inform.kz
كۇنى كەشە پرەزيدەنت ق.توقاەۆ تۋيتتەردەگى جەكە پاراقشاسىندا:
– ۇكىمەتتىك كوميسسيانىڭ بارلىق ءىس-ارەكەتىنە قاراماستان, ىندەتكە شالدىققان ازاماتتارىمىز ازايماي وتىر. كوروناۆيرۋستىڭ ەكىنشى تولقىنىنىڭ قاۋپى سەيىلمەگەنىن ددۇ دا راستادى. وتانداستارىمىزدى جاپپاي اۋرۋعا شالدىعۋدان قاشىپ, ىندەتتەن قورعانۋدىڭ جولدارىن (ارا قاشىقتىقتى ساقتاۋ, دەزينفەكتسيا, جەكە تازالىق, بەتپەردە كيۋ) ۇستانۋعا تاعى دا شاقىرامىن, – دەپ جازدى.
شىندىعىندا, قاۋىپتى ىندەتتىڭ بەتى قايتتى دەپ ەركىنسۋگە ءالى ەرتە. دەنساۋلىق ساقتاۋ ءمينيسترى ەلجان ءبىرتانوۆ ايتقان دەرەكتەرگە ۇڭىلسەك, كەرىسىنشە دابىل قاعۋ قاجەت سىڭايلى. سوڭعى دەرەك بويىنشا ەلىمىزدە ۆيرۋس جۇقتىرعانداردىڭ سانى 12 124-تەن استى. ايتەۋىر, ناۋقاستاردىڭ باسىم بولىگى, اتاپ ايتقاندا 77 پايىزى اۋرۋدى جەڭىل وتكىزۋدە. 52 پايىزى ەمدەلىپ شىققانى دا – كوڭىلگە مەدەۋ. ال اۋرۋحانا توسەگىندە جاتقان 5 836 ادامنىڭ 59-ىنىڭ جاعدايى اۋىر. ولاي بولسا, ساقتىقتى ۇمىتقانىمىزعا جول بولسىن!
كوكتەمدى قاتاڭ كارانتين قۇشاعىندا وتكىزگەن ەلىمىز ەكى ايدان استام ۋاقىتقا سوزىلعان توتەنشە جاعدايعا تارتىپپەن توتەپ بەردى. توتەنشە جاعداي توقتاسا دا, كارانتين جالعاساتىنى تۋرالى ەسكەرتۋ از ايتىلعان جوق. الايدا كۇن سايىن جۇزدەگەن ادامنىڭ ۆيرۋس جۇقتىرىپ جاتقانىن ەسكەرسەك, قاۋىپسىزدىك تالاپتارىن قۇلاققا ىلمەي جۇرگەن ءتارىزدىمىز. ماسكانى يەككە ىلە سالىپ, كوشەدە ەركىن سەرۋەندەپ ءجۇرۋ قالىپتى قۇبىلىسقا اينالدى. ايتەۋىر, ەركىنسۋدىڭ سوڭى سان سوقتىرماعاي.
