بۇل جونىندە سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ميراس قارعاباي مالىمدەدى. جۇرگىزىلگەن زەردەلەۋ جۇمىستارىنىڭ ناتيجەسىندە, مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى جوسپارلاعان مەملەكەتتىك ساتىپ الۋدا نەگىزسىز باعانى ءوسىرۋ فاكتىلەرى كورىنىس تاپقان.
قابىلدانعان ۇسىنىستاردىڭ قورىتىندىسىمەن مونيتورينگ ناتيجەسىندە بيۋدجەتتىڭ 371 839 952 تەڭگەسى ۇنەمدەلىپ, بىرقاتار مەكەمەلەرگە جوسپارلانعان سومانى مەدياندىق باعاعا كەلتىرىپ, قايتا ەنگىزۋ تاپسىرىلدى. ال, كەنتاۋ قالالىق تۇرعىن-ءۇي كوممۋنالدىق شارۋاشىلىق تۇرعىن ءۇي ينسپەكتسياسى ءبولىمى مەن «جاسىل كەنتاۋ» جشس-ى اراسىندا ساياباقتاردى, تالىمباقتى جانە جاسىل ايماقتى كۇتىپ ۇستاۋ ءۇشىن 32 366 600,40 تەڭگەگە 9 ساۋىردە كەلىسىمشارت تۇزىلگەن. الايدا, اتالعان مەكەمەلەر اراسىندا 3 كۇننەن سوڭ جالپى سوماسى 135 953 727,68 تەڭگە بولاتىن قوسىمشا كەلىسىم شارت جاسالعان. ءدال وسى قوسىمشا كەلىسىمشارتتىڭ نەگىزدىلىگى بويىنشا دەپارتامەنتپەن ءتيىستى جۇمىستار جۇرگىزىلىپ, ناتيجەسىندە بيۋدجەت قاراجاتىنىڭ 103 587 127 تەڭگەسى ۇنەمدەلدى.
دەپارتامەنتتىڭ ءباسپاسوز قىزمەتى حابارلاعانداي, سىبايلاس جەمقورلىققا قارسى ءىس-قيمىل اگەنتتىگى «اتامەكەن» ۇلتتىق كاسىپكەرلەر پالاتاسى بىرلەسىپ, «ساتىپ الۋدىڭ بىرىڭعاي تەرەزەسى» اقپاراتتىق-تالداۋ جۇيەسى ارقىلى تاۋارلار مەن قىزمەتتەردىڭ ورتاشا باعاسىن وزگە لوتتىڭ جاريالانعان باعاسىمەن نەمەسە نارىقتىق باعامەن سالىستىرۋعا مۇمكىندىك الىپ وتىر. بۇل پورتالدىڭ تاپسىرىس بەرۋشىلەر مەن بيۋدجەت اكىمشىلەرىنىڭ نەگىزسىز باعانى تومەندەتۋ نەمەسە كوتەرىپ قويۋ, جەتكىزۋ مەرزىمىن قىسقارتۋ, بەلگىلى ءبىر ءونىم بەرۋشىگە قولداۋ ءبىلدىرۋ ءتارىزدى سىبايلاس جەمقورلىق تاۋەكەلدەرى كورىنىستەرىن انىقتاۋ قابىلەتى اۆتوماتتاندىرىلعان.
تۇركىستان وبلىسى
