ۆەنگريانىڭ كاپوشۆاري قالاسىنداعى ۋنيۆەرسيتەتتىڭ ستۋدەنت قىزدارى وقۋ ورنىنداعى سەمينارلاردىڭ ءبىرىن قازان ايىنىڭ باسىنان ەنگىزىلگەن جاڭا درەسس-كودقا قارسىلىق رەتىندە ءىش كيىمدەرىمەن وتكىزدى. ال «جالاڭاش سەميناردىڭ» بەينەجازباسى جەرگىلىكتى Kapos Pont تەلەارناسىنان كورسەتىلدى. بۇل تۋرالى «لەنتا.رۋ» حابارلادى.
اكتسياعا بارلىعى 11 ستۋدەنت قىز قاتىستى. ولار اۋديتورياعا كىرىسىمەن, ءىش كيىمدەرىنە دەيىنگى كيىمدەرىن تۇگەل شەشىپ تاستاپ, الدارىن وقۋلىقتارمەن جاۋىپ, سەمينار وتكىزدى.
ماديار قىزدارىنىڭ مۇنداي اكتسيا وتكىزۋلەرىنە كاپوشۆاري ۋنيۆەرسيتەتى باسشىلىعىنىڭ جاڭا ءتارتىبى سەبەپ بولعان. جاڭا ميزامعا سايكەس, ستۋدەنتتەر مەن وقىتۋشىلارعا جوعارى وقۋ ورنىنىڭ اۋماعىنا قىسقا يۋبكامەن, شورتپەن, اسپا باۋلى نەمەسە جانىنداعى تىلىگى ۇزىن كويلەكپەن جانە سۇيرەتپە اياقكيىممەن كەلۋگە تىيىم سالىنعان. بۇدان بولەك, اشىق ماكياج بەن ءىرى اكسەسسۋار جاساۋعا, ءيىسى وتكىر ءاتىر سەبۋگە رۇقسات ەتىلمەگەن. ال ەر كىسىلەر, وسى تارتىپكە ساي, وقۋ ورنىنا تەك قارا قوشقىل ءتۇستى كاستوممەن كەلۋگە ءتيىس-ءتىن.
ۋنيۆەرسيتەت رەكتورى تەك جازدىڭ ىستىق كۇندەرىندە عانا جەڭىل كيىمدەرمەن جۇرۋگە مۇمكىندىك بەرىپتى. اكتسياعا قاتىسۋشى ستۋدەنتتەر ەرەجەنىڭ وسى تارماعىنا سۇيەنىپ, ءوز ۇندەرىن بىلدىرگەن كورىنەدى. ولار اۋديتوريالاردىڭ ىستىق ەكەنى سونداي, شەشىنىپ وتىرماسا بولمايتىنىن العا تارتقان.
ەندى ستۋدەنتتەر جاڭا اكتسيا دايىنداپ جاتقانعا ۇقسايدى. قىزدار ەندى ساباققا سۇيرەتپە اياقكيىممەن جانە جاعاجاي سۇلگىسىمەن كەلمەكشى.
مۇرات ايتقوجا.
