شەتەلدەردە تۇراتىن قازاقتاردىڭ ونەر فەستيۆالى ءوتتى
بەيسەنبى-جۇما كۇندەرى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا شەتەل قازاقتارىنىڭ ەكى كۇندىك ونەر فەستيۆالى ۇيىمداستىرىلدى. مايەگى بۇزىلماعان ۇلتتىق فەستيۆالگە 16 مەملەكەتتەن 150-گە جۋىق سۋرەتشى, ءانشى-جىرشى مەن اقىن كەلدى.
شەتەلدەردە تۇراتىن قازاقتاردىڭ ونەر فەستيۆالى ءوتتى
بەيسەنبى-جۇما كۇندەرى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا شەتەل قازاقتارىنىڭ ەكى كۇندىك ونەر فەستيۆالى ۇيىمداستىرىلدى. مايەگى بۇزىلماعان ۇلتتىق فەستيۆالگە 16 مەملەكەتتەن 150-گە جۋىق سۋرەتشى, ءانشى-جىرشى مەن اقىن كەلدى.
بەرىسى رەسەي, مىنا جاعى قىتاي, نورۆەگيا, شۆەتسيا, يران, اۋعانستان, فرانتسيادان جەتكەن قازاقتار ىقىلاسىن ونەردىڭ بارلىق تىلىمەن توكتى. تۋعان جەر تۋرالى ۇلكەندەردىڭ ايتقان ەستەلىكتەرىن كوكىرەكتەرىنە ءتۇيىپ, جىراقتا جۇرسە دە ۇلتىن سۇيۋدەن ءبىر تانباعان قازاق جاستارى وسى ۇلى ساعىنىش پەن قۇرمەت ءتىلدىڭ دە, ءدىلدىڭ دە قورعاۋشىسى, ساقتاۋشىسى بولا الاتىندىعىن ونەر تۇرلەرىمەن پاش ەتتى.
مىسالى, بەينەلەۋ ونەرىنە بەت قويعان قۇبىلاي سۇرەر اتتى بوزبالا سوناۋ گەرمانيادا تۇرىپ جاتسا دا, بارلىق تۋىندىلارىنا وتانىن ارقاۋ ەتكەن.
– مەنىڭ شىعارماشىلىعىما اتامنىڭ ايتقان ەستەلىكتەرى مەن باستان وتكەرگەن وقيعالارى شابىت بەردى. قازىر سۋرەت ونەرىمەن اينالىسىپ ءجۇرمىن. ەرەسەك ءومىردى باستاعان كەزدە ءوزىمنىڭ ەلىمە – قازاقستانىما قايتامىن دەپ ويلايمىن. مەكتەپ بىتىرگەن سوڭ نازارباەۆ ۋنيۆەرسيتەتىنە ءتۇسۋدى ارمانداپ ءجۇرمىن, – دەيدى قۇبىلاي.
جالعىز سۋرەت كورمەسى عانا ەمەس, اقىندار ءمۇشايراسى, تەرمەشىلەر سايىسى سىرتتا جۇرگەن اعايىننىڭ ونەردەن كەندە ەمەس ەكەنىن كورسەتتى. قاراسوزدىڭ قاسيەتىن, ۇلت مادەنيەتىنىڭ مايەگىن ۇعىناتىن قاۋىم, قازاقتىڭ قۇنارلى ءتىلىن, سالت-ءداستۇرىن دارىپتەپ, ۇلت ونەرىن ۇلىقتادى.
وسىنداي حالىقارالىق ونەر فەستيۆالىن ۇيىمداستىرۋدا كوكسەگەن ماقساتىمىز – الەمنىڭ ءار تۇكپىرىندەگى قانداستاردى تابىستىرۋ, كونەدەن جەتكەن باي ءتىلىمىزدى ناسيحاتتاپ, ۇلت مادەنيەتىنىڭ كەرەگەسىن كەڭەيتۋ بولسا – ول ورىندالدى.
«كوك تۋدىڭ جەلبىرەگەنى» اتتى ونەر بايگەسىندە قازاقتىڭ قاراسوزى ۇلىقتالىپ, جازبا اقىندار ءمۇشايراسى, 30-عا جۋىق ونەرپاز قاتىسقان تەرمەشىلەر سايىسى ءوتتى.
بايان-ولگەي ايماقتىق قازاق قالامگەرلەر كەڭەسىنىڭ توراعاسى سۇراعان راحمەت ۇلى كونە تىلدىك قاسيەتتەر بارىنشا جاقسى ساقتالعان ۇلكەن-ۇلكەن ولكەلەر وزگە مەملەكەتتىڭ اۋماعىندا تىرشىلىك ەتىپ جاتقانىن ايتا كەلە:
– سول ۇلكەن ماسەلەنى تاريحي قارا شاڭىراقتىڭ التىن قازانىنا اكەلۋ ءبىزدىڭ ماقساتىمىز. سولاردىڭ ءبىرسىپىراسىن بۇگىن وسى ءبىزدىڭ قازاق اقىندارى سۇيرەپ جەتكىزدى دەپ ويلايمىن. بۇل ەندى قازاقتىڭ جەڭىسى, – دەيدى.
دوڭگەلەنگەن دۇنياداعى قازاقتىڭ باسىن قوسقان وسىناۋ ونەر مەرەكەسى.
سىرتتاعى اعايىندارىمىزبەن بارىس-كەلىستى جولعا قويۋ – بارىمىز بەن جوعىمىزدى, تاريحىمىزدى دا تۇگەندەۋگە جول اشاتىندىعىن كورسەتىپ ءوتتى.
ايناش ەسالي,
«ەگەمەن قازاقستان».
الماتى.
سۋرەتتى تۇسىرگەن نۇرتاي لاحان ۇلى.
