قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ءوزىنىڭ وڭتۇستىك امەريكا ەلدەرىنە ساپارىن اياقتادى. ساپاردىڭ سوڭعى مارەسى برازيليا بولدى. ول وندا ەلدىڭ استاناسى – برازيليا قالاسىندا رەسمي كەزدەسۋلەر وتكىزىپ, برازيليانىڭ يندۋستريالىق-قارجىلىق ورتالىعى بولىپ تابىلاتىن سان-پاۋلۋ قالاسىندا العاش رەت ۇيىمداستىرىلعان قازاقستان-برازيليا بيزنەس-فورۋمىنا قاتىستى, دەپ حابارلادى قر ءسىم-ءىنىڭ ءباسپاسوز قىزمەتى.
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ءوزىنىڭ وڭتۇستىك امەريكا ەلدەرىنە ساپارىن اياقتادى. ساپاردىڭ سوڭعى مارەسى برازيليا بولدى. ول وندا ەلدىڭ استاناسى – برازيليا قالاسىندا رەسمي كەزدەسۋلەر وتكىزىپ, برازيليانىڭ يندۋستريالىق-قارجىلىق ورتالىعى بولىپ تابىلاتىن سان-پاۋلۋ قالاسىندا العاش رەت ۇيىمداستىرىلعان قازاقستان-برازيليا بيزنەس-فورۋمىنا قاتىستى, دەپ حابارلادى قر ءسىم-ءىنىڭ ءباسپاسوز قىزمەتى.
بفر ءسىم-ىندە وتكەن كەلىسسوزدەر اياسىندا ەكى ەلدىڭ سىرتقى ساياسات ۆەدومستۆولارىنىڭ باسشىلارى جاھاندىق ماسەلەلەر جيىنتىعى مەن ەكىجاقتى ىنتىماقتاستىق ماسەلەلەرىن تالقىلادى. ل.فيگەيرەدۋ ەكى مەملەكەت اراسىندا ديپلوماتيالىق قارىم-قاتىناس ورناۋىنىڭ 20 جىلدىعى قارساڭىندا برازيليا ايماعىنا قازاقستاندىق ءمينيستردىڭ العاش رەت رەسمي ساپار جاساپ وتىرعانىن اتاپ ءوتتى.
قازاقستان مەن برازيليا اراسىنداعى سەرىكتەستىكتىڭ تاريحى باي. ەلباسىنىڭ 2007 جىلى برازيليا مەملەكەتىنە جاساعان ساپارى ەكى ايماقتىق كوشباسشىلاردىڭ قارىم-قاتىناسىن ارىپتەستىك دەڭگەيىنە كوتەردى. بفر پرەزيدەنتى ل.ي.لۋلا دا سيلۆانىڭ 2009 جىلى قازاقستانعا ساپارى بۇل ارىپتەستىكتى نىعايتا ءتۇستى. برازيليا ايماقتىڭ ءىرى ەكونوميكاسى مەن G-20 جانە بريكس كلۋبىنىڭ مۇشەسى بولا وتىرىپ, سوڭعى جىلدارى جاھاندىق دەڭگەيدە ماڭىزدى ويىنشى بولىپ تابىلادى. قازاقستان بۇل مەملەكەتپەن اۋىل شارۋاشىلىعى, ماشينا جاساۋ, ءتۇرلى سالاداعى جوعارى تەحنولوگيالار, ازاماتتىق اۆياتسيا مەن ەنەرگيا ءوندىرىسى سەكىلدى كوپتەگەن سالالاردا ىنتىماقتاسۋدا. قازىرگى تاڭدا قازاقستاندىق اۋە كومپانيالارى سىيىمدىلىعى 110 جولاۋشى بولاتىن ورتا ماگيسترالدى رەاكتيۆتى ۇشاقتار سەكتورىندا كوشباسشىلاردىڭ ءبىرى بولىپ تابىلاتىن برازيليالىق «ەمبراەر» ۇشاعىن يەلەنۋدە.
يتاماراچيدەگى (بفر ءسىم عيماراتى) كەلىسسوز ناتيجەسىندە ەكى ەلدىڭ مينيسترلەرى كەلەسى قۇجاتتارعا: ەكىجاقتى ساياسي, ەكونوميكالىق, ساۋدا جانە ينۆەستيتسيالىق ۇنقاتىسۋ جونىندەگى مەموراندۋم مەن سپورت سالاسىنداعى ىنتىماقتاستىق مەموراندۋمىنا قول قويىپ, جاھاندىق سيپاتىنداعى ەكى ەلدىڭ ۇستانىمى مەن ەكىجاقتى ماسەلەلەر قامتىلعان بىرلەسكەن مالىمدەمە قابىلدادى.
ءوزىنىڭ برازيليا قالاسىنا ساپارى اياسىندا ە.ىدىرىسوۆ ريو-برانكو اتىنداعى ديپلوماتيالىق اكادەميانىڭ تىڭدارماندارى مەن پروفەسسورلىق-وقىتۋشىلار قۇرامىنىڭ الدىندا ءسوز سويلەدى. برازيليالىق جاس ديپلوماتتار قازىرگى قازاقستان جايلى تەرەڭ بىلىمدەرىن كورسەتىپ, قر-نىڭ الەۋمەتتىك-ەكونوميكالىق رەفورمالارىمەن, ەلىمىزدىڭ تاريحىمەن تانىس ەكەندىكتەرىن بايقاتتى جانە كورشىلەس مەملەكەتتەرمەن قارىم-قاتىناستارىمىزعا, ايماقتىق بىرلەستىكتەگى رولىمىزگە, قازاقستاننىڭ سىرتقى ساياساتىنداعى باسىمدىقتارىنا قىزىعۋشىلىق تانىتتى.
ريو-برانكو اتىنداعى ديپلوماتيالىق اكادەميا بفر ءسىم-ءنىڭ قۇرامىنا كىرىپ, ايماقتاعى جەتەكشى مامانداندىرىلعان وقۋ ورنى بولىپ تابىلادى. بۇل اكادەميادا ەۋروپا, ازيا, افريكادان كەلگەن ستۋدەنتتەر وقيدى. ە.ىدىرىسوۆ برازيليالىق ارىپتەسى لۋيس البەرتۋ فيگەيرەدۋمەن ريو-برانكو اتىنداعى ديپلوماتيالىق اكادەمياسى مەن قر پرەزيدەنتى جانىنداعى مەملەكەتتىك باسقارۋ اكادەمياسىنىڭ ديپلوماتيالىق ينستيتۋتى اراسىنداعى سەرىكتەستىك تۋرالى مەموراندۋمعا قول قويدى.
برازيليا استاناسىنا ساپارىنىڭ رەسمي باعدارلاماسى قازاقستاننىڭ ديپلوماتيالىق وكىلدىگىنىڭ سالتاناتتى اشىلۋ راسىمىمەن اياقتالدى. اتالعان ءىس-شاراعا بفر سىرتقى ىستەر ءمينيسترى, برازيليا استاناسىنىڭ مەرى برازيليا قوعامدىق-ساياسي جانە ىسكەر توپتارىنىڭ وكىلدەرى قاتىستى.
ءراسىم بارىسىندا ە.ىدىرىسوۆ ءوزىنىڭ برازيليالىق ارىپتەسى ل.فيگەيرەدۋمەن بىرگە ەكى ەلدىڭ ازاماتتارىنا ۆيزالىق تالاپتاردى جويۋ تۋرالى كەلىسىمگە قول قويدى. مينيسترلەر كەلىسىم كۇشىنە ەنگەن ساتتەن باستاپ ەكى ەل ازاماتتارىنىڭ ۆيزالىق راسىمدەرسىز قازاقستان مەن برازيليا ەلدەرىنە ەمىن-ەركىن بارۋلارىنا بولاتىندىعىن اتاپ ءوتتى.
سان-پاۋلۋ قالاسىندا قازاقستاندىق مينيستر برازيلياداعى “Fiesp” ونەركاسىپشىلەردىڭ ءىرى فەدەراتسياسىنىڭ قولداۋىمەن “Kaznex Invest” ەكسپورتتار جانە ينۆەستيتسيالار جونىندەگى ۇلتتىق اگەنتتىگى تاراپىنان ۇيىمداستىرىلعان قازاقستان-برازيليا بيزنەس-فورۋمىنا قاتىستى.
قازاقستاندىق ءسىم باسشىسىنىڭ ساپارى جەرگىلىكتى باق-تاردىڭ دا قىزىعۋشىلىعىن تۋدىردى. ساپارى بارىسىندا ە.ىدىرىسوۆ «برازيليا تۆ», «سەنات تۆ» سياقتى تانىمال تەلەارنالارعا, سونداي-اق, بىرنەشە برازيليالىق گازەتتەرگە سۇحبات بەردى. جۋرناليستەردى قىزىقتىرعان باستى تاقىرىپ قازاقستاننىڭ حالىقارالىق ماسەلەلەرگە دەگەن كوزقاراسى بولدى.
