قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ جۋرناليستەرگە ءداستۇرلى بريفينگ وتكىزىپ, اپتانىڭ ماڭىزدى ءىس-شارالارىمەن تانىستىردى.
قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ جۋرناليستەرگە ءداستۇرلى بريفينگ وتكىزىپ, اپتانىڭ ماڭىزدى ءىس-شارالارىمەن تانىستىردى.
اڭگىمە وزەگىنە اينالعان ماسەلەلەردىڭ ءبىرى ەلىمىزدىڭ مۇناي-گاز سەكتورى بولدى. بۇل ورايدا ا.ابيبۋللاەۆ: «قازاقستاننىڭ ەنەرگەتيكالىق كەشەنى – ۇلتتىق ەكونوميكانىڭ قوزعاۋشى كۇشى, سوندىقتان ءبىزدىڭ مەملەكەت مۇناي-گاز سەكتورىنىڭ كەشەندى دامۋىنا باستى نازار بولۋدە», دەي كەلە, قازاقستان ەنەرگەتيكالىق قاۋىپسىزدىكتى قامتاماسىز ەتە وتىرىپ, مۇناي-حيميا سالاسىنا ينۆەستيتسيالار مەن جاڭا يندۋستريالىق-يننوۆاتسيالىق تەحنولوگيالاردى تارتۋعا بارىنشا مۇددەلىلىك تانىتىپ وتىرعانىن جەتكىزدى. ءبىر اتاپ وتەرلىگى, 8-9 قازان كۇندەرى استانادا وتەتىن KAZENERGY VIII ەۋرازيالىق فورۋمى اياسىندا ەلدىڭ زاماناۋي ەنەرگەتيكالىق ساياساتى, مۇناي-گاز سالاسىنداعى الەمدىك ۇدەرىستەر مەن كوپتەگەن باسقا دا وزەكتى ماسەلەلەر تالقى تارازىسىنا سالىنادى ەكەن.
رەسمي وكىل بريفينگ بارىسىندا باسقا دا ماڭىزدى ءىس-شارالار جايىندا بايانداپ بەردى. ماسەلەن, ول 11 قازاندا قازاقستان پارلامەنتى قوس پالاتاسى دەپۋتاتتارىنىڭ, پرەزيدەنت اكىمشىلىگى, جوعارعى سوت, باس پروكۋراتۋرا, ادىلەت جانە ىشكى ىستەر مينيسترلىكتەرى مەن ۇكىمەتتىك ەمەس ۇيىمدار وكىلدەرىنىڭ, سونىمەن قاتار, قىلمىستىق كودەكس سالاسىنداعى ساراپشىلاردىڭ قاتىسۋىمەن «قىلمىستىق قۇقىق پەن پروتسەستىڭ كونستيتۋتسيالىق-قۇقىقتىق پروبلەمالارى» تاقىرىبىنا ارنالعان كونفەرەنتسيا ۇيىمداستىرىلىپ, وندا پارلامەنت قاراۋىنا جولدانعان قىلمىستىق جانە قىلمىستىق-پروتسەسسۋالدىق كودەكستەردىڭ جاڭا وقىلىمى اياسىنداعى وزەكتى ماسەلەلەر تالقىلاناتىنىن ايتتى. ال 10-12 قازان كۇندەرى العاش رەت قازاقستان مەن ورتالىق ازيادا «ExpoGroup» كومپانياسى ۇيىمداستىرىپ وتىرعان «Astana International Auto Salon - 2013» تۇڭعىش حالىقارالىق اۆتوكولىك كورمەسى وتپەك كورىنەدى. بۇل كورمەنىڭ باستى ماقساتى – ءتيىمدى ءارى زاماناۋي جۇمىس ورىندارى مەن جوعارى قوسىمشا قۇندى وندىرىستەردى قۇرۋ جانە وتاندىق اۆتوونەركاسىپتى دامىتۋعا ينۆەستيتسيالار مەن جاڭا تەحنولوگيالاردى تارتۋ.
رەسمي وكىلدەن كەيىن ءسوز العان قورشاعان ورتانى قورعاۋ ءمينيسترى نۇرلان قاپپاروۆ ءوز كەزەگىندە اعىمداعى جىلدىڭ مامىر ايىندا قابىلدانعان «جاسىل ەكونوميكا» باعدارلاماسىمەن تانىستىردى. مينيستر بۇل باعدارلامانىڭ «جاسىل تەحنولوگيا», سونداي-اق, «جاسىل ەكونوميكا» جانە «جاسىل دامۋ» ۇستانىمدارىن قولدانۋ ءجونىندەگى تاجىريبەلەر جونىندە بايانداپ بەردى.
«جاسىل ەكونوميكانىڭ» ءبىر كەزەڭىنە ورتالىق ازيا ەلدەرى, وندا دا تمد ەلدەرى عانا ەمەس, سونىمەن قاتار, موڭعوليا, اۋعانستان جانە ەۋروپا كەڭىستىگىندەگى باسقا دا ەلدەر قاتىسادى. «جاسىل ەكونوميكا» ۇستانىمى ءالى جاندانا قويماعان پوستكەڭەستىك كەڭىستىك ەلدەرى «جاسىل كوپىر» باعدارلاماسىنىڭ ارقاسىندا «جاسىل دامۋعا» قاراي ءبىرىنشى قادام جاسايدى. ءبىزدىڭ ەكوجۇيەمىز, ترانسشەكارالىق وزەندەرىمىز, ازىق-ت ۇلىك قاۋىپسىزدىگى, ەنەرگەتيكا ماسەلەلەرىمىز ورتاق. سوندىقتان دا «جاسىل كوپىر» باعدارلاماسى بولاشاقتا وڭىرىمىزدەگى وسى ماسەلەلەردىڭ ءبارىن شەشۋى ءتيىس. ءساتتى ىسكە اسقان جاعدايدا, ماسەلەن, 10-20 جىلدان كەيىن ول ودان ءارى جاھاندىق دەڭگەيگە دەيىن كوتەرىلۋى مۇمكىن», دەدى ن.قاپپاروۆ بۇل ورايدا.
ۆەدومستۆو باسشىسى, سونىمەن قاتار, قورشاعان ورتانى قورعاۋ مينيسترلىگىنىڭ «استانا ەكسپو-2017» ۇلتتىق كومپانياسىمەن بىرلەسىپ, حالىقارالىق مامانداندىرىلعان كورمەنى وتكىزۋدىڭ تۇجىرىمداما جوباسىن ازىرلەگەنىن, قازىرگى ۋاقىتتا جوبانىڭ ۇزدىك ەسكيز-ديزاينى ساۋلەت كەشەنىنىڭ قورىتىندىلارى شىعارىلعانىن اتاپ ءوتتى. ونىڭ ايتۋىنشا, بۇل جوباعا 22 مەملەكەتتەن 49 كومپانيا, ونىڭ ىشىندە قازاقستاننان 20 كومپانيا قاتىسىپتى.
بۇعان قوسا, ەكسپو اۋماعىن كورمەدەن كەيىن پايدالانۋ بويىنشا جۇمىس شتابى كۇرىلىپ, تىركەۋ دوسەسى تاراۋىنىڭ جوباسى ازىرلەنگەن ەكەن. ونىڭ نەگىزىندە كورمە بويىنشا نەگىزگى ءىس-شارالار بەلگىلەنگەن. بۇل رەتتە, «جاسىل كوپىر» سەرىكتەستىك باعدارلاماسىنىڭ حالىقارالىق قولداۋعا يە بولعانىن, 2012 جىلى ريو-دە-جانەيرودا وتكەن بىرىككەن ۇلتتار ۇيىمىنىڭ ورنىقتى دامۋ جونىندەگى كونفەرەنتسياسىنىڭ قورىتىندى قۇجاتىنا ەنگەنىن دە ايتا كەتكەن ءجون.
«ءبىز ءبىر جىل بويى تۇجىرىمدامانى ازىرلەدىك جانە اتقارىلاتىن جۇمىستىڭ بارىسىن تۇجىرىمدادىق. 30 قىركۇيەكتە وتكىزىلگەن كونفەرەنتسيا وسىناۋ باعدارلاماعا باستاما بولدى. حارتياعا قوسىلعان سەگىز ەلدىڭ قاتارىندا گەرمانيا, رەسەي, قىرعىزستان جانە موڭعوليا بار. باعدارلاماعا باسقا دا ەلدەردى تارتۋ جۇمىسىن جالعاستىرا بەرمەكپىز», – دەدى ۆەدومستۆو باسشىسى.
ءلايلا ەدىلقىزى,
«ەگەمەن قازاقستان».
