وبلىس اكىمىنىڭ جۋىردا تاعايىندالعان ورىنباسارى ەرمەك مارجىقباەۆ العاشقى جۇمىس كۇنىن جۋرناليستەردى ششۋچە-بۋراباي كۋرورتتى ايماعىنا الىپ بارۋدان باستادى. ماقسات مەملەكەتتىك باعدارلامانىڭ ماڭىزدى تارماعى – جول قۇرىلىسى ماسەلەلەرىنە نازار اۋدارۋ. شىنىن ايتار بولساق, بۇل وڭىردەگى جول جىرى مەيلىنشە وتكىر كۇيىندە قالۋدا.
وبلىس اكىمىنىڭ جۋىردا تاعايىندالعان ورىنباسارى ەرمەك مارجىقباەۆ العاشقى جۇمىس كۇنىن جۋرناليستەردى ششۋچە-بۋراباي كۋرورتتى ايماعىنا الىپ بارۋدان باستادى. ماقسات مەملەكەتتىك باعدارلامانىڭ ماڭىزدى تارماعى – جول قۇرىلىسى ماسەلەلەرىنە نازار اۋدارۋ. شىنىن ايتار بولساق, بۇل وڭىردەگى جول جىرى مەيلىنشە وتكىر كۇيىندە قالۋدا.سوندىقتان, ءبىز بۇل ساپاردىڭ بەتبۇرىستى سيپاتىن اڭعارعانداي ەدىك.
بيىلعى جىلدىڭ تامىز ايىنان باستاپ ششۋچە قالاسىندا جول جوندەۋ جۇمىستارى قىزۋ جۇرۋدە ەكەن. اتالعان جوبا ششۋچە-بۋراباي كۋرورتتى ايماعىن دامىتۋدىڭ 2012-2013 جىلدارعا ارنالعان جوسپارىنا ەنگىزىلگەن. وسى ماقساتقا رەسپۋبليكالىق بيۋدجەتتەن 529 ميلليون تەڭگە قاراجات ءبولىنىپتى. «كومپانيا ەنەرگودور» جاۋاپكەرشىلىگى شەكتەۋلى سەرىكتەستىگى ءجوندەۋ جۇمىستارىن قازان ايىنىڭ اياعىنا دەيىن اياقتاۋدى مەجەلەپ وتىر. جالپى, 2013-2016 جىلدارى ششۋچە قالاسىندا 57 شاقىرىمدىق كوشە جولدارى قالپىنا كەلتىرىلەدى.
اعىمداعى جىلى بۋراباي كەنتىنىڭ جولدارىن جاڭارتۋعا رەسپۋبليكالىق بيۋدجەتتەن 645 ميلليون تەڭگە ءبولىنىپتى. تۇتاستاي ايتساق, ءۇش جىلدى قامتيتىن جوبا قۇنى 1836,8 ميلليون تەڭگەنى قۇرايدى. جوبا بويىنشا 6,2 شاقىرىمدىق جول ۋچاسكەلەرى جاڭارتىلاتىن بولادى. اۋدان ورتالىعىنداعى ابىلاي حان, ەدومسكي, پريۆوكزالنايا, موروزوۆ كوشەلەرى مەن تەمىر جول بەكەتى ماڭىنداعى اينالما جولدارعا ورتاشا جوندەۋ جۇمىستارى جۇرگىزىلۋدە. سونىمەن قاتار, ستەپنياك, ۆەدەنوۆكا, نيكولاەۆكا, اقىلباي ەلدى مەكەندەرىنە اپاراتىن كۇرەجولدار دا جوندەۋدەن وتۋدە. كەلەسى جىلى قالادا 12 كوشە كۇردەلى جوندەلەدى دەپ جوسپارلانعان.
جاسىراتىنى جوق, قالادا جول جوندەۋ جۇمىستارى وسى ۋاقىتقا دەيىن جۇيەلەنبەي كەلگەن, دەيدى بۋراباي اۋدانىنىڭ اكىمى نۇرلان نۇركەنوۆ. الدىمەن اسفالت توسەپ الىپ, سوسىن ينجەنەرلىك جەلىلەردى تارتاتىن كەلەڭسىزدىك ورىن الىپتى. قازىر كەيبىر كوشەلەردىڭ ءبىر بولىگى جابىلىپ, كارىز كوللەكتورى, جىلۋ ماگيسترالى جاڭارتىلۋدا. قالا تازالىعى, كۋرورتتى ايماقتى دامىتۋ ماسەلەسى دە قولعا الىنعان. بۇگىنگى كۇنى اۋداندا قىسقى جىلۋ ماۋسىمىنا دايىندىق قىزۋ جۇرۋدە. وتكەن جىلى قاقاعان قىس ورتاسىندا قالادا ءبىر قازاندىق ىستەن شىعىپ, ءبىراز قيىندىق تۋىنداعان ەدى. وسىنداي كەلەڭسىزدىك تاعى قايتالانباس ءۇشىن بارلىق جىلۋ جۇيەلەرى تولىق باقىلاۋعا الىنىپ, ەسكىرگەن جىلۋ قازاندىقتارى جوندەۋدەن وتكىزىلدى.
جازداي جاۋعان جاڭبىر كوپتەگەن جۇمىستاردىڭ ۋاقىتىندا اياقتالۋىنا كەدەرگى كەلتىرگەنى كورىنىپ تۇر. وبلىس اكىمىنىڭ ورىنباسارى كۇزدىڭ ءاربىر اشىق كۇنىن ءتيىمدى پايدالانۋ كەرەكتىگىن العا تارتتى. بۇل ءۇشىن جۇمىس كەستەسى قاتاڭ ساقتالۋى ءتيىس. سونىمەن قاتار, اسفالت جانە باسقا قۇرىلىس ماتەريالدارىن ساتىپ الۋ, تاسىمالداۋ دۇرىس ويلاستىرىلۋى كەرەك. مۇندا مەردىگەرلەرمەن ىنتىماقتاسىپ جۇمىس ىستەۋ ەڭبەك ونىمدىلىگىن ارتتىرۋدىڭ شارتى بولماق. كەلەر جىلى جۇمىس اۋقىمى بيىلعىدان گورى كۇردەلەنە تۇسەدى. ۇكىمەت اقمولالىقتارعا كۋرورتتى ايماقتى دامىتۋ ءۇشىن قولايلى مۇمكىندىكتەر تۋدىرىپ وتىر. ەندىگى جەردە جۇكتەلگەن مىندەتتىڭ ويداعىداي ورىندالۋىن قامتاماسىز ەتۋ قاجەت.
باقبەرگەن امالبەك,
«ەگەمەن قازاقستان».
اقمولا وبلىسى,
بۋراباي اۋدانى.
