بۇگىندە بۇعان دەيىن ەل پرەزي­دەن­تى­نىڭ قولىنان ىشكى ىستەر مينيسترلىگىنە قاراستى جوعارى وقۋ ورىندارىنىڭ ديپ­­لومى مەن العاشقى ارناۋلى اتا­عىن العان ورەندەر ەلىمىزدىڭ بار­لىق اي­ماقتارىندا جەمىستى قىزمەت اتقا­رىپ ءجۇر. سولاردىڭ ءبىرى – نۇر-سۇلتان قا­لاسى سارىارقا اۋداندىق پوليتسيا باس­قارماسىنىڭ تەرگەۋشىسى نازگۇل قوجامجاروۆا.

«2015 جىلى ىشكى ىستەر مينيس­ترلىگىنە قا­راس­تى ب.بەي­سە­نوۆ اتىن­دا­عى قارا­عاندى اكا­­دە­مياسىنىڭ تابالدىرىعىن ات­تاپ، 2019 جىلى ونى ۇزدىك ديپلوممەن، سوتقا دەيىنگى تەر­گەپ-تەكسەرۋ ماماندىعى بويىنشا ءبىتىردىم. ەڭ العاشقى ارناۋلى اتا­عى­مىز­دى مەملەكەت باسشىسى قاسىم-جومارت توقاەۆتىڭ قولىنان الدىم. بۇل ۇلكەن ومىرگە قادام باسقالى تۇرعان ماعان ەرەكشە اسەر ەتتى»، دەيدى نازگۇل.

ءبىزدىڭ كەيىپ­كە­رى­مىز بۇل مامان­دىق­­تى بالا كەزىندە تاڭداعان ەكەن.

«اكەم دە ىشكى ىستەر دەپارتا­مەن­تىن­­دە قىزمەت ەتتى، قازىر زەينەتتە. اكەمە ۇق­سا­عىم كەلىپ، وسى سالا­دا جۇمىس ىستەۋ­دى مەكتەپ قابىرعاسىندا جۇرگەن كەزدەن جوسپارلادىم. قاراعاندى اكادەمياسىنا وقۋعا ءتۇسىپ، وقىتۋشىلارىمىزدىڭ بەرگەن ءبىلىمىن بويعا سىڭىرۋگە تىرىستىم. وسىلايشا ۇز­دىك­­تەر اراسىنان كورىندىم. قا­تە­لەس­پەسەم، 2019 جىلى اكادەميانى 208 تۇلەك بىتىر­دىك. سولاردىڭ ىشىندە 8-ءى ۇزدىك ديپ­لوم الدى. ال­بەتتە، ديپلوم مەن العاشقى شە­نى­مىزدى پرەزيدەنتتىڭ ءوزى تا­بىس­تاي­تى­نىن ەستىگەندە قاتتى قۋان­دىم. بۇل – وقۋىڭنىڭ، بىرنەشە جىل­دىق ەڭبە­گىڭ مەن ىزدەنىسىڭنىڭ جە­مىسى. پرە­زيد­ەنتتىڭ قاسىندا تۇرۋ، ونىڭ الدىندا سويلەۋ مەن ءۇشىن ۇمى­تىل­ماس ءسات بولدى. ونىڭ ۇستىنە مەم­لەكەتتىك رامىز­دەر كۇنى تۋ كوتە­رۋ راسىمىنە قاتى­سىپ، جالاۋى­مىز جەلبىرەپ تۇر­عاندا ماڭىز­دى قۇجات الۋ ما­عان ۇلكەن جا­ۋاپ­كەرشىلىك جۇك­­­تە­گەن­دەي بولدى. سول جەر­­دە بول­­­عان ءار­­بىر تۇلەكتىڭ ەلىمىزگە دەگەن سۇ­يىس­پەن­شى­لى­گى ارتا تۇس­كە­نىنە سەنىم­دى­مىن.

ارينە تەوريا مەن تاجىريبەنىڭ ايىر­ماشىلىعىن جۇمىسقا كەلىپ ءتۇ­سىن­دىم. قاراعاندى اكادەمياسىنىڭ ءبىر جاقسى تۇسى، وقىتۋشىلاردىڭ كوبى تەرگەۋشى بولىپ جۇمىس ىستەگەن پراك­تيك ماماندار. جۇمىستىڭ وڭايى بول­ماي­دى عوي. الايدا ءبىزدىڭ سالانىڭ دا ءوز قىزىعى بار. قازىر ەلىمە ادال قىزمەت ەتسەم، وسى سالانىڭ دامۋىنا ۇلەس قوسسام، ءالى دە تالاي ارناۋلى اتاق­تار­عا قول جەتكىزسەم دەپ ويلايمىن»، دەيدى ول.

نازگۇل قوجامجاروۆانىڭ نەگىزگى ماقساتتارىنىڭ ءبىرى – كەلەشەكتە قا­زاق­ستان پوليتسەيلەرىنىڭ مارتەبەسىن كوتە­رۋ­گە، وڭ ءيميدجىن قالىپتاستىرۋعا كۇش سالۋ.

ال قازىر نۇر-سۇلتان قالاسىندا قىزمەت ەتەتىن پوليتسيا ينسپەكتورى رۋسلان يلياسوۆ 2 جىل بۇرىن ءدال وسى مەملەكەتتىك رامىزدەر كۇنى سول كەزدەگى ىشكى ىستەر ءمينيسترى قالمۇحانبەت قا­سى­­موۆتان العاشقى ارناۋلى اتاعىن ال­ىپتى.

«ديپلومىمدى استاناعا بارىپ الا­تى­نىمىزدى ەستىگەندە ەرەكشە سەزىمدە بولدىم. قاتتى قۋاندىم. سودان، باس قالاعا كەلىپ سالتاناتتى جيىندا مينيستردەن ارناۋلى اتاق الدىم. ەلور­دا­عا اتا-انام دا بىرگە كەلىپ، بارلىعى قۋانىشىما ورتاقتاستى. شىنىمەن، ومىر­دەگى ماڭىزدى كۇنىڭنىڭ مەملەكەت ءۇشىن ماڭىزدى مەرەكەلەردىڭ ءبىرى – مەملەكەتتىڭ رامىزدەر كۇنىمەن سايكەس كەلۋى، ونىڭ ۇستىنە ۇلگى الاتىن ۇلكەن تۇلعا­لاردىڭ سول راسىمدە اق تىلەگىن ەس­تۋىڭ ايرىقشا سەزىمگە بولەمەي قوي­ماي­دى ەكەن.

مەن بالا كەزىمنەن پوليتسيا بولسام دەپ ارماندادىم. ارمان قۋىپ قوستانايداعى شىراقبەك قابىلباەۆ اتىن­داعى قوستاناي اكادەمياسىنا اكىم­شىلىك قۇقىق ماماندىعىنا وقۋعا ءتۇستىم. اكادەميانى قىزىل ديپلومعا اياقتايمىن دەگەن ماقساتىم بولدى. ءساتىن سالىپ، ول ارمانىما دا جەتتىم»، دەيدى رۋسلان.

رۋسلان يلياسوۆ وزىنە جۇكتەلگەن مىندەتتى ابىرويمەن اتقارىپ جۇرگەن مامانداردىڭ قاتارىندا. ول ۇزدىك ديپلوم يەگەرلەرىنە جۇمىس ورنىن تاڭداۋ قۇقىعى بەرىلەتىنىن پايدالانىپ، نۇر-سۇلتان قالاسى ەسىل اۋدان­دىق پوليتسيا باسقارماسى جەرگى­لىكتى پوليتسيا قىزمەتى بولىمىنە جۇ­مىسقا تۇرادى.

«2018 جىلدان بيىلعا دەيىن ۋچاس­كە­لىك پوليتسيا ينسپەكتورى بولىپ قىز­مەت ەتتىم، اعا لەيتەنانت اتاندىم. ءبىز وتباسىداعى جانجالدان باستاپ، ۇلكەن قىلمىستارمەن جۇمىس ىستەيمىز. مۇ­نىڭ ءبارى – ەلدەگى جاعدايدىڭ كو­رىنىسى. پوليتسيا تەك قىلمىستى اشكە­رەلەپ قويماي، ونىمەن كۇرەسۋ، قىل­مىس­تىڭ الدىن الۋ جولدارىن ىزدەيدى. سوندىقتان ءوز سالامنىڭ ۇزدىك مامانى بولۋعا تىرىسىپ ءجۇرمىن»، دەيدى جاس مامان.

ۇزدىك تۇلەكتەرگە ارناۋلى اتاق­تار­­دى 4 ماۋسىمدا تابىستاۋ ۇزاق جىل­­­دار­دان بەرى جالعاسىپ كەلە جات­قان ءداس­تۇرلى ءىس-شارا. وسىناۋ مەرە­كە كۇنى  پرە­زيدەنتتىڭ، سونداي-اق سالا باس­شى­سى­­نىڭ اق تىلەگىن ەستىپ، ۇل­كەن ومىرگە جول­داما العان جاس مامانداردىڭ ەلىمىز ءۇشىن ايانباي قىزمەت ەتە بەرەتىنىنە سەنىمىمىز مول.