بىرىككەن اراب امىرلىكتەرىندەگى ءىرى بيزنەس ورتالىعى دۋبايدا حالىقارالىق بيزنەس كونفەدەراتسياسىنىڭ (WORLDCOB) كەزەكتى باسقوسۋىنان وتانداستارىمىز ەرەكشە قۇرمەتكە بولەنىپ ورالدى.
شتاب-پاتەرى اقش-تىڭ حيۋستون قالاسىندا ورنالاسقان بۇل دۇنيەجۇزىلىك ۇيىم التى باعىت بويىنشا قىزمەت كورسەتەدى. ونىڭ باستىلارى: ىسكەرلىكتىڭ جەتىلگەنىن حالىقارالىق مويىنداۋ, سەرتيفيكاتتاردىڭ كورپوراتيۆتى الەۋمەتتىك جاۋاپكەرشىلىگىن تانۋ, بيزنەس مامىلەلەرىن جاساۋ, كاسىپكەرلىك پەن ىسكەرلىك اقپاراتتار الماسۋ جانە تاعى باسقالارى.
بىرىككەن اراب امىرلىكتەرىندەگى ءىرى بيزنەس ورتالىعى دۋبايدا حالىقارالىق بيزنەس كونفەدەراتسياسىنىڭ (WORLDCOB) كەزەكتى باسقوسۋىنان وتانداستارىمىز ەرەكشە قۇرمەتكە بولەنىپ ورالدى.
شتاب-پاتەرى اقش-تىڭ حيۋستون قالاسىندا ورنالاسقان بۇل دۇنيەجۇزىلىك ۇيىم التى باعىت بويىنشا قىزمەت كورسەتەدى. ونىڭ باستىلارى: ىسكەرلىكتىڭ جەتىلگەنىن حالىقارالىق مويىنداۋ, سەرتيفيكاتتاردىڭ كورپوراتيۆتى الەۋمەتتىك جاۋاپكەرشىلىگىن تانۋ, بيزنەس مامىلەلەرىن جاساۋ, كاسىپكەرلىك پەن ىسكەرلىك اقپاراتتار الماسۋ جانە تاعى باسقالارى.سوڭعى ۋاقىتتا عانا ۇيىم پاريجدە, گاۆايدا, لوس-گاۆوستا جانە باسقا قالالاردا الەمنىڭ الپىس بەس ەلىنىڭ ىرگەلى كومپانيالارى مەن كاسىپورىندارى وكىلدەرىن سەمينارلار مەن بيزنەس-فورۋمدارعا شاقىردى. كاسىپتىك دايارلىقتى ارتتىرۋعا ارنالعان سەمينارلار وتكىزدى. الەمدىك ۇسىنىستاردى جانە ەكونوميكالىق جاڭالىقتاردى بىرنەشە تىلدە سول ساتتە جەتكىزىپ تۇراتىن ۆەب-پورتال قىزمەتىن پايدالانۋشىلار ميلليونداپ سانالادى. ءوز قاتارىندا ءۇش مىڭنان استام مۇشەسى بار. كەيبىر مۇشە كورپوراتسيالار مەن كومپانيالاردا ونداعان مىڭ ادام جۇمىس ىستەيدى. الەمدەگى بيزنەستىڭ دامۋىن قولداۋ سالاسىندا حالىقارالىق بيزنەس كونفەدەراتسياسى ىقپالدى جانە جەتەكشى ۇيىمداردىڭ قاتارىندا تۇر.
وسى ۇيىمنىڭ سوڭعى جىلدارى قازاقستانمەن قارىم-قاتىناسى باستالىپ, قازاقستاننىڭ ىرگەلى كومپانيالارى تۇرماق, ورتاشا جانە شاعىن بيزنەسىنىڭ تابىستارى WORLDCOB ارقىلى الەمگە ناسيحاتتالىپ جاتىر.
– قازاقستاننىڭ نارىقتىق ەكونوميكانى تاباندى تۇردە ءجۇزەگە اسىرعان ساياساتىن بىلەمىز جانە پرەزيدەنت نۇرسۇلتان نازارباەۆتىڭ بۇل باعىتىن قولدايمىز, – دەيدى حالىقارالىق بيزنەس كونفەدەراتسياسىنىڭ ۆيتسە-پرەزيدەنتى ميحاەل بەلليدو. – قازاق ەلىنىڭ ىسكەر توپتارى مەن كاسىپكەرلەرى ساۋاتتى جۇمىس ىستەيدى. ولاردىڭ بيزنەستى اشىق جانە حالىقارالىق تالاپتارعا سايكەس جۇرگىزۋى ءبىزدىڭ كونفەدەراتسيا تاراپىنان لايىقتى باعاسىن الىپ ءجۇر. جانە ءوز تاراپىمىزدان ۇلكەندى-كىشىلى بيزنەستىڭ بارلىق تۇرىنە كومەك بەرەمىز. اقىل-كەڭەستەن باستاپ, تەحنولوگيانىڭ ەڭ سوڭعى جەتىستىكتەرىنە دەيىن ۇسىنۋعا دايىنبىز.
ۇيىم جەتەكشىلەرىنىڭ بۇل مالىمدەمەسى دۋبايدا قازاقستاندىق بيزنەس وكىلدەرىمەن كەزدەسۋ بارىسىندا ايتىلدى. وعان ميحاەل بەلليدومەن بىرگە سەرتيفيكاتتاردىڭ كورپوراتيۆتى الەۋمەتتىك جاۋاپكەرشىلىگى سالاسىنىڭ ديرەكتورى دانيەل جاۆيەر مىرزا دا قاتىسىپ, ءوزىنىڭ قازاقستانعا دەگەن ىقىلاسىن جەتكىزدى.
اتالمىش حالىقارالىق ۇيىمنىڭ بيزنەس سالاسى مايتالماندارىن ماراپاتتاۋ سالتاناتىندا مۇناي مەن گاز سالاسىنان باستاپ, ءدارى-دارمەك پەن بوياۋ وندىرىسىنە دەيىنگى سان قىرلى ءوندىرىس وكىلدەرى ءوز ەڭبەكتەرىنىڭ لايىقتى باعاسىن الدى. العاشقى قۇرمەت وسى باسقوسۋدى ءوز جەرىندە وتكىزىپ وتىرعان ءباا كومپانيالارىنان باستالىپ, ارابتىڭ ۇلتتىق كيىمىندەگى شەرۋدى وماننىڭ, قاتاردىڭ, ساۋد ارابياسىنىڭ, باحرەيننىڭ وكىلدەرى جالعاستىردى. جەڭىمپازدار اراسىندا مىسىر, سيريا, ليۆيا, الجير جانە ءتۋنيستىڭ بولماۋى دا ءتۇرلى ويلارعا جەتەلەيدى. ەلدىڭ ساياسي ومىرىنەن مازا كەتسە, ودان الدىمەن بيزنەستىڭ زارداپ شەگەتىنى وسى تۇستا ايتپاسا دا تۇسىنىكتى بولدى.
ەۋروپانىڭ جاڭا سەرپىنمەن دامىعان پولشا, ۆەنگريا, رۋمىنيا سياقتى مەملەكەتتەرىنىڭ, لاتىن امەريكاسىنىڭ قۋاتتى برازيلياسىنان باستاپ مەكسيكا, پەرۋ, چيلي, ۆەنەسۋەلا, بوليۆيا جانە باسقا ەلدەرىنىڭ ءتۇرلى كومپانيا, كاسىپورىندارىنىڭ جەتكەن جەتىستىكتەرى لايىقتى ماراپاتقا يە بولدى. ءبىلىم, مەديتسينا سالالارىنداعى كومپانيالار مەن ۇيىمدار دا ءجيى اتالىپ جاتتى. ورتالىق جانە لاتىن امەريكاسىنىڭ ەلدەرى سوناۋ 2006 جىلدان بەرى WORLDCOB ارقىلى الەمگە تانىلۋدى ماقسات ەتىپ كەلەدى. سوندىقتان ونىڭ كورمەسى مەن كونكۋرستارىنا بەلسەندى قاتىسىپ, جەڭىمپاز اتانۋعا تىرىسادى. ساحنادان ءسوز العان وكىلدەر بيزنەستى كەڭەيتۋ مەن بىلىمدەرىن تەرەڭدەتۋدە حالىقارالىق كونفەدەراتسيانىڭ كومەگى كوپ تيگەنىن ايتىپ ءوتتى.
افريكا ەلدەرىنىڭ وكىلدەرى, ونىڭ ىشىندە مۇنايلى نيگەريانىڭ, دامىعان وڭتۇستىك افريكا رەسپۋبليكاسىنىڭ جەتىستىكتەرىن ايتپاعاندا, سەنەگال, بوتسۆانا, موزامبيك, گانا, چاد, زامبيا سىندى ەلدەردىڭ وكىلدەرى بىرەۋى تەرى وڭدەۋدەن, كەلەسىسى بانك-قارجى ىستەرىن ۇيىمداستىرۋدان, ءۇشىنشىسى تۋريزمنەن ءوز جەتىستىكتەرىنە وراي قۇرمەت پەن قولداۋعا يە بولدى. ولاردىڭ مۇنداي بەدەلدى ناگرادا جولىنداعى باسەكەگە قاتىسقانىنا بەس جىل بولىپتى.
تەحنولوگيا, ماشينا جاساۋ, كومپيۋتەر مەن ەلەكتروندى قۇرالدار شىعارۋ سالاسىنىڭ ليدەرلەرى قاتارىندا تۇركيا, كامبودجا جانە باسقا ەلدەردىڭ اتتارى اتالعاندا قوناقتار قۇرمەتپەن قول سوقتى. تمد ەلدەرى اراسىندا رەسەي, ازەربايجان جانە قازاقستان كومپانيالارى توپ جارىپ شىقتى. اسىرەسە, قازاق پەن ورىس كاسىپورىندارى مەن مەكەمەلەرىنىڭ اتتارى كوبىرەك اتالدى. بۇل دا قاي ەلدىڭ قانشالىقتى دەڭگەيدە دامىعانىن ايعاقتايدى.
قازاق ەلىنەن العاشقى بولىپ «ق.ءماسىموۆتىڭ دەن ساۋىقتىرۋ ورتالىعى» كاسىپورنى وسى كونفەدەراتسيانىڭ ۇلكەن جيىنىنا قاتىسىپ وتىر. بۇل – قازاقستان عانا ەمەس ورتالىق ازيادا العاش رەت تۋبەركۋلەز بەن قاتەرلى ىسىكتەردى جولاق-تەست ارقىلى انىقتاۋدى جولعا قويعان ورتالىق. ول ءۇشىن وڭتۇستىك كورەيا وندىرۋشىلەرىمەن تىعىز قارىم-قاتىناس ورناتقان. الماتىدا وسىنداي جولاق-تەست تاياقشالار شىعاراتىن زاۋىتتى ىسكە قوسقان. تەست-جولاقتارى بويىنشا 17 ءتۇرلى اۋرۋدى انىقتايتىن اپپاراتتاردى بۇعان دەيىن وڭتۇستىك كورەيادان تەك اقش پەن جاپونيا سياقتى ەڭ دامىعان ەلدەر ساتىپ العان. ورتالىق ازيا ايماعىندا, ءتىپتى رەسەي باستاعان شىعىس ەۋروپادا بۇل جاڭالىققا ەشبىر ەلدىڭ قولى جەتە قويماعان. «ق.ءماسىموۆتىڭ دەن ساۋىقتىرۋ ورتالىعى» بولسا سەمەي, قىزىلورداداعى ونكولوگيالىق اۋرۋلاردى ەمدەيتىن اۋرۋحانالارعا سۇيىق تسيتولوگيالىق دياگنوستيكاعا ارنالعان ەكى اپپاراتتى تەگىن تارتۋ ەتكەن-ءدى. ارقايسىسى 200 مىڭ دوللار بولاتىن مۇنداي اپپاراتتار باسقا دا وبلىستارعا جەتكىزىلىپ جاتىر. وسى ەڭبەكتەرى ءۇشىن قازاقستاندىقتار عانا ەمەس, ەندى مىنە, الەمنىڭ بيزنەس مارقاسقالارى دا قاجىمقان ءماسىموۆ پەن كاسىپورىننىڭ باس ديرەكتورى قالەلحان يمانماديگە قول سوعىپ, قۇرمەت كورسەتتى.
اراب ەلىنىڭ ساحناسىندا تاپسىرىلعان ديپلومعا دا, وسى باسقوسۋعا جىبەرىلگەن شاقىرتۋعا دا حالىقارالىق بيزنەس كونفەدەراتسياسىنىڭ پرەزيدەنتى جوزە مورگان قول قويعان. ءوز سوزىندە ورتالىق باسشىسى قاجىمقان ءماسىموۆ ادامزاتتىڭ قاتەرلى دەرتتەردى اۋىزدىقتاۋ جورىعىنان تىس قالماي, وعان ءوز ۇلەستەرىن قوساتىندىقتارىن جەتكىزدى جانە حالىقارالىق بيزنەس كونفەدەراتسياسىنا قازاق ەلىنىڭ سيمۆولى بولىپ تابىلاتىن قاناتتى بارىس ۇستىندەگى «التىن ادام» ءمۇسىنىن تارتۋ ەتتى.
الەمدىك بيزنەستىڭ العا وزعان سەركەلەرىن ماراپاتقا بولەگەن بۇل باسقوسۋدا تاعى بىرنەشە قازاقستاندىق بيزنەس وكىلدەرى سىي-سياپاتقا يە بولدى. مۇناي-گاز سالاسىندا اراب, نيگەريا وكىلدەرىمەن بىرگە «قازگەرمۇناي» بىرلەسكەن كاسىپورنى لايىقتى باعاسىن السا, ال بانك, بيرجا سالالارىندا جەتىستىككە جەتكەن استانالىق, ورالدىق ىسكەرلەر بولدى. جانە ءبىر قۋانىشتىسى, الماتى مەن استانانىڭ تابىسى ورتاشا قىزمەتشىلەرى مەن ستۋدەنت جاستارىن ارزان, جەدەل جانە ىستىق اسپەن قامتاماسىز ەتىپ وتىرعان «قاعانات» كاسىپورنى ءوز سالاسىندا ماراپاتقا يە بولىپ, ەلىمىزدىڭ مارتەبەسىن تاعى ءبىر بيىك بەلەستەن كورسەتە ءبىلدى.
قانات ەسكەندىر,
«ەگەمەن قازاقستان».
الماتى.
