ءورتتى ءسوندىرۋ جانە توتەنشە جاعداي زارداپتارىن جويۋدا 9 ءورت ءسوندىرۋشى قىزمەتتىك مىندەتىن ورىنداۋ كەزىندە كوز جۇمدى. وسى وقيعانىڭ ورىن العانىنا بيىل 31 جىل. قارالى داتاعا وراي, كوكشەتاۋ قالاسىنداعى تەحنيكالىق ينستيتۋتتا وقۋ ورنىنىڭ باسشىلىعى, ارداگەرلەر جانە جەكە قۇرامنىڭ قاتىسۋىمەن قازا بولعان ءورت سوندىرۋشىلەردى ەسكە الۋ كەشى بولىپ ءوتتى. ءىس-شاراعا كوكشەتاۋ قالاسى اكىمىنىڭ ورىنباسارى ەلدار ابۋەۆ قاتىسىپ, ءسوز سويلەدى. ەرلىگىمەن ەستە قالعان ءورت سوندىرۋشىلەردى ەسكە الۋ كەشى ءبىر مينۋت ۇنسىزدىكپەن باستالدى.
شارانى ينستيتۋت باستىعى, ازاماتتىق قورعاۋ پولكوۆنيگى سىرىم ءشارىپحانوۆ اشىپ جۇرگىزدى. ول ءوز سوزىندە ەرلىكتىڭ ەشقاشان ۇمىتىلمايتىنىن, ءوز قىزمەتتەرىنىڭ قاۋىپكە تولى ەكەندىگىن ايتا كەلىپ, جاس ماماندار ءۇشىن الدىڭعى تولقىننىڭ ادال ەڭبەگى, ارلى ءىسى, تاۋەكەلگە بەل بايلاۋى وشپەس ونەگە بولاتىنىنا توقتالدى. بەيبىت كۇننىڭ باتىرلارىن ەسكە الىپ, ارۋاقتارىنا تاعزىم ەتە وتىرىپ, ەرلەرگە قۇرمەت كورسەتۋ كەيىنگىنىڭ پارىزى ەكەندىگىنە توقتالا كەلە, بولاشاقتا ءوز ءومىرىن وسى ماماندىقپەن ۇشتاستىرعىسى كەلەتىن جاس ماماندار ءۇشىن دە ءوز ىسىنە شەكسىز ىلتيپاتپەن قاراۋدىڭ ۇلگىسى بولىپ قالاتىنىن اتاپ ءوتتى.
سونىمەن قاتار ىشكى ىستەر مينيسترلىگىنىڭ قۇرمەتتى ارداگەرى ساپارعالي اسىلبەكوۆ تە ءسوز سويلەپ, بولاشاق قۇتقارۋشىلاردىڭ ءوز ىسىنە ادال بولۋى, جۇكتەلگەن مىندەتتى ابىرويمەن اتقارۋى كەرەكتىگىن اتاپ ءوتتى.
كوكشەتاۋ
