بۇل كۇندەرى ەكەۋىنىڭ دە داڭقى دۇركىرەپ تۇر. حورۆاتيادان اقش-قا قونىس اۋدارعان ەميگرانتتار وتباسىندا دۇنيەگە كەلگەن 37 جاستاعى ستيپە ميوچيچ 22 رەت وكتاگونعا شىعىپ, 19 رەت ۇستەمدىك تانىتتى. 15 قارسىلاسىن ەسىنەن تاندىردى. قازىرگى كەزدە ول UFC چەمپيونى.
41 جاستاعى دانيەل كورمە ەركىن كۇرەستىڭ حاس شەبەرى. كەزىندە ول پانامەريكا ويىندارىن ۇتىپ, الەم چەمپيوناتى مەن الەم كۋبوگى جولىنداعى جارىستاردا جۇلدەگەرلەر ساناتىنا قوسىلدى. 2004 جىلى افينى وليمپياداسىندا ءتورتىنشى ورىنعا تابان تىرەدى. بوز كىلەممەن قو ايتىسقاننان كەيىن اقش-تىڭ لۋيزيانا شتاتىنىڭ تۋماسى ارالاس جەكپە-جەككە دەن قويدى. بارلىعى 25 كەزدەسۋ وتكىزگەن ول 22 رەت جەڭىسكە جەتتى. 15 باسەكەنى مەرزىمىنەن بۇرىن اياقتادى. ەكى رەت ۇتىلىپ, تاعى ءبىر سايىستىڭ ناتيجەسى ەسەپكە الىنبادى.
وسىعان دەيىن وكتاگوندا قوس ساڭلاقتىڭ جولى ەكى مارتە قيىستى. 2018 جىلدىڭ 7 شىلدەسىندە كورمە قارسىلاسىن ءبىرىنشى راۋندتا-اق ۇرىپ جىقتى. 2019 جىلدىڭ 17 تامىزىندا ميوچيچ ەسە قايتاردى. ءتورتىنشى راۋندتا بىرنەشە اۋىر سوققى العان كورمە ەسىن جيا المادى.
