وقۋشىنى قورلاعانى ءۇشىن مەكتەپ ديرەكتورى مەن كەلىنى جۇمىستان قۋىلدى
ونسىز دا جاقسى جاعىنان گورى جامان داعدىلارىمەن كوبىرەك كوزگە ءتۇسىپ جۇرگەن قىزىلجار ءوڭىرىنىڭ ۇستازدارى ادامنىڭ ءۇش ۇيىقتاسا تۇسىنە كىرىپ شىقپايتىن وسپادار ءىس-ارەكەتتەرىمەن ەل ءىشىن تاعى ۇلارداي شۋلاتتى.
وقۋشىنى قورلاعانى ءۇشىن مەكتەپ ديرەكتورى مەن كەلىنى جۇمىستان قۋىلدى
ونسىز دا جاقسى جاعىنان گورى جامان داعدىلارىمەن كوبىرەك كوزگە ءتۇسىپ جۇرگەن قىزىلجار ءوڭىرىنىڭ ۇستازدارى ادامنىڭ ءۇش ۇيىقتاسا تۇسىنە كىرىپ شىقپايتىن وسپادار ءىس-ارەكەتتەرىمەن ەل ءىشىن تاعى ۇلارداي شۋلاتتى.
بۇل باسسىزدىقتى ەستىگەن تۇرعىندار جاعالارىن ۇستاپ, ەستەرىن جيا الماي دال. جامبىل اۋداندىق پروكۋراتۋراسى وقۋشىنىڭ جانىنا ايىقپاس جارا سالىپ, پسيحولوگيالىق اۋىر حالگە تۇسىرگەن مۇعالىمنىڭ قۇلاق ەستىپ, كوز كورمەگەن قاتىگەزدىگىن اشكەرەلەپ, جالپاق جۇرتقا جار سالعاننان كەيىن عانا سەنبەسكە امالدارى قالمادى.
باۋمان مەكتەبىندەگى ماتەماتيكا ءپانىنىڭ مۇعالىمى ك. ءاسىمجانوۆا الگەبرا ساباعىندا ت. دەگەن وقۋشىنى سىنىپتاستارىنىڭ الدىندا ابدەن ماسقارالاعان. ءۇي تاپسىرماسىن بىلمەگەنى ءۇشىن عانا جەتكىنشەكتىڭ كەكىل شاشىن قىرقىپ, قاق ماڭدايىنا قارا سيامەن «دۆوەچنيك» دەپ باتتيتىپ جازىپ قويعان. قارعىس اتقىر «قارا تاڭبانى» وشىرمەۋگە ءامىر ەتەدى. ويتكەن جاعدايدا تاعى ءبىر «ەكىلىكتى» قونجيتاتىنىن ايتىپ, زارە-قۇتىن قاشىرادى. وزگەلەرگە بۇل ءجونىندە ەشكىمگە ءتىس جارماۋدى بۇيىرادى. مەنىڭ ءتىلىمدى الساڭدار, ءبىرىنشى توقساندا ءبارىڭدى «بەستىككە» شىعارامىن دەگەن ءتاتتى ءسوزدەرىن ايتۋدى دا ۇمىتپايدى. سويتسە, ول قايىن ەنەسى بولىپ سانالاتىن مەكتەپ ديرەكتورى ك.كاراباەۆانىڭ ارقاسىندا وسىلايشا ەسىرىپ, تايراڭداپ جۇرگەن بولىپ شىقتى.
پروكۋراتۋرانىڭ ۇيعارىمىمەن باعا قويۋدا كۇندەلىك پەن ماڭدايدى شاتاستىرعان ك.ءاسىمجانوۆا وقۋ-تاربيە جۇمىستارىندا مورالدىق جات قىلىقتارعا جول بەرگەنى ءۇشىن ەڭبەك كودەكسىنىڭ 54-ءشى بابىمەن جازالانىپ, جۇمىستان شىعارىلدى. ديرەكتور دا قىزمەتىمەن قوش ايتىستى. جۇرەگى شايلىعىپ, قورقىپ قالعان جابىرلەنۋشىنىڭ اتا-اناسى سوتقا جۇگىنىپ, مورالدىق شىعىن ءوندىرىپ الۋعا بەكىنگەن سىڭايلى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى,
جامبىل اۋدانى.
