وزگە ۇلت جاستارى اراسىندا «اباي وقۋلارى» بايقاۋىن تاماشالاۋعا كەلگەن كورەرمەن ءى.وماروۆ اتىنداعى قازاق دراما تەاترىنىڭ زالىنا لىق تولدى. وبلىستا العاش رەت وتكىزىلىپ وتىرعان بۇل رەسپۋبليكالىق شارانى وبلىس اكىمى نۇرالى سادۋاقاسوۆ قۇتتىقتاۋ سوزىمەن اشىپ, قازاق ءتىلىن مەڭگەرىپ, اباي شىعارمالارىمەن سۋسىنداپ جۇرگەن وزگە ەتنوس جاستارىنا بايگەدەن وزا شابۋعا تىلەك ءبىلدىردى. بايقاۋعا قازاق تىلىندە كوركەمسوز وقۋ مەن ءان ايتۋدى قاتار مەڭگەرگەن 15 جانە 25 جاس ارالىعىنداعى جاستار قاتىستى. ولار قازاقستاننىڭ بارلىق وبلىسى مەن استانا, الماتى قالالارىنان كەلىپ باق سىنادى.
وزگە ۇلت جاستارى اراسىندا «اباي وقۋلارى» بايقاۋىن تاماشالاۋعا كەلگەن كورەرمەن ءى.وماروۆ اتىنداعى قازاق دراما تەاترىنىڭ زالىنا لىق تولدى. وبلىستا العاش رەت وتكىزىلىپ وتىرعان بۇل رەسپۋبليكالىق شارانى وبلىس اكىمى نۇرالى سادۋاقاسوۆ قۇتتىقتاۋ سوزىمەن اشىپ, قازاق ءتىلىن مەڭگەرىپ, اباي شىعارمالارىمەن سۋسىنداپ جۇرگەن وزگە ەتنوس جاستارىنا بايگەدەن وزا شابۋعا تىلەك ءبىلدىردى. بايقاۋعا قازاق تىلىندە كوركەمسوز وقۋ مەن ءان ايتۋدى قاتار مەڭگەرگەن 15 جانە 25 جاس ارالىعىنداعى جاستار قاتىستى. ولار قازاقستاننىڭ بارلىق وبلىسى مەن استانا, الماتى قالالارىنان كەلىپ باق سىنادى.
بايقاۋ شارتتارى بويىنشا ۇمىتكەرلەر ابايدىڭ ءبىلىم, عىلىم جانە ونەر 
تاقىرىپتارىنا ورىلگەن پوەزيالىق شىعارماسىن نەمەسە قاراسوزىنىڭ ءبىرىن مانەرلەپ, جاتقا وقىدى. ەكىنشى شىققاندا «اباي جولى» رومانىنان ءۇزىندىنى كوركەمدەپ جاتقا ايتتى. ال ءۇشىنشى رەت كورەرمەندەر ولاردىڭ ورىنداۋىندا ابايدىڭ سوزىنە جازىلعان ءبىر ءاندى تىڭدادى. قازاقشا ءتىلىنىڭ مۇكىسى جوق جاستار اباي شىعارمالارىن كوركەمدەپ وقىعاندا, كەمەڭگەر اقىننىڭ ولەڭى دە, قاراسوزى دە كوڭىلگە قۇيىلىپ جاتقانداي اسەر قالدىردى. شىركىن, اباي شىعارمالارى اركىمگە وسىلاي جەتىپ وتىرسا, اباي ولەڭ جازعان تىلدە سويلەۋگە اركىم-اق اسىق بولار ەدى-اۋ. نەگىزى, بايقاۋدىڭ تۇپكى ماقساتى دا وسى ەكەن.
– بۇرىن رەسپۋبليكالىق بايقاۋ تەك استانا قالاسىندا وتكىزىلەتىن. سوڭعى ەكى جىلدا وبلىستارعا دا شىعا باستادىق. وتكەن جىلى رەسپۋبليكالىق «اباي وقۋلارىنىڭ» اقتىق سايىستارى ورال قالاسىندا ءوتتى. بيىل قوستانايعا كەلۋدى ءجون كوردىك. بايقاۋ وتكىزىلگەن العاشقى جىلدارى وزگە ۇلت وكىلدەرى بالالارىنىڭ قازاقشا سويلەگەنىنە ءماز بولىپ جۇردىك. ودان كەيىنگى جىلدارى اباي ولەڭدەرىن ولاردىڭ ءتۇسىنىپ وقۋىن تالاپ ەتتىك. ەندى ولاردىڭ اباي شىعارمالارىن كورەرمەنگە ءوز دەڭگەيىندە جەتكىزگەنىنە كۋا بولىپ وتىرمىز, – دەيدى ءتىل كوميتەتىنىڭ تالداۋ جانە مونيتورينگ باسقارماسىنىڭ باسشىسى گۇلبادان تاۋەلقىزى.
قازىلار القاسى بايقاۋعا قاتىسۋشىلاردىڭ كوركەم ءماتىندى تالعاۋ جانە وقۋ شەبەرلىگىنە, قازاق ءتىلىنىڭ ورفوەپيالىق نورمالارىن ساقتاپ سويلەۋىنە, ءان ورىنداۋ ناقىشىنا, ساحنالىق ونەر كورسەتۋ مادەنيەتىنە جانە قازاقتىڭ ۇلتتىق كيىم ۇلگىسىنە نازار اۋدارىپ وتىردى. مىنە, وسى سىننىڭ بارلىعىنان سۇرىنبەي وتكەن اتىراۋ قالاسىنداعى گۋمانيتارلىق كوللەدجدىڭ ستۋدەنتى اسەمگۇل ستومما باس جۇلدەنى جەڭىپ الدى. تاراز قالاسىنان كەلگەن ۆيكتوريا مۇرتازينا ءبىرىنشى ورىندى يەلەندى. ول اباي اتىنداعى جامبىل گۋمانيتارلىق كوللەدجىندە وقيدى. ەكىنشى ورىندى استانا قالاسىنداعى گۋمانيتارلىق كوللەدج ستۋدەنتى اناستاسيا بوگدانوۆا الدى. ءۇشىنشى ورىن پاۆلودار مەملەكەتتىك پەداگوگيكا ينستيتۋتىنىڭ ءبىرىنشى كۋرس ستۋدەنتى ولگا بوريسوۆاعا بۇيىردى. قوستاناي وبلىسى اكىمىنىڭ ارنايى سىيلىعى يۆان كليمەنكوعا تابىستالدى.
ءنازيرا جارىمبەتوۆا,
«ەگەمەن قازاقستان».
قوستاناي.
سۋرەتتە: باس جۇلدەنى جەڭىپ العان اتىراۋلىق اسەمگۇل ستومما.
