قازىر عانا استاناداعى «استانا-ارەنا» سپورت كەشەنىندە ەۋروپا ليگاسى توپتىق سايىسى 2-تۋرىنىڭ قاراعاندىنىڭ «شاحتەرى» مەن ءيزرايلدىڭ حايفا قالاسىنىڭ «ماككابيى» اراسىنداعى ماتچى اياقتالدى. كەزدەسۋ 2:2 ەسەبىمەن تەڭ اياقتالدى. بۇل تۋرالى Egemennews.kz ءتىلشىسى حابارلادى.
كوماندالار الاڭعا مىنا قۇرامدا شىقتى:
«شاحتەر» - الەكساندر موكين, ەۆگەني تاراسوۆ, الدين دجيديچ, نيكولا ۆاسيلەۆيچ, سەرگەي مالىي, الەكساندر سيمچەۆيچ, گەۆورگ كازاريان, روحەر كانياس, گەديميناس ۆيچيۋس, اندرەي فينونچەنكو, سەرگەي حيجنيچەنكو.
«ماككابي» - شارانوۆ, تۆاتحا, گاباي, پيلياۆسكي, رايو, گولاسا, تسوتساليچ, يادين, ندلوۆۋ, رايان, ابۋحازيرا.
كەنشىلەر ۇجىمى ويىن باستالعان ساتتەن باستاپ بىردەن ونىڭ تىزگىنىن ءوز قولدارىنا الدى. ولار العاشقى 15 مينۋتقا ءدايىن قارسىلاستارىن ءوز الاڭدارى ماڭىنا قىسىپ ۇستاپ, ءتىپتى شابۋىل تۋرالى ويلاۋعا دا مۇرشا بەرمەدى. بىراق قاراعاندىلىقتار بۇل باسىمدىقتان ءتيىستى ناتيجە شىعارا المادى. ولار وسى ۋاقىتتاردا 2-3 گول سوعاتىنداي مۇمكىندىكتەردى جىبەرىپ الدى.
شامامەن, تايمنىڭ ورتاسىنا قاراي قوناقتار باس كوتەرىپ, الاڭ يەلەرى قاقپاسىنا قاراي العاشقى جورىقتارىن ۇيىمداستىردى. سول مەزەتتەردە ولار بەرەر رەت قاقپاعا شىن قاۋىپ تە ءتوندىرىپ ۇلگەردى. وسى تۇستا ولار ءبىرىنشى رەت بۇرىشتاما دا بەرىپ كوردى. دەگەنمەن, بۇل الما-كەزەك شابۋىل ءساتى تىم ۇزاققا سوزىلعان جوق. سودان كەيىن «شاحتەر» قايتادان اتقا قوندى. ءبىزدىڭ جىگىتتەردىڭ ەندىگى قارقىندارى ءتىپتى كۇشتى بولا ءتۇستى. سونداي شابۋىلداردىڭ بىرىندە, 40-مينۋتتا كوماندا كاپيتانى اندرەي فينونچەنكو اۋەلەپ كەلگەن دوپتى باسپەن قاتتى ۇرىپ, ءدال ماڭدايشانىڭ استىنان قاقپاعا ءتۇسىردى. ارادا بار-جوعى 5 مينۋت وتكەننەن كەيىن قاراعاندىلىق ەۆگەني تاراسوۆ قاقپاشىمەن بەتپە-بەت كەلگەن ءساتىن كەرەمەت پايدالانىپ, تاعى ءبىر گولدى سوعىپ كەتتى. وسىدان كەيىن كوماندالار 2:0 دەگەن ەسەپپەن ۇزىلىسكە شىقتى.
وكىنىشكە وراي, قاراعاندىلىقتار ەكىنشى تايمنىڭ باسىنان قوناقتارعا ماتچ تىزگىنىن بەرىپ قويدى. يزرايلدىك فۋتبولشىلار ءبىزدىڭ قاقپا ماڭىنان شىقپاي قويدى. ولاردىڭ شابۋىلدارى بارعان سايىن قاۋىپتى بولا ءتۇستى. بۇعان قوناقتار ساپىندا ويىنشىلار الماسقانى دا ايتارلىقتاي سەرپىن بەردى. سول مازاسىز جورىقتاردىڭ بىرىندە مەيماندار قاراعاندىلىقتار قاقپاسىنا قارىمتا دوپ سوعىپ ۇلگەردى.
كەنشىلەر بۇدان كەيىن دە قورعانىسقا كوبىرەك الاڭدادى. سول كەزدەردە قوناقتار تاعى دا گول سوعىپ كەتە جازدادى. دەگەنمەن, سودان كەيىن ءبىزدىڭ جىگىتتەر قايتا سەرپىلگەندەي بولدى. ولار بىرنەشە رەت شارانوۆ قورعاعان قاقپا ماڭىنا باردى. بىراق تۋرا سوققى بولعان جوق. مۇنىڭ سوڭىن الا «ماككابي» تاعى شابۋىلعا شىقتى. سونىڭ ارتىنشا گەۆورگ كازاريان قاتتى سوققى جاسادى. ونىڭ ۇرعان دوبىن قوناقتار قاقپاشىسى ارەڭ ۇستاپ قالدى.
67-مينۋتتا الاڭعا ماقسات بايجانوۆ شىقتى. ول جاراقاتى سىر بەرە باستاعان ەۆگەني تاراسوۆتى الماستىردى. ال الاڭداعى جاعداي كوپ وزگەرگەن جوق. ول بۇرىنعىسىنشا قوناقتاردىڭ كوبىرەك شابۋىلداۋىمەن, اراسىندا الاڭ يەلەرىنىڭ دۇركىرەي العا ۇمتىلۋىمەن جالعاسىپ جاتتى. الايدا, بۇل ۋاقىتتارى قاراعاندىلىقتار بۇرىشتاما ۇرۋدى كوبىرەك ورىندادى.
ويىننىڭ 79-مينۋتىندا «ماككابي» اقىرى ەسەپتى تەڭەستىرىپ تە ۇلگەردى. ونى قوناقتار ساپىنان تاعى دا الاڭعا كەيىن قوسىلعان ويىنشىسى سالدى. ول دوپتى سول قاپتالدان كەلە جاتىپ, الىستان ۇرىپ ءتۇسىردى. قاقپانىڭ الىس بۇرىشىنا بارىپ تۇسكەن دوپقا الەكساندر موكين جەتە المادى.
يزرايلدىكتەر بۇدان كەيىن دە شابۋىلعا شىعۋىن توقتاتپادى. ولاردىڭ كەيبىر سوققىلارى ءتىپتى قاقپاعا كىرىپ تە كەتە جازدادى. اسىرەسە, نەگىزگى ۋاقىتتىڭ سوڭعى مينۋتتارىنداعى شابۋىل ايرىقشا قاۋىپتى كورىندى.
ماتچ قوناقتاردىڭ وقتىن-وقتىن جاساعان وسىنداي شابۋىلدارى ۇستىندە اياقتالدى.
وسىلايشا قازاقستان كومانداسى ەۋروپا ليگاسىنداعى ءوزىنىڭ ەڭ العاشقى ۇپايىن الدى. البەتتە, 2:0 ەتىپ جەڭىپ تۇرىپ, ويىندى تەڭگە كەلتىرۋ ەپتەپ كوڭىلگە كىربىڭ تۇسىرەدى. وسىنىڭ الدىندا ءوز الاڭىندا ۇتىلعان يزرايلدىك كوماندا دا وسى ماتچتا ءوزىنىڭ بيىلعى ماۋسىمداعى العاشقى ۇپايىنا قول جەتكىزدى.
ەندى قاراعاندىلىقتار گوللانديانىڭ از كومانداسىمەن قاتارىنان ەكى ويىن وتكىزەدى. ونىڭ ءبىرىنشىسى استانادا وينالادى.
رۋسلان يگىلىك.
