بۇرناعى كۇنى استانانىڭ «استانا-ارەنا» سپورت كەشەنىندە ەۋروپا ليگاسى توپتىق سايىسى 2-تۋرىندا قاراعاندىنىڭ «شاحتەرى» مەن ءيزرايلدىڭ حايفا قالاسىنىڭ «ماككابيى» كەزدەستى. تارتىستى وتكەن ماتچ 2:2 ەسەبىمەن تەڭ اياقتالدى.
بۇرناعى كۇنى استانانىڭ «استانا-ارەنا» سپورت كەشەنىندە ەۋروپا ليگاسى توپتىق سايىسى 2-تۋرىندا قاراعاندىنىڭ «شاحتەرى» مەن ءيزرايلدىڭ حايفا قالاسىنىڭ «ماككابيى» كەزدەستى. تارتىستى وتكەن ماتچ 2:2 ەسەبىمەن تەڭ اياقتالدى.
بۇل, ءبىر بىرىنە-ءبىرى ۇقساي بەرمەيتىن ەكى تايمنان قۇرالعان ويىن بولدى. ونىڭ بىرىنشىسىندە «شاحتەر» ايتارلىقتاي باسىمدىق كورسەتسە, ەكىنشىسىندە, «ماككابيدىڭ» دەگەنى ءجۇرىپ جاتتى. كەزدەسۋدىڭ ەسەپتەرى دە سوعان وراي وزگەرىپ تۇردى.
ال «شاحتەر» ماتچتى شىنىندا دا جامان باستاعان جوق. كەنشىلەر العاشقى 15 مينۋتقا دەيىن قارسىلاستارىن ءوز الاڭدارى ماڭىنا قىسىپ ۇستاپ, ءتىپتى, شابۋىل تۋرالى ويلاۋعا دا مۇرشا بەرمەدى. بىراق قاراعاندىلىقتار بۇل باسىمدىقتان ءتيىستى ناتيجە شىعارا المادى.
شامامەن, تايمنىڭ ورتاسىنا قاراي قوناقتار ەس جيىپ, الاڭ يەلەرى قاقپاسىنا قاراي العاشقى جورىقتارىن ۇيىمداستىردى. سول مەزەتتەردە ولار بىرەر رەت قاقپاعا شىن قاۋىپ تە ءتوندىرىپ ۇلگەردى. وسى تۇستا قوناقتار ءبىرىنشى رەت بۇرىشتاما بەرىپ كوردى. دەگەنمەن, بۇل الما-كەزەك شابۋىل ءساتى تىم ۇزاققا سوزىلعان جوق. سودان كەيىن «شاحتەر» قايتادان اتقا قوندى. ءبىزدىڭ جىگىتتەردىڭ ەندىگى قارقىندارى ءتىپتى كۇشەيە ءتۇستى. سونداي شابۋىلداردىڭ بىرىندە, 40-مينۋتتا كوماندا كاپيتانى اندرەي فينونچەنكو اۋەلەپ كەلگەن دوپتى باسپەن قاتتى ۇرىپ, ءدال ماڭدايشانىڭ استىن سولق ەتكىزدى. ارادا بار-جوعى 5 مينۋت وتكەننەن كەيىن قاراعاندىلىق ەۆگەني تاراسوۆ قاقپاشىمەن بەتپە-بەت كەلگەن ءساتىن كەرەمەت پايدالانىپ, تاعى ءبىر گولدى سوعىپ كەتتى.
وكىنىشكە قاراي, ەكىنشى تايم تۇتاستاي دەرلىك قوناقتاردىڭ ۇستەمدىگىمەن ءوتتى. يزرايل فۋتبولشىلارى بارعان سايىن ءبىزدىڭ قاقپاعا قاراي قاۋىپتى شابۋىلداردى كوبەيتە بەردى. بۇعان قوناقتار ساپىندا ويىنشىلار الماسقانى دا ايتارلىقتاي سەرپىن بەردى. ولاردىڭ ەسەپتى تەڭەستىرگەن ەكى ويىنشىسى دا سولار بولدى. الدىمەن ەزرا 54-مينۋتتا ءبىر دوپتىڭ قارىمتاسىن قايتارسا, 79-مينۋتتا تۋرگەمان تارازى باسىن تەڭەستىردى. بىراق مەيماندار بۇدان كەيىن دە تىنشۋ تاپپادى. قاراعاندىلىقتاردىڭ اراسىندا بىرەر رەت قارسى قاقپا ماڭىنا بارعانى بولماسا, قالعان ۋاقىتتاردىڭ بارىندە الاڭ يەلەرىنىڭ داربازاسى توبەسىندە داموكلدىڭ قىلىشى جالاڭداپ تۇرعانداي كورىندى. ويىن دا حايفالىقتاردىڭ وسىنداي جويقىن جورىقتارى ۇستىندە سوڭىنا جەتتى.
وسىلايشا, قازاقستان كومانداسى ەۋروپا ليگاسىنداعى ءوزىنىڭ ەڭ العاشقى ۇپايىن الدى. كەلەسى تۋردىڭ ويىندارى 24 قازان كۇنى وينالادى. بۇل كۇنى «شاحتەر» گوللانديانىڭ از (الكماار) كومانداسىمەن كەزدەسەدى. سودان كەيىن وسى ۇجىمنىڭ الاڭىنا بارىپ وينايدى.
رۋسلان يگىلىك.
(تۋرداعى قالعان ويىنداردىڭ ءناتيجەلەرىن egemen.kz, egemennews.kz سايتتارىنان كورە الاسىزدار).
