ماسەلە تۇسىنىكتى بولۋ ءۇشىن بالتىق مۇيىسىنە از-كەم توقتالايىق. ۇزىندىعى 65 شاقىرىمعا سوزىلاتىن بۇل جەر پولشانىڭ سولتۇستىگىندە رەسەيدىڭ كالينينگراد وڭىرىمەن تۇيىسكەن تۇستا ورنالاسقان. ءمۇيىستىڭ 35 شاقىرىمى رەسەيگە, قالعان 30 شاقىرىمى پولشاعا تيەسىلى. سوندىقتان ونىڭ اتاۋى دا ءار جەردە تۇرلىشە ايتىلادى. سولتۇستىكتەگى كورشىمىز ونى بالتىق ءمۇيىسى دەسە, پولشا ۆيسلين ءمۇيىسى دەيدى.
ونداعى شىعاناقتىڭ اتاۋى دا ەكى ءتۇرلى: باتىس بولىگى – ۆيسلين لاگۋنى, شىعىسى – كالينينگراد شىعاناعى. بالتىق تەڭىزىنە شىعاتىن تۇس بىرەۋ عانا. ونىڭ ءوزى رەسەي شەكاراسىندا ورنالاسقان. بار ماسەلەنىڭ تۋىنداۋى دا وسىعان كەلىپ تىرەلەدى. پولشانىڭ ەڭ ۇلكەن قالالارىنىڭ ءبىرى ەلبلونگتاعى پورتتان تەڭىزگە شىعۋ ءۇشىن رەسەيدىڭ شەكاراسىن كەسىپ ءوتۋى ءتيىس. ەكىجاقتى كەلىسسوزدەردىڭ ناتيجەسىندە جۇك تاسىمالدايتىن كەمەلەر ارنايى تەكسەرىستەن وتپەيدى. بىراق جەكە كاتەرلەر, ياحتالار ارنايى رۇقسات الۋى ءتيىس.
2006 جىلى رەسەي بيلىگى بالتىق بۇعازى ارقىلى پولشا كەمەلەرىنىڭ وتۋىنە تىيىم سالعان ەدى. وسىعان بايلانىستى پولشادا ۆيسلين مۇيىسىنە كانال سالۋ تۋرالى اڭگىمە قوزعالىپ, شەشىم قابىلدانعان. الايدا كەيىنىرەك ۇكىمەت تىزگىنىن ۇستاعان دونالد تۋسك رەسەيمەن مامىلەگە كەلدى. سودان كەيىن رەسەي شەكاراسىن جاپقان ەمەس. دەگەنمەن, كەيىنگى جىلدارى پولشادا كانال سالۋ جوسپارى قايتا كوتەرىلىپ, بىلتىر جوبانى جۇزەگە اسىرۋ جۇمىسى باستالىپ كەتتى.
قۇرىلىس اياقتالعاندا 100 شاقىرىمعا دەيىنگى سۋ جولى قىسقارتىلىپ, بالتىق تەڭىزىنە تىكەلەي شىعۋعا مۇمكىندىك جاسالماق. جوبا تۋرالى تالايدان بەرى ايتىلىپ كەلە جاتقانىمەن, ونىڭ قۇرىلىسى 2019 جىلى باستالعان-دى. جوسپارعا سايكەس, كانالدىڭ ۇزىندىعى 1305 مەترگە جەتەدى. پولشا بيلىگى قۇرىلىستى 2022 جىلى اياقتاۋدى جوسپارلاپ وتىر. جوبا قۇنى ازىرگە 2 ملرد زلوتيعا تەڭ (500 ملن دوللار).
پولشا پرەزيدەنتى اندجەي دۋدانىڭ ايتۋىنشا, كانال سالۋ ارقىلى پولشا رەسەيدىڭ ىقپالىنان قۇتىلىپ, تاۋەلسىزدىگىن نىعايتا تۇسپەك. ەل پرەزيدەنتىنىڭ پايىمداۋىنشا, مۇنداي جوبالار قوسىمشا جۇمىس ورنىن اشادى. سونداي-اق ول باتىس ەۋروپا ەلدەرىمەن باسەكەلەسۋگە ءازىرمىز دەپ مالىمدەپ, باتىسپەن بايلانىسىن كۇشەيتۋگە دايىن ەكەنىن جەتكىزدى.
ء«بىز جوباعا مول ينۆەستيتسيا تارتۋدى جوسپارلاپ وتىرمىز. قۇرىلىستى توقتاتۋدى, كەيىنگە شەگەرۋدى نەمەسە قىسقارتۋدى جوسپارلاپ وتىرعانىمىز جوق. ويتكەنى بۇل ينۆەستيتسيا ەل ەكونوميكاسىنا مول قارجى قۇيادى», دەدى ول.
بيلىكتىڭ امبيتسياسىنا قاراماستان, پولشادا دا, شەتەلدە دە وعان قارسىلار جەتەرلىك. اسىرەسە ەلدەگى وپپوزيتسيا وكىلدەرى جوبانىڭ ءوز-ءوزىن اقتامايتىنىن العا تارتادى. ال ەكولوگيا بەلسەندىلەرى بۇل باستامانى تابيعاتتى ءبۇلدىرۋ دەپ ەسەپتەيدى. وعان قوسا, پولشانىڭ ۆيسلين مۇيىسىنە كانال قازۋى رەسەيگە دە ۇناعان جوق.
بيىل پولشادا پرەزيدەنتتىك سايلاۋ وتەدى. جوسپار بويىنشا ەلەكتورات 10 مامىردا داۋىس بەرۋى ءتيىس ەدى. كوروناۆيرۋس پاندەمياسىنا بايلانىستى سايلاۋ كەيىنگە شەگەرىلىپ, 28 ماۋسىمعا بەلگىلەندى. پرەزيدەنتتىكتەن ۇمىتكەرلەر ەندى ۆيسلين مۇيىسىنە كانال قازۋ جوباسىن ساياسي ناۋقاننىڭ ءبىر بولىگىنە اينالدىرىپ وتىر. «ازاماتتىق الاڭ» وپپوزيتسيالىق بلوك تاراپىنان سايلاۋعا ءتۇسىپ جاتقان رافال تشاسكوۆسكي جەڭىسكە جەتسە, قۇرىلىستى توقتاتۋعا ۋادە بەردى.
رەسەيلىك بۇقارالىق اقپارات قۇرالدارى پولشانىڭ بۇل باستاماسىن قاتتى سىنعا الدى. اسىرەسە ءباسپاسوز بەتتەرىندە ۆيسلين مۇيىسىنە كانال سالۋدى ەۋروپالىق كوميسسيا قولداماي وتىرعانى ءجيى ايتىلادى. دەگەنمەن, بۇل شىندىققا ساي كەلمەيدى.
قازىرگى تاڭدا پولشا بيلىگى مەن ەۋروپالىق كوميسسيا مۇيىسكە سۋ جولىن سالۋ تۋرالى كەلىسسوز جۇرگىزىپ جاتىر. ەۋروپالىق پارلامەنتتىڭ رەسمي سايتىندا جوباعا قاتىستى ناقتى شەشىم ءالى شىقپاعانى جازىلعان. ايتسە دە رەسمي تۇردە ۆارشاۆا جوبانى جالعاستىرۋ ءۇشىن ونىڭ تيىمدىلىگى مەن قورشاعان ورتاعا قاۋىپ توندىرمەيتىنىن دالەلدەۋى ءتيىس. الدا-جالدا اندجەي دۋدانىڭ اكىمشىلىگى قارت قۇرلىق شەنەۋنىكتەرىنىڭ كوزىن جەتكىزبەسە, ەۋروپالىق كوميسسيا قۇرىلىسقا توقتاۋ سالۋعا قۇقىلى.
قىسقاسى, ۆيسلين مۇيىسىنە كانال سالۋدىڭ ەكونوميكالىق جاعىنان گورى, ساياسي استارى باسىم بولىپ تۇر. پولشا بيلىگى وسى قادام ارقىلى باتىس ەۋروپانىڭ دەموكراتياسىنا جاقىندىعىن ءبىلدىرىپ, رەسەيدىڭ كەز كەلگەن ىقپالىنان ارىلۋدى كوزدەيدى.
