قىلمىستىق توپ بىرنەشە جىلدار بويى شاردارا سۋ قويماسىنان زاڭسىز بالىق اۋلاپ جۇرگەن. پوليتسيا دەپارتامەنتىندە باق وكىلدەرىمەن بريفينگ وتكىزگەن دەپارتامەنت باسشىسىنىڭ ورىنباسارى قۇرمانبەك ساحوۆ ءساۋىر ايىنىڭ باسىندا دەپارتامەنتكە بەلگىسىز بىرەۋلەر شاردارا سۋ قويماسى اۋماعىندا زاڭسىز بالىق اۋلاۋمەن اينالىساتىنى تۋرالى ارىز كەلىپ تۇسكەنىن ايتتى. اتالعان جايتتى پوليتسيا قىزمەتكەرلەرى قر قىلمىستىق كودەكسىنىڭ 335-بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەپ, جەدەل-ىزدەستىرۋ ءىس-شارالارىن جۇرگىزگەن. كريمينالدىق پوليتسيا قىزمەتكەرلەرى زاڭسىز بالىق اۋلاۋمەن اينالىسقان قىلمىستىق توپتىڭ ىزىنە تۇسكەن. جەدەل ۋاكىلدەر كۇدىكتىلەردى ۇستاۋ ءۇشىن ەكى اي بويى دالەلدەمەلەر جيناقتاپتى. قىلمىستىق كاسىپكە كۇدىكتى بارلىق قاتىسۋشىلاردىڭ بايلانىستارى زەرتتەلگەن. قورىتىندىسىندا, ماۋسىم ايىنىڭ باسىندا پوليتسيا قىزمەتكەرلەرى 10 ادامنان تۇراتىن قىلمىستىق توپتى ۇستادى, ونىڭ ۇشەۋى ايەل. ولاردىڭ بارلىعى تۇركىستان وبلىسى مەن شىمكەنت قالاسىنىڭ 20-دان 53 جاسقا دەيىنگى تۇرعىندارى بولىپ شىقتى.
ايعاقتى زات رەتىندە بالىق اۋلاۋ قۇرالدارى (ەلەكتر قۇرال-جابدىقتارى, جەلىلەر, مەتالل ىلمەكتەر), 13 موتورلى جانە رەزەڭكە قايىقتار, 12 كاليبرلى 389 وقتارى, ءبىر جارىم توننادان استام بالعىن بالىق جانە 425 كيلوگرامم ىستالعان بالىق الىندى. كەلتىرىلگەن ماتەريالدىق شىعىننىڭ جالپى كولەمى 8 000 000-نان استام تەڭگەنى قۇرادى. ق.ساحوۆتىڭ حابارلاۋىنشا, كۇدىكتى رەتىندە ءۇش ادام قاماۋعا الىنىپ, جەتى ادام ەشقايدا كەتپەۋ تۋرالى قولحاتپەن بوساتىلعان. پوليتسيا قىزمەتكەرلەرى براكونەرلەردىڭ ۇيىمداسىپ ارەكەت ەتكەنىن جوققا شىعارمايدى. بۇگىندە سوتقا دەيىنگى تەرگەۋ امالدارى جالعاسۋدا.
تۇركىستان وبلىسى
