تۇركىستان قالاسىنىڭ مامانداندىرىلعان حالىققا قىزمەت كورسەتۋ ورتالىعىندا وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى الماسحان تاستانبەكوۆ تۇرعىندارعا كولىكتەردى تىركەۋ بويىنشا تۇسىندىرمە جۇمىستارىن جۇرگىزدى. ودان بولەك ونلاين رەجيمدە, پوليتسيا دەپارتامەنتىنىڭ الەۋمەتتىك پاراقشالارىندا تىكەلەي ەفير ارقىلى جەلى قولدانۋشىلارىنىڭ دا سۇراقتارىنا ناقتى جاۋاپتار بەردى.
"تىركەۋ بويىنشا جەرگىلىكتى حالىق تاراپىنان كوپ قويىلاتىن سۇراقتاردىڭ ءبىرى - تىركەپ بولعان سوڭ, تاعى دا باج سالىقتارى الىنادى ما؟ ارينە, جوق. تەك ءبىر رەت تىركەسەڭىز بولدى. ول ءۇشىن ءۇش تولەم جاسالادى. تولەمنىڭ جالپى سوماسى 11 مىڭ 946 تەڭگەنى قۇرايدى. ارمەنيالىق كولىكتى 2020 جىلدىڭ 1 قىركۇيەگىنە دەيىن تىركەۋگە بولاتىنىن ەسكەرتە كەتەيىن. تىركەۋ ارمەنيا رەسپۋبليكاسىنىڭ ۋاكىلەتتى ورگانى بەرگەن تىركەۋ قۇجاتتارىندا يەسى رەتىندە كورسەتىلمەگەن تۇلعالارعا جۇزەگە اسىرىلمايدى. سونىمەن قاتار, بۇل كولىكتى وزگە ادامنىڭ اتىنا اۋدارا المايسىز. ارمەنيادان اكەلىنگەن كولىكتى تىركەۋ ەرەجەلەرىن ءتۇسىندىرۋ ءۇشىن مامانداندىرىلعان حالىققا قىزمەت كورسەتۋ ورتالىعىندا Call-ورتالىعى كۇن سايىن ساعات 09:00-دەن 19:00-گە جۇمىس ىستەيدى", دەيدى ا.تاستانبەكوۆ.
تۇركىستان وبلىسى
