اقپارات جانە قوعامدىق دامۋ مينيسترلىگىنىڭ Facebook پاراقشاسىندا جۋرناليستەردىڭ بەيبىت جينالىستاردا قىزمەت ەتۋ قاعيدالارى تالقىلاندى. ونلاين-كەزدەسۋ بارىسىندا باق باسشىلارى بەيبىت جيىنعا قاتىساتىن جۋرناليستەردىڭ قۇقىعىن قورعاپ, جۇمىسىن جۇرگىزۋگە قاتىستى بىرقاتار ۇسىنىستى ورتاعا سالدى.
«بۇگىن شىنىمەن دە اشىق اڭگىمە بولعان سياقتى. بۇل - تالقىلاۋدىڭ باسى عانا. سەبەبى قاعيدالار ءالى بەكىتىلگەن جوق. ەڭ باستىسى – سىزدەردىڭ تالقىلاۋدان كەيىن ۇسىنىستارىڭىزدى ەسكەرە وتىرىپ, جوبانى تاعى دا ءبىر قارايمىز. سودان كەيىن ءنورماتيۆتى-قۇقىقتىق اكتىلەردىڭ اشىق پورتالىنا رەسمي تۇردە ورنالاستىرامىز. ءوز ۇسىنىستارىڭىزدى ەنگىزۋگە بولادى», - دەدى ايدا بالاەۆا باق باسشىلارىمەن ونلاين-كەزدەسۋ بارىسىندا.
ءمينيستردىڭ ايتۋىنشا, جۋرناليستەرگە ارنالعان قاعيدالاردى جەرگىلىكتى اتقارۋشى ورگاندار مەن قۇقىق قورعاۋ ورگاندارىنا ءتۇسىندىرۋ جۇمىستارى مەن ارنايى سەمينارلار جۇرگىزىلەدى.
«ەگەر ءبىر تاراپتان تۇسىنىسپەۋشىلىك بولعان جاعدايدا ءبىز ايتىپ وتىرعان قاعيداتتاردىڭ ءبارى دە جۇزەگە اسىرىلماي قالادى-اۋ دەگەن قاۋىپ بار. ءبىز وتە جاقسى ەرەجەلەردى جاساعانىمىزبەن ول ساپالى تۇردە ىسكە اسىپ جاتپاسا, البەتتە, بۇل قاعيداتتاردىڭ ءبارى دە قاعاز جۇزىندە عانا قالادى», - دەدى ول.
