«مەملەكەت باسشىسى اتاپ وتكەندەي, مەرەيتويدىڭ كۇن ءتارتىبى تۇجىرىمدامالىق تۇرعىدان ەلدە جانە شەتەلدە اباي تۇلعاسىنىڭ جاھاندىق اۋقىمىن كەڭىنەن تانىمال ەتۋگە ارنالعان يدەولوگيالىق-مازمۇندى جانە ساپالى ءىس-شارالاردى وتكىزۋگە نەگىزدەلەتىن بولادى. بۇل رەتتە بيىلعى جىلى اتاپ وتىلەتىن ماڭىزدى ءىس-شارالار بارىسىندا ىسىراپشىلدىق پەن ناۋقانشىلدىققا جول بەرىلمەيتىندىگىنە باسا نازار اۋدارعىم كەلەدى», - دەدى مينيستر ا. رايىمقۇلوۆا.
ونىڭ ايتۋىنشا, ابايدىڭ مۇراجاي-ۇيىندە, جيدەبايداعى «اباي-شاكارىم» مەموريالدىق كەشەنىندە عىلىمي-رەستاۆراتسيالاۋ جۇمىستارى جۇرگىزىلۋدە, ابايدىڭ «جيدەباي-ءبورىلى» مۋزەي-قورىعىن تولىققاندى عىلىمي-زەرتتەۋ ورتالىعى ەتىپ قايتا قۇرۋ تۇجىرىمداماسى ازىرلەندى.
«جالپى, شىعىس قازاقستان وبلىسىنداعى 18 وبەكتىدە جۇمىستار جۇرگىزىلۋدە. اباي شىعارماشىلىعىن ناسيحاتتاۋ ماقساتىندا ەلدە جانە شەتەلدە ونىڭ ەڭبەكتەرى الەمنىڭ 8 شەت تىلىنە اۋدارىلىپ, باسىلىپ شىعارىلادى. پراگادا ابايدىڭ مادەني-اقپاراتتىق ورتالىعى اشىلدى, براتيسلاۆا, بۋداپەشت, بەرلين قالالارىندا «اباي وقۋلارى», كورمەلەر, دوڭگەلەك ۇستەلدەر ۇيىمداستىرىلدى. نۇر-سۇلتان قالاسىنداعى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا «اباي اكادەمياسى» عىلىمي-زەرتتەۋ ينستيتۋتى قۇرىلدى», - دەدى مينيستر.
سونداي-اق مينيستر مەرەيتويدىڭ حالىقارالىق تۇساۋكەسەرى قاشان وتەتىنىن ايتتى.
«مەرەيتويدىڭ نەگىزگى شارالارىن قىركۇيەك ايىندا شىعىس قازاقستان وبلىسىندا وتكىزۋ جوسپرالانىپ وتىر. اعىمداعى جىلدىڭ قازان ايىندا پاريجدەگى يۋنەسكو-نىڭ شتاب-پاتەرىندە اباي مەرەيتويىنىڭ حالىقارالىق تۇساۋكەسەرى وتەدى», - دەدى مينيستر.
