فازىلجانوۆا انار مۇراتقىزى – ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى بولىپ تاعايىندالدى. 2018 جىلدان باستاپ شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ عالىم حاتشىسى قىزمەتىن اتقارعان انار فازىلجانوۆا فيلولوگيا عىلىمدارىنىڭ كانديداتى بولىپ تابىلادى. ول ا. بايتۇرسىن ۇلى اتىنداعى ءتىل ءبىلىمى ينستيتۋتىندا 22 جىل جۇمىس ىستەپ, جەتەكشى عىلىمي قىزمەتكەردەن باستاپ عىلىمي حاتشى مەن ينستيتۋت ديرەكتورىنىڭ ورىنباسارىنا دەيىنگى بارلىق ساتىلارىنان وتكەن.
انار فازىلجانوۆا – ينتوناتسيا, ينتونولوگيا, فونەتيكا, ورفوەپيا, تاريحي فونەتيكا, لەكسيكوگرافيا, ۇشتىلدىلىك, ءالفاۆيتتى اۋىستىرۋ جانە مەملەكەتتىك ءتىلدىڭ باسقا دا ماسەلەلەرى بويىنشا 200-دەن استام عىلىمي جاريالانىمنىڭ اۆتورى. سونداي-اق, لاتىن گرافيكاسى نەگىزىندەگى قازاق ءالفاۆيتىنىڭ تەوريالىق جانە پراكتيكالىق نەگىزدەرى بويىنشا ۆيدەولەكتسيالاردىڭ تسيكلدارىن كوپشىلىككە تاراتۋ جەلىسىندە ازىرلەنگەن «دۇرىس سويلەيىك» (kitap.kz) پودكاستىنىڭ اۆتورى.
انار مۇراتقىزى – جاس عالىمدارعا ارنالعان عىلىم مەن تەحنيكا سالاسىنداعى سىيلىقتىڭ لاۋرەاتى جانە تۇڭعىش پرەزيدەنتى قورى گرانتىنىڭ يەگەرى;
ءماسىمحان ۇلى دۇكەن – ر. سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى بولىپ تاعايىندالدى. پەكين قالاسىنداعى ورتالىق ۇلتتار ۋنيۆەرسيتەتىنىڭ تۇلەگى, فيلولوگيا عىلىمدارىنىڭ دوكتورى, پروفەسسور دۇكەن ءماسىمحان ۇلى 90-شى جىلداردىڭ باسىندا تاريحي وتانىنا ورالىپ, وقىتۋشىلىق جانە عىلىمي زەرتتەۋ جۇمىستارىمەن اينالىستى.
دۇكەن ءماسىمحان ۇلى «قىتاي تۋرالى قىرىق ءسوز», «قىتايشا-قازاقشا ۇلكەن سوزدىك», ءۇش تومدىق «دۇكەن ءماسىمحان ۇلى. تاڭدامالى», بەس تومدىق «قىتاي ادەبيەتىنەن تاڭدامالى ۇلگىلەر» كىتاپتارىنىڭ اۆتورى. د. ءماسىمحان ۇلىنىڭ 300-دەن استام عىلىمي جانە ادىستەمەلىك جۇمىستارى شەتەلدىك باسىلىمداردا جانە ەلىمىزدىڭ جەتەكشى باسىلىمدارىندا جارىق كوردى;
ءابىل ەركىن امانجول ۇلى – مەملەكەت تاريحى ينستيتۋتىنىڭ ديرەكتورى بولىپ تاعايىندالدى. تاريح عىلىمدارىنىڭ دوكتورى, پروفەسسور ەركىن امانجول ۇلى ءوز ەڭبەك جولىن وقىتۋشى بولىپ باستاعان. ءار جىلدارى قوستاناي مەملەكەتتىك پەداگوگيكالىق ينستيتۋتىنىڭ عىلىمي جۇمىس جانە شەتەلدىك بايلانىس جونىندەگى پرورەكتورى, ءو. سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ رەكتورى بولىپ جۇمىس ىستەدى.
ەركىن امانجول ۇلى – 200-دەن استام عىلىمي باسىلىمداردىڭ, سونىڭ ىشىندە 22 مونوگرافيا, 26 وقۋلىق پەن وقۋ قۇرالدارىنىڭ, سونىمەن قاتار ISI, Scopus بازالارىنا كىرەتىن جۋرنالداردا جارىق كورگەن 7 ماقالانىڭ اۆتورى. «قازاقستان حالقى اسسامبلەياسىنا 20 جىل», «قازاقستان رەسپۋبليكاسىنىڭ تاۋەلسىزدىگىنە 25 جىل», «قازاقستان ءماسليحاتتارىنا 25 جىل» مەرەيتويلىق مەدالدارىمەن جانە «قازاقستان رەسپۋبليكاسىنىڭ عىلىمىن دامىتۋعا سىڭىرگەن ەڭبەگى ءۇشىن», ء«بىلىم جانە عىلىم قىزمەتكەرلەرى كاسىپوداعىنىڭ قىزمەتىنە سىڭىرگەن ەڭبەگى ءۇشىن» توسبەلگىلەرىمەن ماراپاتتالعان. 2014 جىلى ەركىن ءابىل جوعارى وقۋ ورنىنىڭ ۇزدىك وقىتۋشىسى اتانعان.
