بۇگىن, 5 قازان كۇنى سوچي-2014 قىسقى وليمپيالىق ويىندارىنىڭ الاۋى رەسمي تۇردە رەسەي دەلەگاتسياسى وكىلدەرىنە تابىس ەتىلدى. بۇل تۋرالى ريا «نوۆوستي» حابارلادى.
«2014 جىلعى XXII قىسقى وليمپيالىق ويىنداردىڭ الاۋى افينادا وتكەن سالتاناتتى راسىمدە «سوچي 2014» ۇيىمداستىرۋ كوميتەتى دەلەگاتسياسىنا رەسمي تۇردە تاپسىرىلدى», - دەلىنگەن حابارلامادا.
وتتى تاپسىرۋ ءراسىمى سەنبى كۇنى گرەكيا استاناسىنداعى «پاناتينايكوس» ستاديونىندا ءوتتى. سالتاناتقا رەسەيدىڭ اتىنان ۇكىمەت توراعاسىنىڭ ورىنباسارى دميتري كوزاك, «سوچي 2014» ۇيىمداستىرۋ كوميتەتىنىڭ پرەزيدەنتى دميتري چەرنىشەنكو, سونداي-اق سوچيدەگى وليمپيالىق ويىنداردىڭ ەلشىسى, كونكي سپورتىنان وليمپيادانىڭ التى دۇركىن چەمپيونى ليديا سكوبليكوۆا قاتىستى.
ەجەلگى وليمپيا تاۋىنىڭ ەتەگىندەگى قيراندىلار تۇبىندە 29 قىركۇيەك كۇنى تۇتانعان سوچي-2014 الاۋى وسى كەزگە دەيىن گرەكيا جەرى اۋماعىمەن التى كۇن بويى شەرۋ جاسادى. ول ەندى 6 قازان كۇنى ماسكەۋگە جەتكىزىلەدى.
بۇدان بۇرىن رەسەيدە وليمپيالىق الاۋ ەستافەتاسىن ۆلاديمير پۋتين اشاتىنى بەلگىلى بولعان.
رۋسلان يگىلىك.
