قازاقستان • 11 ماۋسىم، 2020

90 مەملەكەتتىك قىزمەتتى SMS-پارول ارقىلى الۋعا بولادى

40 رەت كورسەتىلدى

قازىرگى ۋاقىتتا ازاماتتار حالىققا قىزمەت كورسەتۋ ورتالىقتارىنا بارماي-اق،  90 مەملەكەتتىك قىزمەتتى SMS-پارول ارقىلى الا الادى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ حالىققا ەسەپ بەرۋ كەزدەسۋىندە ايتتى، - دەپ جازادى Egemen.kz

"قازىرگى ۋاقىتتا ازاماتتار  90 مەملەكەتتىك قىزمەتتى SMS-پارول ارقىلى الا الادى. بۇلار، نەگىزىنەن انىقتامالار مەن سەرۆيستەر. بىراق كومپانيا اشۋ، مەكەنجايعا تىركەلۋ، كولىكتى قايتا تىركەۋ سياقتى قىزمەتتەرگە ەتسق قاجەت. ەتسق-نى حقكو-نا بارماي، قاشىقتان الۋ تۋرالى ۇسىنىس وتە كوپ ايتىلدى. سول سەبەپتى ءبىز ەتسق-نى قاشىقتان الۋ مۇمكىندىگىن تەز ارادا جۇزەگە اسىردىق. پايدالانۋشىنى يدەنتيفيكاتسيالاۋ ۆيدەو ارقىلى جۇرگىزىلەدى. ناتيجەسىندە، تج كەزىندە 600 مىڭنان استام ەتسق بەرىلدى.  بۇل پروتسەسكە بۇگىنگى كۇنى تسون-نىڭ 800-دەن استام قىزمەتكەرى قاتىسۋدا"، دەدى مينيستر.

سونداي-اق ەتسق-نى قولدانۋ پروتسەسىن جەڭىلدەتۋ ءجيى ايتىلدى.  ويتكەنى، ارنايى باعدارلاما ورناتۋ كەيبىر ازاماتتارعا قيىن بولدى. قازىر وسى پروتسەستى جەڭىلدەتۋ ءۇشىن جۇمىس جۇرگىزىلىپ جاتىر.

"بىرىنشىدەن، قىزمەتتەردى QR-كود ارقىلى الۋ مۇمكىندىگىن ەنگىزەمىز. ازامات كومپيۋتەردە ءوتىنىمدى تولتىرىپ، ونى ءموبيلدى قوسىمشا ارقىلى سكانەرلەپ جىبەرە الادى. ەكىنشىدەن، ءبىز قازىر بۇلتتى ەتسق-نى ىسكە قوسۋمەن اينالىسىپ جاتىرمىز. قوسىمشا باعدارلاما ورناتپاي پايدالانۋعا بولادى. جازدىڭ سوڭىنا دەيىن ونى پيلوتتىق رەجيمدە ىسكە قوسامىز دەپ ويلايمىن"، دەدى اسقار جۇماعاليەۆ.

 

سوڭعى جاڭالىقتار

ۇقساس جاڭالىقتار