بۇگىندە «جاسىل ەكونوميكاعا» كوشۋ, ەنەرگيالىق تيىمدىلىكتى كوتەرۋ, جەل, سۋ, كۇن ەنەرگيالارى ارقىلى تازا ەكولوگيالىق قۋات كوزدەرىن الۋعا قول جەتكىزۋ وزەكتى ماسەلەلەردىڭ ءبىرى بولىپ وتىرعاندىعى بەلگىلى. بۇل ءۇشىن مۇمكىندىك ەلىمىزدىڭ بارلىق وڭىرلەرىندە بار. ونى ۇتىمدى پايدالانىپ, جوعارى تەحنولوگيالىق, يننوۆاتسيالىق جوبالاردى وندىرىسكە ەنگىزۋدى جيىلەتىپ, وسى باعىتتاعى قادامدى تەزدەتۋ ماقساتىندا اتقارىلۋداعى ءىس-شارالار كۇننەن-كۇنگە شيراتىلىپ تا كەلەدى. سونىڭ جارقىن كورىنىسى قاراعاندى وڭىرىنەن بايقالادى. قورشاعان ورتانى قورعاۋ مينيسترلىگىنىڭ بىرىككەن ۇلتتار ۇيىمىنىڭ دامۋ باعدارلاماسىمەن (بۇۇدب) سەرىكتەستىكتە وتكىزگەن ايماقتىق سەمينارى وسىعان بايلانىستى بولدى.
بۇگىندە «جاسىل ەكونوميكاعا» كوشۋ, ەنەرگيالىق تيىمدىلىكتى كوتەرۋ, جەل, سۋ, كۇن ەنەرگيالارى ارقىلى تازا ەكولوگيالىق قۋات كوزدەرىن الۋعا قول جەتكىزۋ وزەكتى ماسەلەلەردىڭ ءبىرى بولىپ وتىرعاندىعى بەلگىلى. بۇل ءۇشىن مۇمكىندىك ەلىمىزدىڭ بارلىق وڭىرلەرىندە بار. ونى ۇتىمدى پايدالانىپ, جوعارى تەحنولوگيالىق, يننوۆاتسيالىق جوبالاردى وندىرىسكە ەنگىزۋدى جيىلەتىپ, وسى باعىتتاعى قادامدى تەزدەتۋ ماقساتىندا اتقارىلۋداعى ءىس-شارالار كۇننەن-كۇنگە شيراتىلىپ تا كەلەدى. سونىڭ جارقىن كورىنىسى قاراعاندى وڭىرىنەن بايقالادى. قورشاعان ورتانى قورعاۋ مينيسترلىگىنىڭ بىرىككەن ۇلتتار ۇيىمىنىڭ دامۋ باعدارلاماسىمەن (بۇۇدب) سەرىكتەستىكتە وتكىزگەن ايماقتىق سەمينارى وسىعان بايلانىستى بولدى.
وعان قاتىسۋشىلارعا ارنالىپ ۇيىمداستىرىلعان كورمەدە كورسەتىلگەندەي, وبلىستا تازا تەحنولوگيانى ەنگىزۋ بويىنشا نازار اۋدارارلىقتاي جاعىمدى جاڭالىقتار مەن تاجىريبەلەر از ەمەس. ماسەلەن, سۋدى 2-3 ەسە ۇنەمدەۋگە جاعداي جاسايتىن تامشىلاتىپ سۋارۋ تەحنولوگياسىن, قالدىقتاردى قاۋىپسىز وڭدەۋ, ەنەرگيا ۇنەمدەۋ, سونداي-اق, جەكە ينۆەستور دا سالا الاتىن, ال مەملەكەت بەلگىلى ءبىر مەرزىمگە ەلەكتر قۋاتىن كەپىلدى تۇردە ساتىپ الىپ, بەكىتىلگەن تاريفپەن قامتاماسىز ەتەتىن جەل ستانساسىن سالۋ سياقتى يننوۆاتسيالىق ىزدەنىستەر ۇيرەنەرلىك ىسكە اينالعان. سونىمەن بىرگە تۇرعىن ءۇي-كوممۋنالدىق شارۋاشىلىعى مەن قۇرىلىستا ەنەرگيا تيىمدىلىگىن كوتەرۋدەگى شارالار دا ناتيجەلى تابىس اكەلە باستاۋدا. وبلىس ورتالىعىنداعى نۇركەن ءابدىروۆ داڭعىلىنداعى تۇرعىن ۇيلەر بىرىنە بۇۇدب اياسىندا جەرگىلىكتى «ەرگونوميكا» كومپانياسىنىڭ اۆتوماتتاندىرىلعان جىلۋ جانە سۋ جىلىتۋ نىساندارىن ورناتۋ جۇمىستارى ارقاسىندا پاتەر يەلەرى جىلۋ ەنەرگياسى بويىنشا 22 پايىز قاراجات ۇنەمدەۋگە قول جەتكىزسە, ءاليحان ەرمەكوۆ كوشەسىندە سالىنعان جاڭا تاعى ءبىر ۇيگە بۇۇدب جانە عالامدىق ەكولوگيالىق قور جوباسىنىڭ قارجىسى ەسەبىنەن قۇرىلىستىڭ ەنەرگيالىق ستاندارتتاردى تالاپقا ساي پايدالانۋى, ياعني ءۇيدى جىلىتۋ جانە جىلۋدى رەكۋرپەراتسيالاۋ (كەرى قايتارۋ) جۇيەسى 30 پايىزعا دەيىن ۇنەمدىككە سەپتىگىن تيگىزدى.
قالالارمەن قاتار, اۋىلدىق جەرلەردە دە بۇعان دەيىن ەسكەرىلمەي كەلگەن رەزەرۆتەردى پايدالانا بىلۋگە بەلسەندى ارەكەت ءوسۋ ۇستىندە. بۇرىن دالاعا بوس كەتىپ جاتقانداي جەلدىڭ كۇشىن, كۇننىڭ قىزۋىن قولدانۋعا كوشكەن شەت اۋدانىنداعى «ازات» شارۋا قوجالىعىنىڭ جەتەكشىسى ءتىلەۋعابىل ەسەنبەكوۆتىڭ ءتاجىريبەسىن قولدانۋشىلار ۇلعايىپ وتىر.
ەلىمىزدىڭ «جاسىل ەكونوميكاعا» كوشۋ جونىندەگى تۇجىرىمداماسىنىڭ ماقساتتارى مەن مىندەتتەرى جان-جاقتى ءتۇسىندىرىلىپ, تالقىلانعان سەميناردا قورشاعان ورتانى قورعاۋ ۆيتسە-ءمينيسترى تالعات احسامبيەۆ, قازاقستان رەسپۋبليكاسىنداعى بۇۇدب تۇراقتى وكىلىنىڭ ورىنباسارى ەكاتەرينا پانكيلوۆا جانە باسقا قاتىسۋشىلار ءسوز سويلەپ, بۇل ماڭىزدى ماقساتتى ىسكە اسىرۋعا عىلىمي-زەرتتەۋ ورتالىقتارى عالىمدارى مەن ماماندارىن بەلسەندى تارتۋ قاجەتتىگىن, اتالعان جۇيەنى دامىتۋ ەلدىڭ ەكونوميكالىق جاعىنان عانا كۇشتى ەمەس, الەۋمەتتىك تە, ەكولوگيالىق جاعىنان دا الەۋەتتى بولۋىنا مۇمكىندىك بەرەتىنىن اتادى. ولار مۇنداي القالى باسقوسۋلاردىڭ ەنەرگيانىڭ جاڭارتىلعان كوزدەرىن دامىتۋعا, ونەركاسىپتىك قالدىقتاردى قايتا يگەرۋگە, ەكولوگيالىق جۇيەلەردى باسقارۋ ماسەلەلەرىندەگى حالىقارالىق ءۇردىستەردى قولدانۋعا, جەرگىلىكتى كومپانيالاردىڭ بەلسەندىلىگىن كۇشەيتۋگە ىقپالى مول بولارىن قولدادى.
ايقىن نەسىپباي,
«ەگەمەن قازاقستان».
قاراعاندى.
