ىقپالداستىقتى دامىتۋداعى جاڭا قادامدار

كەشە قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ جۇمىس ساپارىمەن ليۆان رەسپۋبليكاسىندا بولدى, دەپ حابارلادى پرەمەر-ءمينيستردىڭ ءباسپاسوز قىزمەتى. كارىم ءماسىموۆتىڭ وسى ەلدىڭ پرەمەر-ءمينيسترى سااد ءال-حاريريمەن كەزدەسۋىندە ەكىجاقتى ساۋدا-ەكونوميكالىق قىز­مەت­تەستىكتى دامىتۋدىڭ كەيبىر ماسە­لەلەرى تالقىلاندى. ال ليۆان پرەزيدەنتى مي­شەل سۋلەيمانمەن بولعان كەز­دەسۋدە قازاقستان مەن ليۆان ارا­سىنداعى ەكىجاقتى ەكونوميكا­لىق ىنتىماقتاستىق جونىندە پىكىر الماسىلدى. ەكونوميكالىق ءوزارا ىقپالداستىقتى تەرەڭدەتۋ ءۇشىن بارلىق جاعدايلاردىڭ جا­سال­عانى اتاپ ءوتىلدى. تاراپتار وسى ۇدەرىستىڭ بەلسەندىلىگىن ارتتىرا تۇسۋگە دەگەن وزدەرىنىڭ مۇددەلىلىكتەرىن ءبىلدىردى. ساپار بارىسىندا سونداي-اق ليۆان سىرتقى ىستەر ءمينيسترى الي حاسان ءال-شاميمەن كەلىس­سوز­دەر جۇرگىزىلىپ, وڭىرلىك قىز­مەتتەستىكتى نىعايتۋ ماسەلەلەرى تالقىلاندى. ءبىز ليۆاندى قا­زاق­ستان پرەزيدەنتىنىڭ باستا­ما­سى­مەن قۇرىلعان ازياداعى ءوزارا ءىس-قيمىل جانە سەنىم شارالارى جونىندەگى كەڭەس ۇدەرىسىنە قاتىسۋشى بولۋعا شا­قى­رامىز, دەدى ك.ءماسىموۆ. الي شامي ليۆاننىڭ ازياداعى تۇ­راق­تىلىق پەن قاۋىپسىزدىكتى نى­عاي­تۋ ۇدەرىسىنە اتسالىسۋعا ءمۇد­دەلى ەكەنىن جەتكىزدى. رەسمي ساپار شەڭبەرىندە قا­زاق­ستان ۇكىمەتىنىڭ باسشىسى ك.ءماسىموۆ ليۆان پارلامەنتىنىڭ توراعاسى نابيح بەرريمەن كەلىس­سوزدەر جۇرگىزدى. وندا ەكى ەل ارا­سىنداعى ەكونوميكالىق بايلا­نىس­تاردى نەعۇرلىم تەرەڭدەتە ءتۇسۋ ماسەلەلەرى قارالدى. پرەمەر-مينيستر ك.ءماسىموۆ باستاعان قازاقستاندىق دەلەگا­تسيا­نىڭ رەسمي ساپارى سوڭىندا ۇكىمەت ۇيىندە كەڭەيتىلگەن قۇرام­دا ەكىجاقتى كەلىسسوزدەر ءوتتى. كەزدەسۋ كەزىندە ەكى ەلدىڭ ەكو­نوميكانىڭ ءتۇرلى سالالارى, اتاپ ايتقاندا, اۋىل شارۋاشىلىعى, تۋريزم جانە قارجى سەكتورى بويىنشا قىزمەتتەستىك جاعدايى وتە ناتيجەلى تۇردە تالقىلاندى. ءبىز تاياۋ شىعىستاعى احۋالدى جانە ەكى ەلدىڭ بەيبىتشىلىكتى قامتاماسىز ەتۋدەگى مۇمكىندىك­تەرىن تالقىلادىق, دەپ اتاپ ءوتتى كارىم ءماسىموۆ كەزدەسۋ سوڭىندا. كەزدەسۋ قورىتىندىسىندا قا­زاقستان جانە ليۆان سىرتقى ىستەر مينيسترلىكتەرى اراسىندا ءوز­ارا ساياسي كونسۋلتاتسيالار تۋ­را­لى مەموراندۋمعا قول قويىلدى.