانيالارمەن كەلىسىمشارتقا قول قويىپ, ىشكى تارتۋ جەلىلەرىن جۇرگىزۋى كەرەك. ءۇيدى گاز جەلىلەرىمەن جابدىقتاۋ شامامەن 100 مىڭ تەڭگەدەن باستالادى ەكەن.
ەگەر ۇيگە قوسا مونشا سياقتى باسقا دا نىساندارعا قۇبىر جۇرگىزەتىن بولسا, سايكەسىنشە ونىڭ قۇنى دا كوتەرىلەدى. سودان سوڭ گاز قۇبىرىنىڭ ۇيگە قانشالىقتى دۇرىس تارتىلعانىن «قازترانسگاز ايماق» تەكسەرىپ, قابىلدايدى. ءبارى وڭىنان بولسا, تۇتىنۋشىلارعا گاز بەرىلە باستايدى.
ءبىرىنشى كەزەكتە 9 كەشەن بويىنشا گازداندىرۋ جۇرگىزىلەدى. ونىڭ 1-2 كەشەنى بويىنشا جەو-1, جەو-2 جانە جەو-3 گازبەن قامتىلادى. قازىر بۇل نىساندارعا گاز جەلىلەرى تۇگەلىمەن تارتىلعان. ەندى سىناقتان ءساتتى وتسە, بۇلارعا دا شىلدە-تامىز ايلارىندا گاز جىبەرىلەدى. 3-6 كەشەندەرگە جوعارىدا كورسەتىلگەن «كوكتال-1», «كوكتال-2» جانە «اگروگورودوك» تۇرعىن ءۇي الاپتارى جاتادى. ال 7-9 كەشەندەر بويىنشا «وڭتۇستىك-شىعىس», «پرومىشلەننىي̆», «جەلەزنودوروجنىي̆» تۇرعىن الاپتارى گازبەن قامتىلادى. بۇل قاتاردا بيىلعى جىلىتۋ ماۋسىمىنا دەيىن «پرومىشلەننىي̆» جانە «جەلەزنودوروجنىي̆» تۇرعىن الاپتارىنداعى جۇمىستى تۇگەل اياقتاۋ جوسپاردا تۇر. «وڭتۇستىك-شىعىس» اۋدانىنا گاز تارتۋ كەلەسى جىلى اياقتالادى. جالپى, ءبىرىنشى كەزەڭدەگى جۇمىس الداعى جىلى تۇگەل ورىندالۋى كەرەك.
ەكىنشى كەزەڭدە «ميچۋرينو», «ينتەرناتسيونالنىي», «كۇيگەنجار», «تەلمان», «پريگورودنىي», Garden Village جانە Family Village, ال ءۇشىنشى كەزەڭدە «يلينكا», «شۇبار», ء«وندىرىس» گازداندىرىلادى. بۇل جوبانى ىسكە اسىرۋ مەرزىمى 2020-2023 جىلداردى قامتيدى.
گاز تارتۋ جەلىلەرى قۇرىلىسىنىڭ بىرتىندەپ بىتە باستاعانى گازدىڭ وسى جازدان قالماي العاشقى ۇيلەرگە بەرىلەتىنىن بايقاتادى. ويتكەنى قالاعا گاز كەلىپ تۇر. وسىلايشا قالا كوك ءتۇتىننىڭ قۇرساۋىنان قۇتىلاتىن ءسات تە جاقىنداپ كەلەدى. ياعني زياندى قالدىقتار 6 ەسەگە, قاتتى زاتتار 40 مىڭ تونناعا دەيىن ازايىپ, ەلوردانىڭ تىنىسى اشىلا تۇسەدى.
