• 06 قازان, 2013

ۆلاديمير كليچكو ايقىن باسىمدىقپەن جەڭدى

313 رەت

كورسەتىلدى

5 مين

وقۋ ءۇشىن

Egemen Qazaqstan

06-10-13-vladimir kliuchko-1

كەشە تۇندە, دالىرەگى, قازاننىڭ 5-ىنەن 6-نا قاراعان ءتۇنى, استانا ۋاقىتىمەن ساعات 1 مەن 3-ءتىڭ ارالىعىندا ماسكەۋدە ورىس الەكساندر پوۆەتكين مەن ۋكراين ۆلاديمير كليچكونىڭ اراسىندا اسا اۋىر سالماقتا الەم چەمپيوندىعىن ساراپقا سالعان جەكپە-جەك بولىپ ءوتتى. ءبىز بۇل تۋرالى سول ۋاقىتتا سايتتا رەپورتاج جۇرگىزگەنبىز. بارلىق 12 راۋند بويى باسىمدىلىق جانە 4 نوكداۋن. مىنە, ۆلاديمير كليچكونىڭ بۇل شايقاستاعى باسىمدىلىعى وسىنداي بولدى. قازىر رەسەيدىڭ بارلىق گازەتتەرى مەن اقپارات اگەنتتىكتەرى وزدەرىنىڭ الەكساندر پوۆەتكيننىڭ وسىنشالىقتى مىقتى قارسىلاسقا 12 راۋند بويى توتەپ بەرگەنىن ماقتانىش ەتىپ, قايتا-قايتا ايتىپ جاتىر. ال وسى ۇرىستىڭ الدىندا ولار باسقاشا سايراپ ەدى. سول ساتتە ولاردىڭ ءبارى دە پوۆەتكيننىڭ جەڭەتىنىنە ەشقانداي كۇماندانباعان. ەندى ونىڭ نوكاۋتپەن ۇتىلىپ قالماعانىنىڭ ءوزىن ۇلكەن ەرلىككە بالاۋدا. مىنە, پىكىر دەگەن اياق استىنان قالاي وزگەرەدى! ءتىپتى ءدال قازىر عانا «ءبىرىنشى ارنادان» تورەشىلەر ادىلدىك كورسەتپەدى, دەپ تە مىڭگىرلەپ قويدى. شىندىعىندا اربيترلار كليچكوعا قيانات جاسادى. ەگەر ولار ادال بولسا, شايقاستى ۆلاديمير قارسىلاسىن 3 رەت نوكداۋنعا جىبەرگەن 7-راۋندتا توقتاتۋى ءتيىس ەدى. قانداي جەكپە-جەكتە دە ءبىر راۋند قانا ەمەس, جالپى ۇرىستىڭ وزىندە 3 نوكداۋننان كەيىن تەكەتىرەس توقتاتىلادى. ال ۋكراين بوكسشىسى 2-راۋندتاعى ءبىرىنشى نوكداۋنىن ەسەپتەگەندە, قارسىلاسىن 4 رەت ەسەڭگىرەتىپ تاستادى. ءبىر باسىلىم «الەكساندر پوۆەتكين پرويگرال, نو پوكازال ناستوياششي حاراكتەر» دەپ جايىلدى. ايتاتىنى جوق, وسى «عاسىر شايقاسىنىڭ» الدىنداعى دۇربەلەڭ وتە قاتتى بولدى. ونىڭ كوبىندە رەسەي باسىلىمدارى ءوز قابىلاندارىنىڭ جەڭەتىندەرىنە ەش ءشۇبا كەلتىرمەدى. بۇل اجيوتاج ۇرىستىڭ باسىندا دا بايقالدى. ءبىرىنشى مينۋتتاردان پوۆەتكيننىڭ قورعانىستا وتىرمايتىنى ايقىندالدى. ول بىردەن العا ۇمتىلدى. ال كليچكو مۇنداي تاكتيكاعا دايىن بولىپ شىقتى. ۋكراين بوكسشىسى ءوزىنىڭ سۇيىكتى تاكتيكاسى – كلينچتى ءجيى قولدانا باستادى. بويى دا, قولى دا قىسقا پوۆەتكين العا كەلە بەرگەندە, وزىنە تىم جاقىن جىبەرىپ الىپ, بىردەن قاۋمالاپ قۇشاقتاي قويادى. ال الىستا جۇرگەنىندە جەكە-دارا سوققىلارىمەن قايتا-قايتا قارسىلاسىنىڭ كەكىلىن جەلپ-جەلپ ەتكىزەدى. مۇنداي ۇرىستا كىمنىڭ دجەبتى جاقسى قولداناتىنى انىق كورىنەدى. بۇل جاعىنان ۆلاديمير تاعى دا باسىم ءتۇسىپ جاتتى. ال پوۆەتكيننىڭ تاراپىنان تازا بارعان سوققىلار باسىندا ءتىپتى بولعان جوق. شايقاستىڭ ورتاسىنا قاراي الەكساندردىڭ شارشاعاننان قۇلاپ قالا جازداپ جۇرگەنى اڭعارىلدى. سول كەزدە ول ۋكراين بوكسشىسىنىڭ قارماعىنا ءۇش رەت ءتۇسىپ قالدى. وسى كەزدە تورەشىلەردىڭ جەڭىستى بىردەن ۆلاديميرگە بەرىپ جىبەرەتىن رەتى كەلدى. بىراق, ولاي بولمادى. بۇل جەردە پوۆەتكينگە ءبىر ريزا بولاتىنىڭ – ول ءاربىر اۋىر سوققىدان كەيىن ەسىن تەز جيىپ, تاعى دا ولەرمەندىكپەن العا ۇمتىلا بەردى. تاعى دا باسىنان جەكە سوققىلار الۋ ءۇشىن... تەك سوڭعى راۋندتا عانا الەكساندر ءۆلاديميردىڭ جۇيكەسىنە تيەتىن بىرەر سوققى جاساي الدى. الايدا, بۇل كەزدە كىمنىڭ جەڭگەنى 200 پايىزعا بەلگىلى بولىپ تۇر ەدى. شارشى الاڭداعى شايقاستى كورگەن كىرپىنىڭ ءوزى ۆلاديمير كليچكونىڭ الىپ تا, شالىپ تا جىعىپ تۇرعانىن بايقاعان بولار ەدى. قورىتىندى ايقىن: ۆلاديمير كليچكو ەش تالاسسىز تازا جەڭىسكە جەتتى. تورەشىلەردىڭ ۇشەۋى دە بۇكىل 12 راۋند بويىنا بارلىق جەڭىستى سونىڭ ەسەبىنە جازدى. بۇعان قوساتىنىمىز, جەڭىمپازدىڭ بۇل شايقاستا العان قالاماقىسى 17 ملن. دوللارعا جاقىندادى. ءيا, الەكساندر پوۆەتكيندى قايتپاي شايقاسقانى ءۇشىن ماقتاۋعا بولاتىن شىعار. ال جەڭىلگەنىن ءوزى دە بىردەن مويىندادى. سونىڭ سىڭايىندا قارىمتا ماتچ تۋرالى دا ايتىپ قالدى. الايدا, ونىڭ جاقىندا بولا قويمايتىن ءتۇرى بار. ءتىپتى, بولعان كۇندە دە ونىڭ پوۆەتكيننىڭ پايداسىنا شەشىلەتىنىنە ۇلكەن كۇمان بار. مىنا جەڭىلىستەن كەيىن ول كۇش جاعىنان دا, جۇيكە جاعىنان دا قالپىنا كەلىپ الۋى كەرەك. بۇل كۇنى «وليمپيسكي» رينگىندە تاعى بىرنەشە قوسىمشا جەكپە-جەكتەر بولىپ ءوتتى. الدىمەن رەسەيلىك گريگوري دروزد ەۋروپا چەمپيونى پولياك ماتەۋش ماستەرناكتى ەركىن ۇتتى. كەلەسى شايقاستا رەسەيلىك راحيم چاحكيەۆ رۋمىن يليەنى نوكاۋتقا ءتۇسىردى. ال وزبەكستاندىق رۋسلان چاگاەۆ سەرب يوۆا پۋداردى ۇپاي سانىمەن ۇتتى. رۋسلان يگىلىك.