Cۋ تاسقىنىنان زارداپ شەككەن ماقتاارال اۋدانىنىڭ تۇرعىندارى اراسىندا جاڭا باسپانانى وزدەرى سالىپ العىسى كەلەتىندەر از ەمەس. بۇل ورايدا ولارعا مەملەكەت تاراپىنان قۇرىلىسقا قاجەت قاراجات, ياعني 17 ملن تەڭگە بەرىلۋدە. ناقتىراق ايتساق, فيردوۋسيلىق 183 وتباسىنىڭ ارقايسىسىنا 17 ملن تەڭگەنىڭ 50 پايىزى ياعني, 8,5 ملن تەڭگەسى تولىق اۋدارىلعان. ياعني جەر بولىنگەن, قارجى بار, جاعداي جاسالعان, تۇرعىندارعا مامانىن تاۋىپ تا ىسكە كىرىسۋ عانا قالعان بولاتىن. وسى ورايدا ولارعا مامانداردىڭ كەڭەسى مەن تاجىريبەسىنىڭ كومەگى كوپتەپ تيگەنى انىق.
شەبەرلىك ساباق بارىسىندا تۇرعىندارعا ءۇيدىڭ ىرگەتاسىن قۇيۋ كەزىندە قانشا تسەمەنت قوسۋ كەرەكتىگى, كىرپىش قالاۋدا قانداي تالاپتاردى ساقتاۋ قاجەتتىگى جان-جاقتى ءتۇسىندىرىلدى. "بۇگىن جەرگىلىكتى پارتيا بەلسەندىلەر ۇيىمداستىرعان ماستەر-كلاسس بىزگە وتە قاجەت ەدى. ويتكەنى تۇرعىنداردىڭ كوبى قۇرىلىس جۇمىستارىنىڭ تالاپتارىن بىلە بەرمەيدى. وسىنى ەسكەرگەن جاناشىرلارعا العىس ايتامىز", دەيدى فيردوۋسي اۋىلىنىڭ تۇرعىنى مۇحامەدجان ميرزاحودجاەۆ.
توپان سۋدان زارداپ شەككەن فيردوۋسي اۋىلىندا 338 ءۇي بار بولسا, سونىڭ بۇگىندە 271-ءى تولىعىمەن بۇزىلعان. بۇگىندە 26 ءۇيدىڭ ىرگەتاسى قۇيىلىپ, 3 باسپانانىڭ قابىرعاسى قالانۋدا.
