ال وبلىس اۋماعىنداعى بالالار ساۋىقتىرۋ ورتالىقتارى 15 ماۋسىمنان ءوز جۇمىسىن باستاۋى مۇمكىن. وبلىستىق كاسىپوداقتار ورتالىعى وسى ماسەلەلەردى پىسىقتاپ, ارنايى جيىن وتكىزدى. قازىر جۇرت جازعى دەمالىسىن جوسپارلاۋدى باستادى. بىراق بيىلعى ەپيدەميولوگيالىق جاعداي جازعى ساۋىقتىرۋ ورتالىقتارىنىڭ جۇمىسىنا اسەرىن تيگىزبەي قويمادى.
– مەنىڭ ويىمشا بيىل باعا 10-15 پروتسەنتكە ءوسۋى مۇمكىن. ءبىز بارلىق ساۋىقتىرۋ ورتالىقتارىن تۇگەندەۋ كەزىندە تاعى قوسىمشا 5 نىسان تاپتىق. ولار قورعالجىن, ساندىقتاۋ اۋداندارىنداعى وڭتايلاندىرىلعان مەكتەپتەر. قازىر ولاردىڭ جۇمىسىن جانداندىرۋ ماسەلەسى قاراستىرىلۋدا, – دەيدى رەسپۋبليكالىق بالالار مەن جاسوسپىرىمدەر ءتۋريزمى قاۋىمداستىعىنىڭ توراعاسى قايرات سۇلتانوۆ.
ال وبلىستىق كاسىپوداقتار ورتالىعى تاراپىنان جەڭىلدىكتەر قاراستىرىلاتىندىعى ايتىلدى. ويتكەنى جازعى ساۋىقتىرۋ ورىندارىمەن وسى جونىندە الدىن الا كەلىسىم-شارتتار جاسالعان. ياعني, كاسىپوداق مۇشەسى مەن ولاردىڭ بالالارىنا جولداما قۇنى تومەندەتىلگەن باعامەن بەرىلەدى.
