ايماقتار • 05 ماۋسىم، 2020

تۇركىستان وبلىسىندا ۇيىندە ەسىرتكى ەگۋمەن اينالىسقان تۇرعىن انىقتالدى

148 رەت كورسەتىلدى

شاردارا اۋداندىق پوليتسيا بولىمشەسىنە جەرگىلىكتى تۇرعىننان وزىنە جاقىن تانىس ەمەس ازاماتتىڭ زاڭسىز ەسىرتكى ەگۋمەن اينالىساتىنى جونىندە حابارلاما تۇسەدى. «قاراسورا-2020» جەدەل-پروفيلاكتيكالىق ءىس-شاراسى بارىسىندا اۋداندىق پوليتسەيلەر كەلىپ تۇسكەن اقپاراتتى انىقتاپ، تەكسەرۋ ءۇشىن كورسەتىلگەن مەكەن-جايعا شۇعىل جەتەدى.

ءتارتىپ ساقشىلارى تۇرعىننىڭ ءۇيىن ءتىنتۋ كەزىندە ونىڭ ءۇيى مەن سارايىنىڭ ىشىنەن ەسىرتكى زاتىنا ۇقساس وزىنە ءتان حوش ءيىسى بار، وسىرۋگە تىيىم سالىنعان، كۇتىپ-باپتالعان وسىمدىكتەر تاپتى. كۇدىككە ىلىنگەن شاردارا اۋدانىنىڭ تۇرعىنى بۇرىن سوتتى بولعان ەكەن.​​​​​​ ونىڭ ۇيىنەن بەس تۇپ ەسىرتكى وسىمدىگىنە ۇقساس وسىمدىك، سونداي-اق بولمەدەن ماريحۋاناعا ۇقساس كەپتىرىلمەگەن وسىمدىك تاركىلەندى. وعان قوسا ەكى ءليترلى 24 دانا شىنى بانكىدە ەسىرتكى زاتىنا ۇقساس زاتتار جانە ءۇي ىشىندە وسىرىلەتىن وسىمدىكتەردى كۇتىپ-باپتاۋعا ارنالعان  ءۇش دانا قۇرىلعىلار الىندى.

جۇرگىزىلگەن ساراپتاما ناتيجەسىندە بەس ءتۇپ وسىمدىك «سورا» ەكەنى انىقتالعان. سالماعى 1،6 كەلىدەن اسادى. ال، بولمەدەن الىنعان وسىمدىك سالماعى 16 گراممنان استام «كەپتىرىلگەن ماريحۋانا» بولىپ شىقتى.​​​​​​​ پوليتسيا ءبولىمىنىڭ حابارلاۋىنشا، اتالعان جايت سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قر قىلمىستىق كودەكسىنىڭ 300-بابى (قۇرامىندا ەسىرتكى زاتتارى بار وسىرۋگە تىيىم سالىنعان وسىمدىكتەردى زاڭسىز ءوسىرۋ) بويىنشا تىركەلگەن.​​​​​​​​​ قازىرگى ۋاقىتتا پوليتسيا قىزمەتكەرلەرى ءىستىڭ تولىق ءمان-جايىن انىقتاپ، كۇدىكتى ءوز ۇيىندە ەسىرتكىنى قانداي ماقساتتا وسىرگەنىن انىقتاۋدا.

سوڭعى جاڭالىقتار

ۇقساس جاڭالىقتار