ءبىلىم • 05 ماۋسىم، 2020

الماتىدا ۇبت التى جوعارى وقۋ ورنىندا وتكىزىلەدى

62 رەت كورسەتىلدى

الماتى قالاسىنىڭ اكىمى باقىتجان ساعىنتاەۆتىڭ تاپسىرماسىمەن ونىڭ ورىنباسارى ەرجان باباقۇماروۆ ۆيدەو-كونفەرەنتسيالىق بايلانىس رەجىمىندە جوعارى وقۋ ورىندارىنىڭ رەكتورلارىمەن الداعى بىرىڭعاي ۇلتتىق تەستىلەۋدى وتكىزۋ ماسەلەلەرى بويىنشا جينالىس وتكىزدى.

جيىنعا قالالىق ءبىلىم باسقارماسىنىڭ باسشىسى ل.جىلقىباەۆا، الماتىنىڭ باس مەملەكەتتىك سانيتار دارىگەرى ج.بەكشين، اۋداندىق اكىمدىكتەردىڭ وكىلدەرى، 12 جوو رەكتورلارى مەن پرورەكتورلارى، سونىمەن بىرگە، ۇبت وتكىزۋ كەزىندە قاۋىپسىزدىكتىڭ ساقتالۋىنا جانە سىناقتى وتكىزۋگە جاۋاپتى بارلىق سالالىق ۆەدومستۆولار قاتىستى.

كەزدەسۋدىڭ باستى ماقساتى – ۇبت مەن ونى وتكىزۋ پۋنكتتەرىندە بارلىق قاۋىپسىزدىكتى قامتاماسىز ەتۋ دايىندىعىن تەكسەرۋ.

الماتىدا 14 972 ادام ۇبت تاپسىرادى دەپ جوسپارلانۋدا، سونىڭ ىشىندە، 9047 تۇلەك اعىمداعى وقۋ جىلىنان بولسا، 5 925-ءى وتكەن جىلدارداعى مەكتەپ جانە كوللەدج  تۇلەكتەرى. تەست بۇرىنعى قالىپتاسقان فورماتتا وتەدى.

الماتىدا ۇبت ماۋسىمنىڭ 20-سى مەن شىلدەنىڭ 5-ءى ارالىعىندا التى جوو وتەدى: قازاق ۇلتتىق اگرارلىق ۋنيۆەرسيتەتى، ءال-فارابي اتىنداعى قازاق ۇلتتىق ۋنيۆەرسيتەتى، حالىقارالىق بيزنەس ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى، «نارحوز» ۋنيۆەرسيتەتى.

جينالىس بارىسىندا كوروناۆيرۋس ينفەكتسياسىن جۇقتىرۋدى بولدىرماۋ ءۇشىن كۇشەيتىلگەن سانيتارلىق-ەپيدەميولوگيالىق تالاپتاردى قاتاڭ ساقتاۋ قاجەتتىگىنە نازار اۋدارىلدى. جەكەلەي العاندا، جەدەل رەسپيراتورلى بەلگىلەرى جانە باسقا دا ينفەكتسيالىق اۋرۋ بەلگىلەرى بار ازاماتتاردى وتكىزبەۋ ماقساتىندا ۇبت قاتىسۋشىلار مەن وعان تارتىرعان قىزمەتكەرلەر اعىنىن سۇزگىدەن وتكىزۋ; الەۋمەتتىك قاشىقتىقتى ساقتاۋ جانە ادامداردىڭ توپتاسپاۋى ءۇشىن اۋديتورياعا كىرۋ جانە شىعۋ باعىتتارىن جاساۋ; سونىمەن بىرگە، اۋديتوريا ىشىندە جەلدەتۋ جۇيەسىنىڭ بولۋىمەن قامتاماسىز ەتۋ ماسەلەلەرى قارالدى.  

بەلگىلەنگەن الگوريتمگە سايكەس ۇبت پۋنكتتەرىندە كەلەسى شارالار ساقتالاتىن بولادى:

-اۋديتوريالارداعى تەست تاپسىرۋشىلار سانىن 2 ەسەگە دەيىن قىسقارتۋ (50 پايىزعا دەيىن);

-تەست تاپسىرۋشىلاردى كىرگىزەر الدىندا، سونىمەن بىرگە، ۇبت وتكىزۋ كەزىندە  ولاردىڭ ارالىعى كەمىندە 1،5-2 مەتر بولادى، شەكتەۋ لەنتالارى ورناتىلاتىن بولادى;

- ۇبت وتكىزۋ پۋنكتتەرى تەس تاپسىرۋشىلاردى، مەملەكەتتىك كوميسسيا مۇشەلەرى مەن كەزەكشىلەردى تەكسەرۋ ءۇشىن تەپلوۆيزورلارمەن، دەزينفەكتسيالايتىن توننەلدەرمەن، سانيتايزەرلەرمەن، اياق كيىمدەردى دەزينفەكتسيالايتىن كىلەمدەرمەن، ماسكالارمەن جانە قولعاپتارمەن قامتاماسىز ەتىلەدى. اۋرۋ بەلگىلەرى انىقتالعان جاعدايدا مەديتسي نا قىزمەتكەرلەرىنىڭ الىپ جۇرۋىمەن ازاماتتار ودان ارى تەكسەرۋ ءۇشىن مەديتسينالىق مەكەمەلەرگە جولدانادى. ول ءۇشىن جوو پەريمەترى بويىنشا جەدەل مەديتسينالىق قىزمەتتىڭ كەزەكشىلەرى جۇمىس ىستەيتىن بولادى.

- ۇبت قاتىسۋشىلاردىڭ بارلىعى مەديتسينالىق ماسكالارمەن، بوتەلكەدەگى سۋلارمەن جانە ءبىر رەتتىك ستاكاندارمەن قامتاماسىز ەتىلەدى;

- اۋديتوريالاردا جەلدەتۋ جۇيەسى جانە اۋانى باپتاۋ جۇيەسى بولمەنى ءاربىر 1،5-2 ساعات سايىن جەلدەتۋ رەجيمىن ساقتاۋ ارقىلى  ۇزدىكسىز جۇمىس ىستەيدى. جىلى ماۋسىمدا اۋديتوريالاردا تەستىلەۋ كەزىندە فرامۋگالار مەن تەرەزەلەر اشىلىپ تۇرادى.

- بولمەلەردى، ەسىك تۇتقالارىن، باسپالداقتىڭ ۇستايتىن جەرلەرىن، تەرەزەلەردىڭ الدىن، ۇستەلدىڭ ۇستىڭگى قاباتىن، ورىندىقتاردى جانە باسقا دا زاتتاردى كۇنىنە كەمىندە 2 رەتتەن دەزينفەكتسيالاپ، جۋشى جانە دەزينفەكتسيالىق قۇرالدارمەن بۇكىل اۋديتورياعا ىلعالدى تازالىق جۇرگىزۋدى قامتاماسىز ەتۋ;

- قىزمەتكەرلەر مەن مەكتەپ تۇلەكتەرىنىڭ جەكە گيگيەنانى ساقتاۋى ءۇشىن ءتيىستى جاعدايدى (سانيتارلىق توراپتاردىڭ جۇمىس ىستەۋى، قول جۋعىشتاردىڭ، سابىننىڭ، ءبىر رەتتىك سۇلگىلەر مەن سانيتايزەرلەردىڭ  بولۋى، ) جاساۋ;

سونىمەن بىرگە، ۇبت قاتىسۋشىلارمەن بىرگە كەلگەن اتا-انالارى ءۇشىن ارنايى كۇتۋ ورىندارى قاراستىرىلماق. سونىمەن بىرگە، ادامداردىڭ كوپتەپ جينالۋىن بولدىرماۋ ءۇشىن اتا-انالارعا بالالارىمەن بىرگە ۇبت-گە كەلمەۋ ۇسىنىسى جاسالدى. ولار ءۇشىن ونلاين رەجيمدە اۋديتوريادان تىكەلەي كورسەتىلىم ۇيىمداستىرىلادى.

الماتى قالاسى اكىمىنىڭ ورىنباسارى ەرجان باباقۇماروۆ جوعارىدا اتالعان تالاپتاردى قامتاماسىز ەتۋ ءۇشىن ءتيىستى باسقارمالار مەن ۆەدومستۆولارعا بىرقاتار ناقتى تاپسىرمالار بەردى. 

ۇلتتىق بىرىڭعاي تەستىلەۋدى وتكىزۋ ەرەجەسىنە سايكەس، ناتيجەلەردىڭ اشىقتىعى مەن وبەكتيۆتىلىگىن قامتاماسىز ەتۋ ماقساتىندا ۇبت وتكىزۋ پۋنكتتەرى ۇبت بارىسىن باقىلاۋدى جانە ونلاين ترانسلياتسيانى قامتاماسىز ەتەتىن بەينەكامەرالارمەن قامتاماسىز ەتىلەدى. بۇل رەتتە رەزەرۆتىك جابدىقتالعان اۋديتوريالار قاراستىرىلاتىن بولادى.

وقۋشىلار مەن اتا-انالار ۇبت-داعى كەلەسىدەي ەرەجەلەرگە نازار اۋدارۋ قاجەت:

- تەستىلەۋگە جىبەرۋ بارىسىندا قاتىسۋشىدان تىيىم سالىنعان زاتتار تابىلعان جاعدايدا، وقۋعا ءتۇسۋشى وسى تەستىلەۋگە، سونداي-اق اعىمداعى جىلعى كەلەسى ۇبت-عا جىبەرىلمەيدى.;

- ۇبت كەزىندە قاتىسۋشىدان تىيىم سالىنعان زاتتار تابىلعان جاعدايدا، تەستىلەۋ ناتيجەلەرى جويىلادى جانە وقۋعا ءتۇسۋشى اعىمداعى جىلى ۇبت-عا جىبەرىلمەيدى;

- ۇبت-عا «جالعان ادامدى» تارتقان وقۋعا ءتۇسۋشى اعىمداعى جىلى تەستىلەۋگە جىبەرىلمەيدى;

- ۇبت اياقتالعاننان كەيىن كۇنتىزبەلىك جىلدىڭ 25 تامىزىنا دەيىن بەينەجازبالارعا تالداۋ جۇرگىزىلەدى. قاتىسۋشىنىڭ تىيىم سالىنعان زاتتاردى پايدالانۋى انىقتالعان جاعدايدا، ۇبت جانە كونكۋرس ناتيجەلەرى جويىلادى.

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار