مەملەكەتتىك ساياساتقا ساي ۋاقىت اعىمى مەن ەلىمىزدە ارشىنداي العا باسىپ كەلە جاتقان قالانىڭ ءبىرى – تالدىقورعان. جەتىسۋدىڭ كىندىك قالاسى ەكونوميكالىق تۇرعىدان وسكەن سايىن وزگە سالالارى دا دامىعان ۇستىنە دامي تۇسۋدە.
مەملەكەتتىك ساياساتقا ساي ۋاقىت اعىمى مەن ەلىمىزدە ارشىنداي العا باسىپ كەلە جاتقان قالانىڭ ءبىرى – تالدىقورعان. جەتىسۋدىڭ كىندىك قالاسى ەكونوميكالىق تۇرعىدان وسكەن سايىن وزگە سالالارى دا دامىعان ۇستىنە دامي تۇسۋدە.مۇنى «قازاقستان-2050» ستراتەگياسىندا ايتىلعانداي, ەلىمىز الداعى ۋاقىتتا الەمدەگى دامىعان 30 ەلدىڭ قاتارىنا ەنۋگە ۇمتىلىپ وتىرعاندا وڭىرلەردى وركەندەتۋگە وزىندىك ۇلەس قوسىپ, يگى قادامنىڭ ماڭىزدىلىعىن باعالاي ءبىلۋ دەپ تۇسىنگەن ءجون. سوندىقتان تالدىقورعاننىڭ بۇگىنگى قوعامدا الاتىن ورنى دا ەرەكشە. قالا كۇنى مەرەكەسىن جالپىحالىقتىق دۋمانعا اينالدىرا بىلگەن تالدىقورعاندىقتار ماقساتى بارىن حالقىنا كورسەتىپ, باعالاتۋ بولدى. قالا كۇنى شاراسى اياسىندا اپتا بويى مادەنيەت, ادەبيەت, سپورت سەكىلدى سان سالا بويىنشا قالالىق, وبلىستىق, رەسپۋبليكالىق دەڭگەيلەردە يگىلىكتى ىستەر اتقارىلىپ, جەتىسۋدىڭ كىندىك قالاسىندا مەرەكەلىك ادەمى ءبىر لەپ ەستىرىپ تۇردى. الماتى وبلىسى اكىمىنىڭ ورىنباسارى تىنىشباي دوسىمبەكوۆ باستاپ تالدىقورعان قالاسىنىڭ اكىمى ەرمەك الپىسوۆ قوستاپ سول قۋانىشتى ەلمەن ءبولىستى. قالىپتاسقان ءداستۇر بويىنشا «داڭق وبەليسكىنە» گۇل شوقتارى قويىلعان سوڭ, تالدىقورعان اسكەري گورنيزونى تەحنيكالارىنان قويىلعان كورمە تاماشالاندى. ارينە, مەملەكەتتىك ساياساتقا ساي تاتۋلىقتى ءھام ىنتىماقتى پاش ەتەتىن ەتنومادەني بىرلەستىكتەردىڭ قولونەر بۇيىمدارى مەن ءدامى ءتىل ۇيىرەتىن اسپازدىق كورمەسى دە مەرەكەلىك شارانىڭ ءسانىن ارتتىردى. «قۋانسا بالا قۋانسىن» دەگەن ەمەس پە حالقىمىز. تالدىقورعانداعى ورتالىق الاڭ قۇددى بۇلدىرشىندەر الەمىنە اينالعان ىسپەتتى. تىلدەرىنەن بال تامعان بالدىرعاندار ونەرىن كورۋدىڭ ءوزى ءبىر عانيبەت. «قوشاقانىم قايدا ەكەن», «ايگولەك», «اق مامام», «مەكتەبىم» اتتى اندەردى ناقىشىنا كەلتىرە شىرقاپ, مىڭ بۇرالا بيلەگەن بالدىرعاندار, ويىنشىقتار الەمى, سۋرەتكە ءتۇسىرۋ گالەرەياسى, قىلقالام شەبەرلەرى تۋىندىلارى, سونداي-اق ەرتەگىلەر الەمىنە ساياحات اتتى اسفالتتا سۋرەت سالۋ شارالارى دا بالالاردىڭ شادىمان شاتتىققا بولەنگەنىنىڭ ءبىر ايعاعى. «سپورت جەڭىسى – قالا جەڭىسى» اتتى سپورت اللەياسىندا پاركۋر, ارمرەسلينگ, گىر كوتەرۋ, «Street workout» جاتتىعۋلارى, ارقان تارتۋ حالىقتى جەلپىنتىپ, سەرپىلتسە, كاسىبي سپورتشىلاردىڭ كۇرەس, بوكس, شىعىس جەكپە-جەگى تۇرلەرىنىڭ تاسىلدەرىن اسقان شەبەرلىكپەن كورسەتكەنى ەل مەرەيىن اسىرا ءتۇستى. شاعىن جانە ورتا بيزنەس سالاسىنىڭ جەتىستىكتەرىمەن قاتار, ەلىمىزگە تانىمال زاۋىتتاردىڭ ارناۋلى قۇرال-جابدىقتار كورمەسى دە نازار اۋدارارلىق بولدى. ويتكەنى, بۇل ءوندىرىس ورىندارىنىڭ ونىمدەرى مەملەكەتتىك باعدارلامالار ارقىلى كولەمىن ارتتىرىپ, الىس-جاقىن شەتەلدەرگە ەكپورتقا شىعارىلاتىنى تاعى بار. ەلدى ەلەڭ ەتكىزگەن تاعى ءبىر جاڭالىق قالا كۇنىنە وراي كونديتەرلەر قولىنان شىققان ءدامى ءتۇل ۇيىرەرلىك سالماعى 80 كگ. الىپ تورتتان حالىق اۋىز ءتيىپ, مارە-سارە بولدى. جاسىل الاڭدا 120 جاساندى گۇل رەتىمەن اشىلىپ, ىشىنەن وڭىرگە تانىمال ءانشى شىعىپ, تامىلجىتا ءان سالعاندا حالىق, ءتىپتى ءماز بولدى. البەتتە, اسەم ءاننىڭ اۋەنىمەن جاسىل الاڭدا جەتىسۋدىڭ جەتى وزەنىن بەينەلەگەن جولاق سىزىلىپ بيگە دە كەزەك ءتيدى. ورتالىق ستاديوندا قالا كۇنىنىڭ نەگىزگى ءبولىمى مەملەكەتتىك انۇرانمەن باستالىپ, تالدىقورعان قالاسىنىڭ اكىمى ەرمەك الپىسوۆ وسى ءوڭىردىڭ وركەندەۋىنە وزىندىك ۇلەسىن قوسقان جاندارعا تالدىقورعان قالاسىنىڭ قۇرمەتتى ازاماتى اتاعىن تاپسىرۋمەن جالعاستى.
نۇربول الدىباەۆ,
«ەگەمەن قازاقستان».
الماتى وبلىسى.
