دەگەنمەن, جەتپىس جاستىڭ جەلكەنىن كەرگەن جاتتىقتىرۋشىعا سانيتارلىق-ەپيدەميولوگيالىق ءتارتىپتىڭ جاعدايىندا شىنايى قۇرمەتتىڭ يشاراتى جاسالدى. قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ مەرەيتوي يەسىنە "قۇرمەتتى سپورت قايراتكەرى" توسبەلگىسىن, سونداي-اق, مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ, وبلىستىق جانە قالالىق ءماسليحاتتاردىڭ, قاراعاندى قالاسى اكىمدىگىنىڭ, وبلىستىق دەنە شىنىقتىرۋ جانە سپورت باسقارماسىنىڭ "العىس حاتتارىن" تابىس ەتتى.
– مەن باقىتتىمىن! شىنىمدى ايتسام, بۇل جەتپىس جاس دەگەن قاس قاعىمداي ۋاقىتتا وتە شىقتى. مەن ءالى كۇنگە دەيىن قاتاردان قالماعانىما قۋانىشتىمىن! – دەپ تەبىرەندى مەرەيتوي يەسى.
جاسىنىڭ جەتپىسكە كەلگەنىنە قاراماستان, لەونيد راحىمجان ۇلى ءالى كۇنگە دەيىن بالالاردى جاتتىقتىرادى. قازىرگى ۋاقىتتا "بوكستان وبلىستىق مامانداندىرىلعان بالالار مەن جاسوسپىرىمدەردىڭ وليمپيالىق مەكتەبى" مەكەمەسىندە ەڭبەك ەتەتىن ارداگەر باپكەردىڭ قاراماعىندا قىرىققا جۋىق بالا بوكستىڭ قىر-سىرىن ۇيرەنىپ ءجۇر.
لەونيد تىلەۋباەۆ 44 جىل باپكەرلىك ەتكەن عۇمىرىندا تالاي چەمپيونداردىڭ تۇساۋىن كەسىپ, توماعاسىن سىپىرعان. ولاردىڭ قاتارىندا قاراعاندى بوكس مەكتەبىنىڭ داڭقىن كۇللى الەمگە پاش ەتكەن سەرىك نۇرقازوۆ, بەيبىت ەسجانوۆ, دۋلات بورانقۇلوۆ سىندى سايىپقىرانداردىڭ ەسىمىن ەرەكشە اتاۋعا بولادى.
