بۇعان دەيىن استاناداعى اۋەجاي كودى IATA بەكىتكەن ەرەجەگە سايكەس TSE دەپ اتالىپ كەلگەن. بۇعان ەلوردانىڭ بۇرىنعى كەزدەگى اتاۋى – تسەلينوگراد نەگىزگە الىنعان-دى. ەندى, NQZ كودى برونداۋ جۇيەلەرىندە, وتىرعىزۋ تالوندارىندا, باگاج بيركالارىندا جانە اقپاراتتىق تابلودا كورسەتىلەدى.
التاي ابيبۋللاەۆتىڭ ايتۋىنشا, ونىڭ لوگيكالىق جانە يدەولوگيالىق ماڭىزى زور.
«N – نۇر-سۇلتان قالاسى جانە ن.نازارباەۆ اۋەجايىن بىلدىرەدى. ال QZ تاۋەلسىز قازاقستاننىڭ جاڭا الىپبيدەگى Qazaqstan اتاۋىن بىلدىرەدى. جاڭا كودتىڭ ءۇش ماعىناسى بار: جاڭا اۋەجاي, جاڭا ەلوردا جانە جالپى قازاق ەلىنىڭ حالىقارالىق ارەناداعى جاڭا ءالىپبيى. اۋەجاي كودىن اۋىستىرۋ – 50 جىلداعى ۇلكەن جەتىستىك, اۆياتسيا كوميتەتىنىڭ حالىقارالىق ارەناداعى جەتىستىگى. وسى كود ارقىلى ەلىمىزدىڭ اتى حالىقارالىق دەڭگەيدە جاڭا سەرپىلىس الىپ, برەند رەتىندە نىعايا بەرسىن», دەدى ا.ابيبۋللاەۆ اۋەجايداعى سالتاناتتى تانىستىرىلىمدا.
وسى ورايدا, مىنا نارسەنى ەسكەرگەن ءجون. ەلوردا اۋەجايىنىڭ كودىن ۇسىناردا بۇعان دەيىن قالىپتاسقان KZ اتاۋى ەمەس, QZ بەكىتىلدى. ياعني قازاقستاندى اعىلشىنشا Kazakhstan دەپ ەمەس, Qazaqstan دەپ تۇپنۇسقاعا بارىنشا ساي جازۋ نەگىزگە الىندى.
بۇل ماسەلەگە پرەزيدەنت قاسىم-جومارت توقاەۆ سەنات توراعاسى كەزىندە نازار اۋدارعانى ەسىمىزدە. مەملەكەت باسشىسى «قازاقستان» ءسوزىن اعىلشىن تىلىندە جازعاندا لاتىن الىپبيىندەگى «Qq» (كيۋ) ءارپىن پايدالانۋ ءجون ەكەنىن جەتكىزدى. «اعىلشىن تىلىندە QAZAQSTAN ەلىمىزدىڭ ۇلتتىق نەگىزىن دۇرىس كورسەتپەك», دەپ جازعان بولاتىن قاسىم-جومارت توقاەۆ تۋيتتەردەگى پاراقشاسىندا.
ايتا كەتەرلىگى, ەلوردا اۋەجايىنىڭ كودىن وزگەرتۋ 2014 جىلى باستالعان. نەگىزى, IATA-عا سايكەس, اۋەجايلارعا كود تۇراقتى نەگىزدە ءبىر رەت قانا بەرىلەدى. وسىعان قاراماستان, قازاقستاندىق ديپلوماتتار اتاۋدى بەكىتتىرۋگە كوپ كۇش سالدى.
بىلتىر, 2019 جىلعى 14 قازاندا پولشانىڭ ۆارشاۆا قالاسىندا IATA مۇشەلەرىنىڭ قاتىسۋىمەن جولاۋشىلار تاسىمالى ستاندارتتارى (Passenger Standards Meeting) كەزدەسۋى وتكەن. وسى جيىندا NQZ اتاۋىن بەكىتۋ ۇسىنىسى قولداۋ تاپتى.
سونداي-اق بۇل باعىتتاعى جۇمىس جالعاسا بەرمەك. كەلەشەكتە اتىراۋ, اقتاۋ جانە تاراز قالالارى اۋەجايلارىنىڭ كودىن اۋىستىرۋ جوسپاردا بار.
