ەگەمەندىكتىڭ ەلەڭ-الاڭىندا ەرتە قامدانىپ, ەلدىك سيپاتىمىز – تۋ, ەلتاڭبا جانە گيمندى بەكىتۋ ماڭىزدى بولدى. قولعا الىنعان قاجەتتى ءىس-شارالاردىڭ شەڭبەرىندە مەملەكەتتىك رامىزدەر جاسالىپ, حالىقتىڭ كەڭ تالقىسىنا سالىنىپ, ارنايى قۇرىلعان مەملەكەتتىك كوميسسيانىڭ ساراپتاماسىنان ءوتتى. ءسويتىپ رەت-رەتىمەن نىشاندارىمىز بەكىتىلىپ, تۋ مەن ەلتاڭبا ناقتىلانعان 4 ماۋسىم كەيىننەن مەملەكەتتىك رامىزدەردىڭ اتاۋلى كۇنى بولىپ ەرەكشەلەندى.
ال رامىزدەردىڭ دۇرىس قولدانىلۋى مەن ناسيحاتتالۋىنا جاۋاپتى ينستيتۋت رەتىندە 1997 جىلى پرەزيدەنت جانىنان مەملەكەتتىك رامىزدەر جونىندەگى رەسپۋبليكالىق كوميسسيا قۇرىلدى. اتالعان كوميسسيا 2016 جىلى تامىزدا پرەزيدەنت جانىنداعى كونسۋلتاتيۆتى-كەڭەسشى ورگانداردى وڭتايلاندىرۋ اياسىندا ۆەدومستۆولىق جانە ولارعا تەڭەستىرىلگەن وزگە دە ناگرادالار جونىندەگى گەرالديكالىق كوميسسياسىمەن بىرىكتىرىلدى. بۇعان كوميسسيالار مىندەتتەرىنىڭ ۇقساستىعى جانە قارايتىن ماسەلەلەرىنىڭ كەي كەزدە ءبىر-بىرىمەن ۇشتاساتىنى سەبەپ بولدى.
بۇگىندە مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيا وزىنە جۇكتەلگەن سالانىڭ جۇمىسىن ءتيىمدى ۇيلەستىرىپ وتىر. قازاقستاندىق ءپاتريوتيزمدى ناسيحاتتاۋ, ەلدىڭ الەۋمەتتىك-ەكونوميكالىق جەتىستىكتەرى ءۇشىن ماقتانىش سەزىمىن قالىپتاستىرۋ, وسكەلەڭ ۇرپاقتى تاۋەلسىزدىك بەلگىلەرىنە قۇرمەتپەن قاراۋعا تاربيەلەۋ سياقتى باعىتتاردا جۇمىس جۇرگىزىلىپ جاتىر.
مەملەكەتتىك رامىزدەرگە قاتىستى ۇسىنىستاردى قاراۋ بارىسىندا حالىقتىڭ دا پىكىرى ەسكەرىلەدى. ايتالىق, 2005 جىلى قالىڭ جۇرتتىڭ قولداۋىمەن ءشامشى قالداياقوۆتىڭ اقىن جۇمەكەن ناجىمەدەنوۆتىڭ ولەڭىنە جازىلعان «مەنىڭ قازاقستانىم» ءانىن مەملەكەتتىك گيمن ەتۋ ماسەلەسى كوتەرىلدى. كوپتىڭ تىلەگىن قۇپ كورگەن ەلباسى اتالعان ولەڭنىڭ كەيبىر تۇستارىنا ءوز تاراپىنان وزگەرىستەر ەنگىزىپ, مەملەكەتتىك ءارى حالىقتىق سيپاتىن كۇشەيتتى. ءسويتىپ بۇرىننان ەلدىڭ ىقىلاسىنا بولەنىپ, اسقاق شىرقالىپ جۇرگەن بۇل ءان 2006 جىلى مەملەكەتتىك گيمن بولىپ قابىلداندى.
سونىمەن قاتار وسىدان ەكى جىل بۇرىن ەلتاڭبامىزعا قاتىستى ەلەۋلى وزگەرىس بولدى. ەلباسىنىڭ قازاق ءتىلى ءəلىپبيىن كيريلليتسادان لاتىن گرافيكاسىنا كوشىرۋ تۋرالى جارلىعىنا سəيكەس ەلتاڭبامىزداعى «قازاقستان» ءسوزى «QAZAQSTAN» بولىپ جازىلا باستادى. بۇرىنعى نۇسقادا جاسالعان ەلتاڭبالاردى پايدالانۋ مەرزىمى جەتكەنشە, ياعني 2022 جىلعا دەيىن قولدانا بەرۋگە بولادى. مەملەكەتتىك ەلتاڭبانىڭ ورتالىق گەرالديكالىق ەلەمەنتى – كوگىلدىر ءتۇس اياسىنداعى شاڭىراق بەينەسى, شاڭىراقتى اينالا كۇن سəۋلەسى سەكىلدى تاراعان ۋىقتار, شاڭىراقتىڭ وڭ جاعى مەن سول جاعىنا اڭىزدارداعى قاناتتى پىراقتار, جوعارعى بولىگىندەگى كولەمدى بەس بۇرىشتى جۇلدىز بەينەسى سول كۇيىندە ساقتالىپ, «QAZAQSTAN» دەگەن التىن تۇستەس جازۋى بار ەلتاڭبانىڭ العاشقىسى اقوردا رەزيدەنتسياسىنا ءىلىندى.
مەملەكەتتىك رامىزدەردىڭ مارتەبەسىنە جاۋاپتى كوميسسيانىڭ قازىرگى كەزگە دەيىن 50-گە جۋىق وتىرىسى ءوتىپ, ەلدىڭ پاتريوتتىق ساياساتىن قالىپتاستىرۋدا ەلەۋلى جۇمىستار اتقارىپ كەلەدى. كوميسسيانىڭ وتىرىسى قاجەت بولعاندا جاعدايدا وتكىزىلە بەرەدى. بىراق كوميسسيا مۇشەلەرى جىلىنا كەمىندە ەكى رەت مىندەتتى تۇردە جينالىپ تۇرادى. مىسالى, بىلتىر كوميسسيانىڭ ەكى وتىرىسى ءوتىپ, كۇن تارتىبىندە ءبىلىم جانە عىلىم جۇيەسىندەگى, ۇلتتىق ەكونوميكا مينيسترلىگىندەگى مەملەكەتتىك رامىزدەردى ناسيحاتتاۋ جانە قولدانۋ جۇمىستارىنىڭ جاعدايى باعامدالىپ, شىمكەنت, الماتى قالالارى, سونداي-اق تۇركىستان, شىعىس قازاقستان, باتىس قازاقستان وبلىستارىنىڭ جۇمىس تاجىريبەسى قارالدى. بۇعان قوسا وسى جيىنداردا ۆەدومستۆولىق ناگرادالاردى بەكىتۋ ماسەلەسى دە قوزعالدى.
اتالعان كوميسسيا مەملەكەتتىك رامىزدەرگە قۇرمەتتىڭ كەمىمەۋىن جان-جاقتى قاداعالاپ وتىرادى. كوميسسيا قۇرامىنا پارلامەنت دەپۋتاتتارى, مينيسترلەر, ىقپالدى قوعامدىق ۇيىمداردىڭ وكىلدەرى, قوعام قايراتكەرلەرى مۇشە رەتىندە ەنگەن. وسى كوميسسيانىڭ ءبىر مۇشەسى – پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ توراعاسى بەيبىت مامراەۆ.
– ەلىمىزدىڭ وبلىستارى مەن قالالارى اكىمدىكتەرىنىڭ جانىنان مەملەكەتتىك رامىزدەر جونىندەگى كوميسسيالار قىزمەتى جولعا قويىلعان. ولاردىڭ جۇمىسىن رەسپۋبليكالىق كوميسسيا ۇيلەستىرىپ وتىرادى. سوندىقتان رامىزدەردىڭ بەلگىلەنگەن ستاندارتتارعا ساي كەلۋى مەن ورنالاسۋ تارتىبىنە باسا كوڭىل بولىنەدى. سونداي-اق رامىزدەردىڭ ب ۇلىنبەۋى, ەسكىرگەنىن جاڭالاپ وتىرۋ, دۇرىس پايدالانۋ جۇمىستارى بارىنشا باقىلانادى. الەمدىك, حالىقارالىق ءىرى سپورتتىق جارىستاردا گيمننىڭ دۇرىس قولدانىلماۋى سياقتى ولقىلىقتار ورىن العانىن بىلەمىز. مۇنداي جاعدايلارعا جول بەرمەۋدى سىرتقى ىستەر مينيسترلىگى نازارىندا ۇستاعان ءجون. سونداي-اق «تاربيە باسى – تالبەسىك» دەگەندەي, بالدىرعانداردى وتانسۇيگىشتىككە باۋلۋ ءۇشىن بالاباقشالار مەن مەكتەپتەردە رامىزدەردىڭ مارتەبەسىنە ساي قولدانىلۋى اسا ماڭىزدى, – دەيدى بەيبىت مامراەۆ.
مەملەكەتتىك رامىزدەردىڭ دۇرىس قولدانىلۋىنا قاتىستى ۇكىمەتكە ارتىلاتىن جاۋاپكەرشىلىكتىڭ جۇگى سالماقتى. جالپى رامىزدەردىڭ اياقاستى بولىپ, ءتارتىپ بۇزىلعان جاعدايلار كەزدەسكەن. بىراق بيىل دا, بىلتىر دا رەسپۋبليكا بويىنشا رامىزدەردى قورلاۋ فاكتىسى تىركەلمەگەن ەكەن. بۇل تۋرالى ارنايى كوميسسياعا مۇشە ىشكى ىستەر ءمينيسترى ەرلان تۇرعىمباەۆ ايتىپ بەردى.
– تاۋەلسىزدىگىمىزدىڭ ايعاعىنداي رامىزدەرگە قۇرمەتپەن قاراۋ – وسى ەلدىڭ ءاربىر ازاماتىنا مىندەت. ەلدىك نىشاندارعا نۇقسان كەلمەي, مارتەبەسىنە لايىقتى بولۋى ارنايى كوميسسيانىڭ نازارىنان تىس قالعان ەمەس. ءبىز ءوز تاراپىمىزدان قوعامدىق ءتارتىپتىڭ ساقتالۋىمەن قاتار رامىزدەردىڭ دۇرىس قولدانىلۋىن ۇنەمى قاداعالاپ وتىرامىز. كەيىنگى كەزدەرى رامىزدەردى قورلاۋ فاكتىسى بولعان جوق. تەك بيىلعى بەس ايدا رامىزدەردى قولدانۋ ءتارتىبىن بۇزۋ, ستاندارتتارىن ساقتاماۋعا قاتىستى 14 ۇيىمعا ايىپپۇل سالىندى. جالپى, ساقشىلارىمىز بۇل ىسكە كەلگەندە قىراعى. رەتى كەلگەندە ولار ازاماتتارعا مەملەكەتتىك رامىزدەردىڭ دۇرىس قولدانىلۋىنىڭ ءجونىن ايتىپ, كەڭەستەرىن دە بەرىپ جاتادى. كوك تۋىمىز كوكتە جەلبىرەگەن سايىن رۋحىمىز دا اسقاقتاپ, ەڭسەمىز دە بيىكتەيدى, – دەيدى ەرلان تۇرعىمباەۆ.
راسىندا, ەلدىگىمىزدىڭ بەلگىسى مەملەكەتتىك رامىزدەردىڭ مارتەبەسىنە ۇلكەن ءمان بەرىپ قاراۋىمىز كەرەك. كوك تۋدىڭ ءتۇسىنىڭ وڭىپ كەتپەۋى, جىرتىلماۋى, تۇعىرىنا ورالىپ قالماۋى نازاردا بولۋى ءتيىس. ەلتاڭبانىڭ دا عيماراتتاردا ەرەجەگە سايكەس ىلىنگەنى دۇرىس. ازاتتىقتىڭ ايشىقتارىنا ايرىقشا قۇرمەت كورسەتسەك, ەلىمىز ايبىندى دا ايبارلى بيىگىنەن تۇسپەيدى.
