ءوز سوزىندە قمگ باسشىسى ەلىمىزدە تاۋەلسىزدىك جىلدارى مۇناي جانە گاز تاسىمالىنىڭ مىقتى ينفراقۇرىلىمى قالىپتاسقانىن اتاپ ءوتتى.
– ينفراقۇرىلىمدى دامىتۋ كەزەڭىندە «قازترانسگاز» اق مەن «قازترانسويل» اق-نىڭ «قازمۇنايگا»ز قۇرامىندا بولۋى تولىعىمەن ورىندى ەدى. تاسىمالداۋ باعىتتارىنىڭ ديۆەرسيفيكاتسيالانعان جەلىسىن دامىتۋ ءۇشىن بارلىق رەسۋرستاردى بىرىڭعاي ورتالىققا بىرىكتىرۋ قاجەت بولاتىن. قازىرگى ۋاقىتقا دەيىن اتالعان جۇمىستاردىڭ بارلىعى دەرلىك اياقتالدى جانە ايتىلىپ وتىرعان قوس كومپانيا ءوز الدىنا دەربەس بولىپ قالىپتاستى. وسىعان بايلانىستى العاشقى كەزەڭدە «قازترانسگاز» كومپانياسىن «سامۇرىق-قازىنا» قورىنا تىكەلەي باعىنىشتى ەتۋ ۇسىنىلادى. بۇل باسقارۋ دەڭگەيلەرىن ازايتۋعا, قمگ IPO-عا شىققان جاعدايدا ينفراقۇرىلىمدىق جوبالاردى مەملەكەت ەنشىسىندە ساقتاۋعا, ال قمگ وزىنە مۇناي جانە گازدى بارلاۋ, ءوندىرۋ جانە وڭدەۋگە, سونداي-اق مۇناي-گاز حيمياسى جوبالارىنا ايرىقشا دەن قويۋعا مۇمكىندىك بەرەدى, دەدى اليك ايدارباەۆ.
نۇرسۇلتان نازارباەۆ اتالعان ۇسىنىستى قولداپ, بۇل ماسەلەنى پىسىقتاۋدى تاپسىردى.
قازىرگى ۋاقىتتا قمگ «قازترانسگاز» اق-عا قاتىستى تاپسىرمانى ورىنداۋعا كىرىستى. مەملەكەتتىك ورگانداردىڭ, «سامۇرىق-قازىنا» قورى مەن قمگ ديرەكتورلار كەڭەستەرىنىڭ ءتيىستى كەلىسىمىن الۋ قاجەت.
سونداي-اق قمگ-نىڭ كەلىسىمشارتتىق قاتىناستارى بار مۇددەلى تاراپتارمەن دە كەلىسسوز جۇرگىزىلەتىن بولادى. كرەديتورلاردىڭ, سونىڭ ىشىندە قمگ ەۋرووبليگاتسيالارىن ۇستاۋشىلاردىڭ كەلىسىمىن الۋ ءۇشىن ولارعا مامىلەنىڭ ءمان-جايى مەن جاساۋ سەبەپتەرىن ءتۇسىندىرۋ ماقساتىندا ءتيىستى جۇمىستار جۇرگىزىلەدى. مامىلەنىڭ قۇرىلىمى بويىنشا شەشىم بارلىق تاراپتاردىڭ مۇددەلەرى مەن قمگ-نىڭ كرەديتتىك رەيتينگىنە ىقپالى ەسكەرىلىپ قابىلدانادى.
«قازترانسويل» اق-عا قاتىستى ماسەلە بۇدان كەيىنگى كەزەڭدە قوسىمشا قارالاتىن بولادى.
ماڭعىستاۋ وبلىسى
