ايماقتار • 12 ماۋسىم، 2020

قاراعاندى وبلىسىندا 1300 ۇكىمەتتىك ەمەس ۇيىم جۇمىس ىستەيدى

26 رەت كورسەتىلدى

جەرگىلىكتى Saryarqa تەلەارناسىنىڭ تىكەلەي ەفيرىندە وتكەن بريفينگ بارىسىندا قاراعاندى وبلىستىق ىشكى ساياسات باسقارماسىنىڭ باسشىسى ەرلان قۇسايىن وڭىردەگى سان-سالالى قوعامدىق-ساياسي ءومىردىڭ تىنىس-تىرلىگىنە كەڭىنەن شولۋ جاساپ، باق وكىلدەرىنىڭ ءتۇرلى سۇراقتارىنا دا تولىققاندى جاۋاپ بەردى، – دەپ حابارلايدى Egemen.kz.

“بيىلعى جىل ماڭىزدى داتالارعا تولى. بۇلاردىڭ قاتارىندا قازاقستان رەسپۋبليكاسىنىڭ كونستيتۋتسياسى مەن قازاقستان حالقى اسسامبلەياسىنىڭ 25 جىلدىعى، التىن وردانىڭ 750 جىلدىعى، ۇلى وتان سوعىسىنداعى جەڭىستىڭ 75 جىلدىعى، ءال-ءفارابيدىڭ 1150 جىلدىعى، اباي قۇنانباەۆتىڭ 175 جىلدىعى، نىعمەت نۇرماقوۆتىڭ 125 جىلدىعى سىندى مەرەيتويلار بار”، – دەپ اتاپ ءوتتى باسقارما باسشىسى.

البەتتە، وبلىستىڭ تىنىس-تىرشىلىگىنە كوروناۆيرۋس ىندەتىنىڭ وزگەرىستەر ەنگىزگەنى بەلگىلى. ماسەلەن، كوپتەگەن ءىس-شارالار، اتاپ ايتقاندا، چەللەندجدەر، دوڭگەلەك ۇستەلدەر، كونفەرەنتسيالار جانە باسقا دا تولىپ جاتقان كەزدەسۋلەر مەن تالقىلاۋلار قاشىقتىقتى ساقتاي وتىرىپ وتكىزىلدى. بۇلاردىڭ باسىم كوپشىلىگى ناۋرىز مەيرامىنا، قازاقستان حالقىنىڭ بىرلىگى كۇنىنە، جەڭىس كۇنىنە، ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە، مەملەكەتتىك رامىزدەر كۇنىنە ورايلاستىرىلعان ەدى. سونىمەن قاتار، ەرلان قۇسايىن اقپاراتتىق توپتار جۇمىسىنىڭ دا ونلاين-فورماتقا اۋىستىرىلعانىن ءمالىم ەتتى.

قازىرگى تاڭدا وبلىستا “رۋحاني جاڭعىرۋ” باعدارلاماسىن جۇزەگە اسىرۋعا ايرىقشا ءمان بەرىلگەن. العا قويىلعان مىندەتتەر دە ايقىن. مىسالى، 2020 جىلى جۇزەگە اسىرىلۋى ءتيىس جوبالاردىڭ جوسپارىنا 132 ءىرى ءىس-شارا ەنگىزىلگەن. ال، اۋقىمدى تۇردە الىنعان جوسپاردا 500-دەن استام ءتۇرلى مازمۇنداعى ءىس-شارالار قاراستىرىلىپتى. كۇن تارتىبىندە تۇرعان وسى شارۋالار تۋراسىندا ايتا كەلىپ، ەرلان قۇسايىن بيىل قولعا الىناتىن ۇلىتاۋ اۋدانىنداعى جوشى حان تاريحي كەشەنىنىڭ جاڭعىرتىلۋى، قاراعاندى قالاسىندا “قاسىم ءۇيىن” اشۋ سىندى بىرقاتار ىلكىمدى  جوبانىڭ ماڭىزدىلىعىن اتاپ ءوتتى.

سونداي-اق الداعى ۋاقىتتا عالىمدار مەن تاريحشىلاردىڭ، الەۋمەتتانۋشىلاردىڭ جانە ساياساتتانۋشىلاردىڭ قاتىسۋىمەن جۇرگىزىلەتىن زەرتتەۋلەرگە ەرەكشە كوڭىل بولىنەتىندىگى ايتىلدى. جالپى، ەرلان قۇسايىن اتالعان باعدارلامانىڭ بىرىكتىرۋشى رەتىندەگى رولىنە باسا نازار اۋدارىلۋى كەرەكتىگىن ەرەكشە اتاپ ءوتتى. بۇل باعىتتاعى بىرقاتار جوبالاردىڭ ونلاين رەجىمدە جۇزەگە اسىرىلاتىنى دا ايتىلدى.

ءبىر عانا قاراعاندى وبلىسىنىڭ وزىندە مىڭنان استام ۇكىمەتتىك ەمەس ۇيىم بار ەكەن. قازىرگى تاڭدا ولار وڭىردەگى قوعامدىق ومىرگە بەلسەندى تۇردە ارالاسىپ، جەرگىلىكتى اتقارۋشى ورگاندارمەن تىزە بىرىكتىرىپ، ماڭىزدى الەۋمەتتىك ماسەلەلەردى شەشۋگە، جاستاردى رۋحاني، ادامگەرشىلىك جانە ازاماتتىق قۇندىلىقتارعا باۋلۋعا ات سالىسۋدا.

“وبلىس بويىنشا 1300 ۇكىمەتتىك ەمەس ۇيىم تىركەلگەن. ولار قوعامدىق ءومىردىڭ ءتۇرلى سالالارىن قامتي وتىرىپ، 16 باعىت بويىنشا جۇمىس ىستەيدى. مەملەكەتتىك الەۋمەتتىك تاپسىرىس ارتقان. وبلىس اكىمدىگى جانىندا ۇەۇ-مەن ىنتىماقتاستىق جانە ءوزارا ءىس-قيمىل جونىندەگى كەڭەس جۇمىس ىستەيدى. وتىرىستاردىڭ بىرىندە ەرىكتىلەر قوزعالىسىن دامىتۋ ماسەلەلەرى تالقىلاندى. كەڭەس قۇرامى بيىل جاڭارتىلىپ، وعان ۇەۇ-نىڭ 25 باسشىسى ەندى»، - دەدى ەرلان قۇسايىن.

بريفينگ بارىسىندا ەتنومادەني بىرلەستىكتەردىڭ قوعامداعى ءرولى تۋرالى دا ساليقالى اڭگىمە قوزعالدى. بۇل باعىتا ەرلان قۇسايىن ىشكى تۇراقتىلىقتىڭ دامۋدىڭ باستى كەپىلى ەكەندىگىن ەرەكشە اتاپ ءوتتى.

باسقارما باسشىسى مەدياتسيانى دامىتۋعا جانە قوعامدىق مەدياتورلاردىڭ الەۋەتىن كۇشەيتۋگە دە كوپ كوڭىل بولىنەتىنىن حاباردار ەتتى. سونىمەن قاتار، ول جەرگىلىكتى بۇقارالىق اقپارات قۇرالدارىنىڭ قىزمەتىنە توقتالدى. بۇگىندە ولاردىڭ سانى 200-دەن اسقان. بۇعان قوسا، بۇگىنگى تاڭدا وبلىستا 19 اقپاراتتىق-ناسيحات توبى جۇيەلى تۇردە جۇمىس ىستەيدى.

ەرلان قۇسايىن جۋرناليستەر قاۋىمىنىڭ كوروناۆيرۋس پاندەمياسى تۋىنداتقان قيىنشىلىقتارعا  قاراماستان تاباندىلىقپەن جۇمىس ىستەپ،  ەپيدەميولوگيالىق جاعداي، قاۋىپسىزدىك شارالارى جانە مەملەكەتتىك قولداۋ تۋرالى اقپارات اعىنىن قولجەتىمدى ەتۋگە تىرىسقان ەڭبەگىنە لايىقتى باعا بەردى.

باسقارما باسشىسى سوڭعى ءۇش ايدىڭ وزىندە تىكەلەي ەفيردە وبلىس اكىمى مەن ونىڭ ورىنباسارلارى، وبلىستىڭ باس مەملەكەتتىك سانيتارلىق دارىگەرى جانە باسقارما باسشىلارى قاتىسقان 46 بريفينگ ۇيىمداستىرىلعان حاباردار ەتتى.

بريفينگتىڭ سوڭىندا ەرلان قۇسايىن وبلىس تۇرعىندارىن سانيتارلىق-كارانتيندىك ەرەجەلەردى قاتاڭ ساقتاپ، دارىگەرلەر مەن ەپيدەميولوگتاردىڭ اقىل-كەڭەسىنە ىنتامەن قۇلاق تۇرۋگە شاقىردى.

سوڭعى جاڭالىقتار

29 قازاندا سەنات وتىرىسى وتەدى

پارلامەنت • بۇگىن، 17:57

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

ۇقساس جاڭالىقتار