الەمدى ابىگەرگە سالعان پاندەمياعا قاراماستان وسىناۋ اتاۋلى مەرەكە الماتى قالاسىندا بيىل دا ءداستۇر بويىنشا اتاپ ءوتىلدى. كارانتيندەگى شەكتەۋ شارالارىنا بايلانىستى ونلاين رەجىمىندە قانات قاققان بىرقاتار جوبالاردى جەكەلەي اتاپ وتۋگە بولادى. سونىڭ ءبىرى «جاس وتان» جاستار قاناتىنىڭ ۇيىتقى بولۋىمەن جۇزەگە اسقان ايرىقشا بايقاۋ. الەۋمەتتىك جەلىنىڭ الەۋەتىن ءتيىمدى پايدالانعان جاسوتاندىقتار جەلىدەگى ءتۇرلى پاراقشالاردا قالا تۇرعىندارىن ەلىمىزدىڭ بايراعىمەن تۇسكەن سۋرەتتەرىن جاريالاۋعا شاقىردى. بايقاۋدىڭ باستى شارتى جاريالاعان سۋرەتىڭنىڭ استىنا «مەنىڭ تۋىم, مەنىڭ وتانىم» حەشتەگىن جازىپ قالدىرۋ. ۇيىمداستىرۋشىلاردىڭ سوزىنشە جوباعا كەز-كەلگەن جاستاعى الماتىلىق قاتىسا الادى. جەڭىمپاز دەپ تانىلعان قاتىسۋشىعا مەملەكەتتىك تۋ سىيلىق رەتىندە تابىستالماق. ۇيىمداستىرۋشىلار بايقاۋدىڭ باستى ماقساتى رامىزدەرىمىزگە قۇرمەت كورسەتىپ, جاستار مەن بارشا قوعام وكىلدەرىن وتانسۇيگىشتىككە باۋلۋ ەكەنىن ايتادى.
سونداي-اق الماتىداعى قازاق ۇلتتىق قىزدار پەداگوگيكالىق ۋنيۆەرسيتەتىندە «ۇلتىمىزدىڭ رامىزدەرىن قاستەرلەيىك» اتتى ونلاين كەزدەسۋ ءوتتى. اۋقىمدى تاقىرىپتى ارقالاعان بەينە-كونفەرەنتسياعا بەلگىلى عالىمدار مەن قوعام قايراتكەرلەرى, وقىتۋشىلار مەن ستۋدەنت جاستار قاتىستى.
«تۋىمىزدىڭ, باسقا دا رامىزدەرىمىزدىڭ بيىك تۇرعانى حالىق ابىرويىنىڭ سيمۆولى. ازاتتىقتىڭ التىن بەسىگىنە بالاناتىن شاھارىمىزدا بۇل كۇن ەرەكشە سالتاناتپەن اتالىپ ءوتىلىپ كەلە جاتىر. Nur Otan پارتياسىنىڭ اۋداندىق فيليالدارىندا وسى تاقىرىپتى نەگىزگە العان ونلاين جۇزدەسۋلەر ءوتتى. رامىزدەرىمىزدى قۇرمەتتەۋ – قوعامعا ورتاق بورىش», – دەيدى Nur Otan پارتياسى الماتى قالالىق فيليالى ساياسي جۇمىس ءبولىمىنىڭ مەڭگەرۋشىسى قۋانىش تولەپوۆ.
الماتى
